Cipaturo 16

Mwamphu pa Kusopa Yehova

ŴANUNG’UNA ŵa Yesu, awo mbana ŵanyake ŵa Mariya, ni Yakobe, Yosefe, Simoni, na Yudasi. Pambere wose aŵa ŵandalute lumoza na Yesu na ŵasambiri ŵake ku Kaperenaumu, msumba uwo uli pafupi na Nyanja ya Galileya, panyake ŵakwima dankha pakaya pawo pa Nazarete kuti ŵatore vinthu vinyake vyakukhumbikwa.

Kweni cifukwa wuli Yesu wakuluta ku Kaperenaumu m’malo mwa kulutizga uteŵeti wake mu Kana, mu Nazarete, panji mu malo ghanyake gha mu mapiri gha Galileya? Cifukwa cakwamba nchakuti, msumba wa Kaperenaumu ndiwo ngukuru comene. Kweniso ŵanandi mwa ŵasambiri ŵaphya ŵa Yesu ŵakukhala kufupi na Kaperenaumu, ndipo ŵangakhumbikwira kuleka vikaya vyawo yayi mwakuti Yesu waŵasambizge.

Apo wali mu Kaperenaumu, Yesu wakucita milimo yakuzizwiska, nga ni umo mweneco wakuyowoyera nyengo yinyake pati pajumpha myezi. Kweni mwaluŵiro, Yesu na awo wakwenda nawo ŵakwambaso ulendo. Ni nyengo ya ciphikiro ca Paska mu 30 C.E. ndipo ŵakuluta ku Yerusalemu ku ciphikiro ici. Ŵali kura, ŵasambiri ŵake ŵakuwona cinthu cinyake ico Yesu wakucita ico ŵandaciwonepo nakale.

Mwakuyana na Dango la Ciuta, Ŵaisrayeli ŵakwenera kupeleka sembe za nyama. Ntheura kuti Ŵaisrayeli ŵasangenge nyama pafupi, ŵamalonda ŵa mu Yerusalemu ŵakuguliska viŵeto vyawo kuti vipelekekenge sembe. Kweni ŵakuguliskira nkhanira mukati mwa tempele, ndipo ŵakwibira ŵanthu mwa kuŵapimira mtengo ukuru comene.

Yesu wakukwiya ndipo wakupanga cikoti ca vingwe, na kucimbizgira kuwaro ŵamalonda. Wakukhufura ndalama za ŵakusintha ndalama na kugadabura mathebulu ghawo. Wakucemerezga ku awo ŵakuguliska nkhunda kuti: “Wuskanimo vinthu ivi muno! Lekani kuzgora nyumba ya Ŵadada kuŵa nyumba ya malonda!”

Ŵasambiri ŵa Yesu ŵati ŵawona ivi, ŵakukumbuka ucimi wakukhwaskana na Mwana wa Ciuta, wakuti: “Mwamphu wa nyumba yinu uzamunirya.” Kweni Ŵayuda ŵakufumba kuti: “Kasi utilongorenge cimanyikwiro wuli kuti uli na mazaza ghakucitira vinthu ivi?” Yesu wakuzgora kuti: “Wiskirani pasi tempele ili, ndipo mu mazuŵa ghatatu niliwuskenge.”

Ŵayuda ŵakughanaghana kuti Yesu wakuyowoya za tempele leneko, ndipo ŵakufumba kuti: “Tempele ili likazengeka mu vilimika makumi ghanayi pacanya vinkhondi na cimoza (46), ndipo kasi iwe uliwuskenge mu mazuŵa ghatatu?” Ndipouli, tempele ilo Yesu wakuyowoya ni thupi lake. Ndipo vilimika vitatu vyati vyajumphapo, ŵasambiri ŵake ŵakukumbuka ivyo wayowoya apa apo wakuwuskika ku ŵakufwa. Yohane 2:12-22; Mateyu 13:55; Luka 4:23.

▪ Wati wafuma ku ukwati ku Kana, kasi Yesu wakuluta nkhu na nkhu?

▪ Cifukwa wuli Yesu wakwiya, ndipo wakucita vici?

▪ Kasi ŵasambiri ŵa Yesu ŵakukumbuka vici ŵati ŵawona ivyo wakucita?

▪ Kasi Yesu wakuyowoyaci za “tempele ili,” ndipo wakung’anamura vici?