Cipaturo 6

Mwana Wakulayizgika

M’MALO mwa kuwelera ku Nazarete, Yosefe na Mariya ŵakukhala mu Betelehemu. Ndipo Yesu wati wakwaniska mazuŵa ghankhondi na ghatatu ŵakumukotora mwakuyana na Dango la Ciuta kwa Mozesi. Kweniso vikuwoneka kuti nkhaluso kuthya mwana msepuka zina para wakwaniska mazuŵa ghankhondi na ghatatu. Ntheura ŵakumuthya mwana zina ilo mungelo Gabriyeli wakayowoya, lakuti Yesu.

Mazuŵa ghanandi ghajumphapo, ndipo Yesu wakwaniska mazuŵa makumi ghanayi. Kasi sono ŵapapi ŵake ŵakuya nayo nkhu? Ŵakuya ku tempele ku Yerusalemu, kutaliko na uko ŵakukhala. Mwakuyana na Dango la Ciuta kwa Mozesi, para mama wababa mwana msepuka, wakwenera kupeleka sembe yakutuŵiska pa tempele para pajumpha mazuŵa makumi ghanayi.

Ndivyo Mariya wakucita. Wiza na viwunda viŵiri kuti wapeleke sembe. Ici cikutiphalira umo Yosefe na Mariya ŵaliri pa nkhani ya ndalama. Dango la Mozesi likulongosora kuti mwanamberere, uyo ngwakuzirwa comene kuluska viyuni, ndiyo wakwenera kupelekeka. Kweni usange mama wangakwaniska yayi mberere, wangapeleka viwunda panji nkhunda ziŵiri.

Mu tempele, mwanalume munyake mucekuru wakukolera Yesu mu mawoko. Zina lake ni Simiyoni. Ciuta wali kumuvumbulira kuti wawonenge nyifwa yayi mpaka wawone dankha Khristu, panji kuti Mesiya wakulayizgika wa Yehova. Pa zuŵa ili, apo Simiyoni wakwiza ku tempele, mzimu utuŵa ukumulongozgera ku mwana uyo wali na Yosefe na Mariya.

Apo Simiyoni wakukolera Yesu, wakuwonga Ciuta, wakuti: “Sono Fumu Yikuru, mukuzomerezga muzga winu kuluta mu mtende mwakuyana na mazgu ghinu; cifukwa maso ghane ghawona nthowa yinu yakuponoskera iyo mwanozga pamaso pa ŵanthu wose, ungweru wa kuwuskako cidiko mu maso gha mitundu na ucindami wa ŵanthu ŵinu Israyeli.”

Yosefe na Mariya ŵakuzizwa na ivyo ŵakupulika. Kufuma apo, Simiyoni wakuŵatumbika ndipo wakuphalira Mariya kuti mwana wake “uyu wazamuŵa cifukwa ico ŵanandi mu Israyeli ŵazamuwira na kuwukaso” ndiposo kuti wazamulasika na citima, nga nkhulasa kwa lupanga lwakuthwa.

Pa cakucitika ici, paliso nchimi yanakazi zina lake Ana, uyo wali na vilimika 84. Nakuti mwanakazi uyu wakupamba yayi pa tempele. Mu ora leneliro, Ana wakwiza pafupi ndipo wakwamba kuwonga Ciuta na kuyowoya vya Yesu ku wose awo ŵakupulika.

Yosefe na Mariya ŵakukondwa comene na ivyo vikucitika pa tempele. Nadi, vyose ivi vikuŵasimikizgira kuti mwana uyu Ngwakulayizgika wa Ciuta. Luka 2:21-38; Leviticus 12:1-8.

▪ Kasi vikuwoneka kuti mu Israyeli, mwana msepuka ŵakamuthyanga pawuli zina?

▪ Kasi mama mu Israyeli wakeneranga kupeleka vici para mwana wake msepuka wakwaniska mazuŵa makumi ghanayi, ndipo umo Mariya wakacitira pakufiska dango ili vikulongora kuti wakaŵa wuli pa nkhani ya ndalama?

▪ Kasi mbanjani awo ŵamumanya makora Yesu pa cakucitika ici, ndipo ŵakulongora wuli?