Cipaturo 126

“Nadi, Uyu Wakaŵa Mwana wa Ciuta”

YESU wakhalapo nyengo yicoko waka pa khuni, ndipo muhanya pakati, cisi cakofya ca maora ghatatu cikuwa pa caru. Cisi ici cawa cifukwa cakuti mwezi na dazi vyakumana yayi, pakuti ivi vikucitika para mwezi nkhamukelekeziyo pera kweni pa nyengo ya Paska mwezi ukuŵa wamusuma. Kweniso para mwezi na dazi vyakumana, cisi cake cikutora nyengo yitali yayi. Ntheura Ciuta ndiyo wacitiska cisi ici. Ndipo cifukwa ca cisi ici, ŵanthu awo ŵahoyanga Yesu ŵakuleka, nanga ni matusi ghawo ghose ghakumalira papo.

Usange cisi cacilendo ici canguwa pambere yumoza wa ŵakucita viheni ŵara wandacenye munyake na kupempha Yesu kuti wamukumbuke, panji ndico camupangiska kuti wapere. Panji pa nyengo ya cisi iyi, ŵanakazi ŵanayi, nyina wa Yesu na munung’una wake Salome, Mariya wa ku Magadala, ndiposo Mariya nyina wa mpositole Yakobe Mucoko, ŵakwiza pafupi na khuni lakusuzgikirapo. Yohane, mpositole wakutemweka wa Yesu, nayo wali penepapa.

‘Lupanga lukupoloskeka’ mu mtima wa nyina wa Yesu apo wakuwona mwana uyo wakamuleranga wakusuzgika na ulwilwi pa khuni. Ndipouli, Yesu wakughanaghanira vyakuŵinya vyake yayi, kweni umoyo wa ŵanyina. Mwakusuzgikira comene, wakulazgira kwa Yohane ndipo wakuti ku ŵanyina: “Wamwanakazi, wona! Mwana wako!” Ndipo pakulazgira kwa Mariya, wakuti kwa Yohane: “Wona! Ŵanyoko!”

Ntheura Yesu wakuphalira mpositole wake wakutemweka comene uyu kuti wapwelelere ŵanyina, awo pasono nchokoro. Wakucita nthena cifukwa cakuti ŵana ŵanyake ŵa Mariya ŵacali ŵandalongore cipulikano mwa iyo. Ntheura wakupwelelera ŵanyina mwakuthupi kweniso mwauzimu. Ici nchisambizgo ciwemi comene.

Ca m’ma 3 koloko muhanya, Yesu wakuti: “Nili na nyota.” Yesu wakujipulika nga ni para Ŵawiske ŵaleka kumuvikilira mwakuti wayezgeke fikepo usange ngwakugomezgeka. Ntheura wakucemerezga na mazgu ghakuru kuti: “Ciuta wane, Ciuta wane, kasi mwanisidiraci?” Pakupulika ici, ŵanji awo ŵimilira pafupi ŵakuyowoya kuti: “Wonani! Wakucema Eliya.” Penepapo yumoza wa iwo wakucimbira na kuŵika sipanji yakubizgika mu vinyo lakuŵaŵa ku phekesi la hisopu, wakumupa kuti wamwe. Kweni ŵanji ŵakuti: “Mulekani! Tiyeni tiwone usange Eliya wizenge kuti wamukhizge.”

Yesu wati wapokera vinyo lakuŵaŵa, wakucemerezga kuti: “Cafiskika!” Enya, wamalizga vyose ivyo Ŵawiske ŵakamutuma kuzakacita pa caru capasi. Paumaliro, iyo wakuti: “Ŵadada, nkhuŵikizga mzimu wane mu mawoko ghinu.” Ntheura Yesu wakupeleka kwa Ciuta nkhongono ya umoyo wake na cigomezgo cakuti Ciuta wayiwezgerengeso kwa iyo. Kufuma apo, wakukoŵama na kufwa.

Yesu wati wamalizgika waka, cindindindi cikuru cikucitika, ndipo cikuswa majalawe. Cindindindi ici nchankhongono comene mwakuti madindi agho ghali kuwaro kwa Yerusalemu ghakusweka ndipo vitanda vikuponyeka kuwaro. Ŵanthu awo ŵakujumpha mu nthowa ŵakuwona vitanda ivyo vili pawaro, ndipo ŵakunjira mu msumba na kuphara nkhani iyi.

Kweniso apo Yesu wakufwa, cisalu cikuru cakuchinga ico cikupatura Malo Ghatuŵa na Malo Ghatuŵa Comene gha mu tempele la Ciuta cikupaluka kufuma pacanya mpaka musi. Cisalu cakuchinga cakutowa ici cikwenera kuti nchitali mamita 18 ndipo nchizito comene. Cinthu cakuzizwiska ici cikulongora ukali wa Ciuta ku awo ŵakoma Mwana wake kweniso cikulongora kuti nthowa yakunjilira ku Malo Ghatuŵa Comene, kucanya, sono yajulika kwizira mu nyifwa ya Yesu.

Sono ŵanthu ŵati ŵapulika cindindindi na kuwona vinthu ivyo vyacitika, ŵakopa comene. Mulara wa ŵasilikari uyo waŵalongozga pakukoma Yesu, wakupeleka ucindami kwa Ciuta. Wakuti: “Nadi, uyu wakaŵa Mwana wa Ciuta.” Munthu uyu wakwenera kuti wanguŵapo apo nkhani yakuti Yesu ni mwana wa Ciuta yayowoyekanga, peneapo weruzgikanga panthazi pa Pilato. Ndipo sono wakhorwa kuti Yesu ni Mwana wa Ciuta, enya, kuti ni munthu mukuru kuluska wose awo ŵali kuŵako.

Ŵanji nawo ŵacita wofi na vinthu vyamunthondwe ivi, ndipo ŵakwamba kuwelera kukwawo uku ŵakujitimba pa nganga cifukwa ca citima cikuru na soni. Pataliko, pali ŵanakazi ŵanandi awo mbasambiri ŵa Yesu, ŵakuwonelera ivi ndipo ŵakhwaskika comene na minthondwe iyi. Mpositole Yohane nayo walipo. Mateyu 27:45-56; Mariko 15:33-41; Luka 23:44-49; 2:34, 35; Yohane 19:25-30.

▪ Cifukwa wuli cisi ca maora ghatatu cikucitika cifukwa cakuti dazi na mwezi vyakumana yayi?

▪ Nyengo yicoko waka pambere Yesu wandafwe, kasi ni sambiro wuli liwemi ilo wakupeleka ku awo ŵali na ŵapapi ŵacekuru?

▪ Kasi Yesu wakuyowoya fundo wuli zinayi pambere wandafwe?

▪ Kasi cindindindi cikufiska vici, ndipo cisalu cakuchinga ca mu tempele ico capaluka cikulongora vici?

▪ Kasi mulara wa ŵasilikari uyo waŵalongozga pakukoma Yesu wakhwaskika wuli na minthondwe?