Cipaturo 56

Nchivici Cikufipiska Munthu?

SONO ŵanthu ŵakumususka comene Yesu. Ŵasambiri ŵake ŵanandi ŵamusida, kweniso Ŵayuda ŵa mu Yudeya ŵakukhumba kumukoma, nga umo ŵakacitira apo wakaŵa mu Yerusalemu pa Paska mu 31 C.E.

Sono ni nyengo ya Paska la 32 C.E. Mwakuyana na dango la Ciuta, Yesu wakwenera kuti wakuluta ku ciphikiro ca Paska mu Yerusalemu. Ndipouli, wakucita ntheura mwakucenjera cifukwa umoyo wake uli pangozi. Pamanyuma, wakuwelera ku Galileya.

Panyake Yesu wali mu Kaperenaumu apo Ŵafarisi na ŵalembi ŵakufuma ku Yerusalemu ŵakwiza kwa iyo. Ŵakupenja vifukwa vyakuti ŵapusikizgire Yesu kuti wakuswa malango gha cisopa. Ŵakufumba kuti: “Cifukwa wuli ŵasambiri ŵako ŵakujumpha maluso gha ŵanthu ŵa nyengo zakale? Mwaciyelezgero, ŵakugeza mu mawoko cara para ŵaryenge cakurya.” Ici ndico Ciuta wakukhumba yayi, kweni Ŵafarisi ŵakuwona kuti ni mulandu ukuru kuleka kucita kaluso aka, ako nkhugeza mu mawoko mpaka mu kasukusuku.

M’malo mwa kuŵazgora pa ivyo ŵakumususka, Yesu wakuŵalongora umo iwo ŵakuswera Dango la Ciuta mwadala. Wakuŵafumba kuti: “Cifukwa wuli namwe mukujumpha dango la Ciuta cifukwa ca maluso ghinu? Mwaciyelezgero, Ciuta wakati, ‘Cindika ŵawuso na ŵanyoko’; ndipo ‘Uyo wakutuka ŵawiske panji ŵanyina wafwe nadi.’ Kweni imwe mukuti, ‘Yose uyo wakuti kwa ŵawiske panji ŵanyina: “Cilicose ico nili naco, ceneico mungandula naco kwa ine nchawanangwa cakupelekeka kwa Ciuta,” wangacindikanga ŵawiske cara nanga mphacoko.’”

Nadi, Ŵafarisi ŵakusambizga kuti ndalama, katundu, panji cilicose cakupelekeka nga nchawanangwa kwa Ciuta ncha mu tempele ndipo cingagwiraso nchito yinyake yayi. Kweni cawanangwa cakupelekeka ici cikusungika na munthu uyo wacipeleka. Ntheura, para mwana wakuyowoya kuti ndalama zake panji katundu ni “korobani,” cawanangwa cakupelekeka kwa Ciuta panji ku tempele, wakugwentha mulimo wake wa kovwira ŵapapi ŵake ŵacekuru, awo ŵangaŵa kuti mbakusoŵerwa comene.

Pakukwiya na umo Ŵafarisi ŵakubendezgera Dango la Ciuta, Yesu wakuti: “Mwazgora mazgu gha Ciuta kuŵa ghambura nchito cifukwa ca maluso ghinu. Mwaŵapusikizgi imwe, Yesaya wakaneneska kucima vya imwe, apo wakati, ‘Ŵanthu aŵa ŵakunicindika na milomo yawo, kweni mtima wawo uli kutali nkhanira na ine. Ŵakunisopa pawaka, cifukwa ŵakusambizga malanguro gha ŵanthu nga ni visambizgo.’”

Panji mzinda wangusezgekapo dankha kuti Ŵafarisi ŵamufumbe makora Yesu. Sono Ŵafarisi ŵati ŵasoŵa cakuzgora apo wakuŵasuska, Yesu wakucemera mzinda kufupi. Wakuti: “Pulikizgani.” “Ndipo manyani ng’anamuro lake. Palije kanthu kakufuma kuwaro kwa munthu ako kakujumpha mwa iyo kangamufipiska; kweni vinthu ivyo vikufuma mwa munthu ndivyo ni vinthu ivyo vikufipiska munthu.”

Ndipo ŵati ŵanjira mu nyumba, ŵasambiri ŵake ŵakufumba kuti: “Kasi mukumanya kuti Ŵafarisi ŵakhuŵara pakupulika ivyo mwanguyowoya?”

Yesu wakuzgora kuti: “Cakumera cilicose ico Ŵadada ŵa kucanya ŵakapanda cara, cizgulikenge. Ŵalekani. Iwo mbalongozgi ŵacibulumutira. Ntheura usange munthu wacibulumutira wakulongozga munthu wacibulumutira, wose ŵawenge mu mbuna.”

Yesu wakuwoneka kuti wakuzizwa apo Petrosi, m’malo mwa ŵasambiri ŵanyake, wakumufumba kuti walongosore makora nkhani ya ico cikufipiska munthu. Yesu wakuzgora kuti: “Kasi namwe mucali ŵambura kupulikiska? Kasi mukumanya cara kuti cilicose ico cikunjira mu mulomo cikujumpha mu matumbo ndipo cikufumira kuwaro kwa thupi? Ndipouli, vinthu ivyo vikufuma mu mulomo vikufumira mu mtima, ndipo vinthu ivi ndivyo vikufipiska munthu. Mwaciyelezgero, mu mtima mukufuma maghanoghano ghaheni, kukoma ŵanthu, mauleŵi, mauzaghali, maunkhungu, maukaboni ghautesi, miyuyuro. Vinthu ivi ndivyo vikufipiska munthu; kweni kurya cakurya na mawoko ghambura kugeza kukufipiska munthu cara.”

Apa Yesu wakuciska ŵanthu kuti ŵaleke kujipwelelera yayi. Wakukanizga ŵanthu kugeza mu mawoko yayi pambere ŵandanozge cakurya panji kurya. M’malo mwake, Yesu wakususka upusikizgi wa ŵalongozgi ŵa cisopa awo ŵakujumpha malango ghaurunji gha Ciuta na kudemelera ku maluso gha ŵanthu. Enya, milimo yiheni ndiyo yikufipiska munthu, ndipo Yesu wakulongora kuti milimo iyi yikufuma mu mtima. Yohane 7:1; Duteronome 16:16; Mateyu 15:1-20; Mariko 7:1-23; Exodus 20:12; 21:17; Yesaya 29:13.

▪ Kasi sono ŵanthu ŵakumususka wuli Yesu?

▪ Kasi Ŵafarisi ŵakususka Yesu pa nkhani wuli, kweni Yesu wakulongora kuti Ŵafarisi ŵakuswa wuli Dango la Ciuta mwadala?

▪ Kasi Yesu wakuvumbura kuti ni vinthu wuli ivyo vikufipiska munthu?