Cipaturo 84

Ng’anamuro la Kuŵa Msambiri

WATI wafuma mu nyumba ya Mufarisi uyo wakwenera kuti njumoza wa Sanihedirini, Yesu wakulutilira ulendo wake wa ku Yerusalemu. Mizinda yikuru yikumulondezga. Kweni kasi yikukhumba vici? Kasi cikukhumbikwa nchivici kuti munthu waŵe nadi mulondezgi wa Yesu?

Apo ŵakulutilira kwenda, Yesu wakulaŵiska mizinda ndipo wakwenera kuti wakuŵazizika apo wakuti: “Usange munthu wakwiza kwa ine ndipo wakutinkha cara wiske na nyina na muwoli na ŵana na ŵakuru panji ŵanung’una na ŵadumbu, enya, nanga mbumoyo wake, wangaŵa msambiri wane cara.”

Kasi Yesu wakung’anamura vici? Apa Yesu wakung’anamura kuti ŵalondezgi ŵake ŵatinkhenge nadi ŵabali ŵawo yayi. M’malo mwake, ŵakwenera kuŵatinkha mu fundo yakuti ŵakwenera kuŵatemwa pacoko pakuyaniska na iyo. Sekuru wa Yesu, Yakobe, wakuyowoyeka kuti ‘wakatinkha’ Leya ndipo wakatemwa Rakelo, ico cikung’anamura kuti Leya wakatemwekanga pacoko pakuyaniska na munung’una wake Rakelo.

Ghanaghaniraniso kuti Yesu wayowoya kuti msambiri wakwenera kutinkha “nanga mbumoyo wake.” Cinyake ico Yesu wakung’anamura nchakuti msambiri wanadi wakwenera kutemwa comene iyo kuluska umoyo wake. Ntheura Yesu wakudidimizga fundo yakuti kuŵa msambiri wake nchinthu cakuzirwa comene. Nchinthu ico pakucita, munthu wakwenera kucighanaghanira comene.

Pakuŵa msambiri wa Yesu munthu wakusangana na masuzgo na nthambuzgo, nga umo iyo wakuyowoyera kuti: “Yose uyo wakunyamura cara khuni lake lakusuzgikirapo na kwiza pamanyuma pane, wangaŵa msambiri wane cara.” Ntheura, msambiri wanadi wakwenera kuŵa wakunozgeka kutambuzgika nga ni Yesu, nanga nkhukomeka wuwo na ŵalwani ŵa Ciuta, usange nchakukhumbikwa, nga umo Yesu nayo wacitirenge sonosono apa.

Ntheura kuŵa msambiri wa Khristu ni nkhani iyo mizinda iyo yikumulondezga yikwenera kuyisanda mwakupwelelera comene. Yesu wakukhozgera fundo iyi na ntharika. Wakuti: “Mwaciyelezgero, ni njani wa imwe uyo wakukhumba kuzenga cigongwe kwambura kukhala dankha pasi na kupendesera mtengo, kuti wawone usange wali nazo zakukwana kuti wacimalizge? Kwambura kucita ntheura, wangazenga lufura lwake kweni wangamanya cara kucimalizga, ndipo wose awo ŵakuwona ŵangamba kumugoska, ŵayowoyenge kuti, ‘Munthu uyu wakamba kuzenga kweni wakamanya cara kumalizga.’”

Ntheura Yesu wakulongosolera ŵanthu awo ŵakumulondezga kuti pambere ŵandaŵe ŵasambiri ŵake, ŵakwenera kusimikizga dankha kuti ŵangafiska ivyo vikukhumbikwa, nga umo munthu uyo wakukhumba kuzenga cigongwe wakuwonera dankha usange wali nazo ndalama zakuti wacimalizgire. Pakuyowoyaso ntharika yinyake, Yesu wakulutilira kuti:

“Panji ni themba ndi, ilo likuluta kukakumana na themba linyake mu nkhondo, kwambura kukhala dankha pasi na kufumbilira fundo kuti liwone usange lingamanya kwima na ŵankhondo vikwi khumi kwimikana na uyo wakwiza na vikwi makumi ghaŵiri? Nakuti usange wangima cara, apo munyake yura wacali kutali, iyo wakutuma ciwuru ca ŵimiliri na kuŵeyelera mtende.”

Kufuma apo, Yesu wakudidimizga fundo ya ntharika yake, wakuti: “Ntheura mwakuyana waka, palije yumoza wa imwe uyo wakulayirana cara na vyose ivyo wali navyo wangaŵa msambiri wane.” Ici ndico mizinda iyo yikumulondezga ndiposo waliyose uyo wakusambira za Khristu wakwenera kunozgeka kucita. Ŵakwenera kuŵa ŵakunozgeka kuleka cilicose ico ŵali naco, na umoyo wawo wuwo usange ŵakukhumba kuŵa ŵasambiri ŵake. Kasi imwe muli ŵakukhumbisiska kucita ici?

Yesu wakulutilira kuti: “Nadi, mcere nguwemi.” Mu Upharazgi wake wa pa Lupiri, Yesu wakati ŵasambiri ŵake ni “mcere wa caru capasi,” kung’anamura kuti ŵangawovwira kuti ŵanthu ŵasungike, nga umo mcere wanadi ukovwilira kuti vinthu visungike. Yesu wakumalizga kuti: “Kweni usange mcere wamara nkhongono yake, kasi ulungikenge na vici? Ukwenelera dongo cara nesi vundira. Ŵanthu ŵakuwutaya kuwaro. Uyo wali na makutu kuti wapulike, wapulike.”

Ntheura Yesu wakulongora kuti nanga ni awo ŵaŵa ŵasambiri ŵa Yesu kwa nyengo yitali nawo ŵakwenera kuleka cara kusimikizga mtima kulutilira. Usange ŵangacita nthena ŵaŵenge ŵambura nchito, ŵakusekeka na caru ici kweniso ŵambura kwenelera kwa Ciuta, ndiposo ŵakutukiska Ciuta. Ntheura, nga ni mcere wakusukuluka na wakunangika, nawo ŵazamutayika kuwaro, panji kuti kuparanyika. Luka 14:25-35; Genesis 29:30-33; Mateyu 5:13.

▪ Kasi ‘kutinkha’ ŵabali na wamwene cikung’anamura vici?

▪ Kasi Yesu wakuyowoya ntharika wuli ziŵiri, ndipo zikung’anamura vici?

▪ Kasi fundo yikuru mu mazgu ghaumaliro gha Yesu ghakuyowoya za mcere njakuti wuli?