Cipaturo 69

Nkhani Yakuyowoya za Dada

NYENGO ya ciphikiro, cidumbirano ca Yesu na ŵalongozgi ŵa Ŵayuda, cikukura comene. Yesu wakuzomerezga kuti: “Nkhumanya kuti ndimwe mphapu ya Abrahamu; kweni mukukhumba kunikoma, cifukwa mazgu ghane ghakukhazikika cara mwa imwe. Vinthu ivyo nawona ku Ŵadada ndivyo nkhuyowoya; ntheura imwe citani vinthu ivyo mwapulika kwa wiskemwe.”

Nangauli wakuŵaphalira yayi wiskewo, Yesu wakulongora pakweru kuti wiskewo ngwakupambana na wake. Kwambura kumanya uyo Yesu wakunena, ŵalongozgi ŵa Ŵayuda ŵakuti: “Dada withu ni Abrahamu.” Ŵakughanaghana kuti ŵali na cipulikano nga ncha Abrahamu, uyo wakaŵa mubwezi wa Ciuta.

Ndipouli, Yesu wakuŵatindika, apo wakuzgora kuti: “Usange muli ŵana ŵa Abrahamu, citani milimo ya Abrahamu.” Nadi, mwana mweneco wakuyezga wiske. Yesu wakuti: “Kweni sono mukukhumba kunikoma, na munthu ine namuphalirani unenesko uwo nkhapulika kwa Ciuta. Abrahamu wakacita ici cara.” Ntheura Yesu wakuyowoyaso kuti: “Imwe mukucita milimo ya wiskemwe.”

Kweni ŵacali ŵandamanye uyo Yesu wakunena. Ŵakulutilira kuyowoya kuti mbana ŵeneko ŵa Abrahamu, ŵakuti: “Tili kubabika mu uzaghali cara.” Ntheura pakulongora kuti ŵakusopa mwaunenesko nga ni Abrahamu, ŵakuyowoya kuti: “Tili na Dada yumoza, Ciuta.”

Kweni kasi Ciuta ni Dada wawo nadi? Yesu wakuzgora kuti: “Ciuta waŵenge Wiskemwe, mphanyi mwanitemwa, pakuti ine nili kufuma kwa Ciuta ndipo nili pano. Nili kwiza mwa namwene cara, kweni Iyo yura wali kunituma. Cifukwa wuli mukumanya cara ivyo nkhuyowoya?”

Yesu wayezga kuŵalongora ŵalongozgi ŵa cisopa aŵa ivyo vicitikenge cifukwa cakuti ŵakumukana. Kweni sono wakuŵafiskira wakuti: “Imwe muli ŵakufuma kwa wiskemwe Dyabulosi, ndipo mukukhumba kucita makhumbiro gha wiskemwe.” Kasi Dyabulosi ni dada wamtundu wuli? Yesu wakuti Dyabulosi ngwakukoma ŵanthu ndipo wakuyowoyaso kuti: “Ni mutesi ndipo ni wiske wa utesi.” Ntheura Yesu wakumalizga kuti: “Uyo ngwakufuma kwa Ciuta wakupulika mazgu gha Ciuta. Ndico cifukwa imwe mukupulika cara, cifukwa muli ŵakufuma kwa Ciuta cara.”

Pakukwiya cifukwa cakuti Yesu waŵasuska, Ŵayuda ŵakuzgora kuti: “Asi ndikuti tikuneneska kuti, Ndiwe Musamariya ndipo uli na ciŵanda?” Lizgu lakuti “Musamariya” likuyowoyeka pakulongora msinjiro, pakuti Ŵasamariya ŵakutinkhika na Ŵayuda.

Pakusulako waka fundo yakuti ni Musamariya, Yesu wakuzgora kuti: “Ine nili na ciŵanda cara, kweni nkhucindika Ŵadada, ndipo imwe mukuniyuyura.” Mwakulutilira, Yesu wakulayizga cinthu cakuzizika, wakuti: “Usange munthu wakusungilira mazgu ghane, wawonenge nyifwa cara napacoko.” Yesu wakung’anamura kuti wose awo ŵakumulondezga ŵalekenge kufwa yayi. Kweni wakung’anamura kuti pharanyiko lamuyirayira panji kuti “nyifwa yaciŵiri,” iyo yilije ciwuka yizamuŵakhwaska yayi.

Ndipouli, Ŵayuda ŵakupulika mazgu gha Yesu umo ghaliri. Ntheura ŵakuti: “Sono tamanya kuti uli na ciŵanda. Abrahamu wali kufwa, kweniso zinchimi; kweni iwe ukuti, ‘Usange munthu wakusungilira mazgu ghane, wacetenge nyifwa cara.’ Kasi ndiwe mukuru kuluska dada withu Abrahamu uyo wali kufwa? Nchimi nazo zili kufwa. Kasi iwe ukujitora kuti ndiwe njani?”

Mu cidumbirano cose ici, Yesu wakuyezga kuphalira ŵanthu aŵa kuti iyo ni Mesiya wakulayizgika. Kweni m’malo mwakuti wajiphare waka, Yesu wakuti: “Usange nkhujipa ucindami, ndikuti ucindami wane nkhanthu cara. Ŵadada ndiwo ŵakunipa ucindami, awo imwe mukuti Ciuta winu; ndipouli, mucali mundaŵamanye. Kweni ine nkhuŵamanya. Ndipo usange nkhuti nkhuŵamanya cara niŵenge nga ndimwe, mutesi.”

Pakulutilira, Yesu wakuyowoyaso za Abrahamu, munthu wakugomezgeka, wakuti: “Wiskemwe Abrahamu wakasekelera comene pakulindizga kuzakawona zuŵa lane, ndipo wakaliwona na kusekelera.” Enya, na cipulikano, Abrahamu wakalindilira na kunweka kwiza kwa Mesiya wakulayizgika. Ŵayuda ŵakugomezga yayi, ndipo ŵakuti: “Ucali undakwaniske vilimika makumi ghankhondi, ndipo kasi uli kumuwona Abrahamu?”

Yesu wakuzgora kuti: “Nadi, nadi nkhumuphalirani, Abrahamu wandaŵeko, ine niliko kale.” Yesu wakuyowoya za kuŵapo kwake nga munthu wauzimu kucanya pambere wandize pa caru capasi.

Pakukwiya na fundo ya Yesu yakuti wakaŵako pambere Abrahamu wandaŵeko, Ŵayuda ŵakutora malibwe kuti ŵamuswe nagho. Kweni Yesu wakubisama ndipo wakufuma mu tempele kwambura kupwetekeka. Yohane 8:37-59; Uvumbuzi 3:14; 21:8.

▪ Kasi Yesu wakulongora wuli kuti iyo na ŵalwani ŵake ŵali na ŵadada ŵakupambana?

▪ Kasi Ŵayuda ŵakung’anamuraci pakucema Yesu kuti Musamariya?

▪ Kasi Yesu wakung’anamuraci apo wakuti ŵalondezgi ŵake ŵawonenge nyifwa yayi?