Cipaturo 77

Nkhani ya Ciharo

ŴANTHU ŵakwenera kuti ŵamanya kuti Yesu waryanga cakurya mu nyumba ya Mufarisi. Ntheura ŵanthu vikwi vinandi ŵakuwungana kuwaro kulindilira Yesu kuti wafume. Mwakupambana na Ŵafarisi awo ŵakususka Yesu ndipo ŵakukhumba kuti ŵamusange mulandu mu kayowoyero, ŵanthu aŵa ŵakutegherezga mwakunweka.

Pakung’anamukira dankha ku ŵasambiri ŵake, Yesu wakuti: “Cenjerani na cilungo ca Ŵafarisi, ceneico mbupusikizgi.” Umo vyawonekera pa nyengo ya cakurya, kasopero kose ka Ŵafarisi nkhakuzura na upusikizgi. Nangauli uheni wa Ŵafarisi ungabisika na usopisopi wawo, paumaliro uzamuvumbukwa. Yesu wakuti: “Palije cinthu cakubenekelereka ico cizamuŵa cambura kuvumbulika, na cakubisika ico cizamuŵa cambura kumanyikwa.”

Yesu wakuwerezgapo mazgu ghakukhwimiska agho wakaphalira ŵasambiri ŵake 12 apo wakaŵatumanga kukapharazga mu Galileya. Wakuti: “Mungopanga awo ŵakukoma thupi cara ndipo pamanyuma pa ici ŵakumanya cara kucitaso cinyake.” Pakuti Ciuta wakuluwa yayi nanga kangaŵa kampheta kamoza, Yesu wakusimikizgira ŵalondezgi ŵake kuti Ciuta waŵaluwenge yayi. Iyo wakuti: “Para ŵamutolerani panthazi pa wumba na ŵalara ŵa boma na ŵamazaza, . . . mzimu utuŵa wamumusambizgani mu ora lenelira vinthu ivyo mukwenera kuyowoya.”

Munthu munyake pakati pa mzinda wakuyowoyapo. Wakupempha kuti: “Msambizgi, phalirani mukuru wane kuti wanigaŵireko ciharo.” Dango la Mozesi likuti mwana wakwamba kubabika wakwenera kupokera vigaŵa viŵiri vya ciharo, ntheura palije cifukwa cakukweserana. Kweni vikulongora kuti munthu uyu wakukhumba kupoka vinandi kuluska ivyo wakwenera kupokera.

Yesu wakukana kunjilirapo. Wakufumba kuti: “Wamunthu iwe, ni njani wakanimika kuŵa mweruzgi panji wakumugaŵirani imwe mwaŵanthu?” Kufuma apo, wakusoka mzinda kuti: “Muŵenge maso ndipo cenjerani na mtundu uliwose wa udokezi, cifukwa nanga munthu wangaŵa na vyakuzara, umoyo wake ukufuma mu ivyo wali navyo cara.” Enya, nanga munthu wangaŵa na vinthu vinandi wuli, kweni wafwenge na kuvileka vyose. Kuti wakhozgere fundo iyi na kulongora kuti mbuzeleza kutondeka kujipangira lumbiri luwemi na Ciuta, Yesu wakuyowoya ntharika. Wakulongosora kuti:

“Munda wa munthu yunji musambazi ukapambika makora. Ntheura wakamba kuyowoya mu mtima wake, wakati, ‘Kasi niciteci, sono pakuti nilije pakuti nilonge vyakurya vyane?’ Sono wakati, ‘Nicitenge ici: Nipasulenge nthamba zane na kuzenga zikuruko, ndipo mwenemumo ndimo nilongenge vuna yane yose na vinthu vyane vyose viwemi; ndipo nitenge ku umoyo wane: “Umoyo wane, uli na vinthu viwemi vinandi ivyo vyakuŵikikira vilimika vinandi; fwasa, urye, umwe, usangwe.”’ Kweni Ciuta wakati kwa iyo, ‘Muzeleza iwe, usiku uno ŵakukhumba umoyo wako kwa iwe. Ipo ni njani waŵenge na vinthu ivyo wasunga?’”

Pakumalizga, Yesu wakuti: “Ntheura ndimo viliri na munthu uyo wakujisungira usambazi kweni ni musambazi cara kwa Ciuta.” Nangauli ŵasambiri ŵangakoreka yayi mu cipingo ca kujiwunjikira usambazi, kweni cifukwa ca vyakukhumba mu umoyo nawo ŵangatondeka kuteŵetera Yehova na umoyo wawo wose. Ntheura Yesu wakusangirapo mwaŵi pa nyengo iyi kuwerezgapo fundo iyo wakayowoya mu Upharazgi wa pa Lupiri, pafupifupi cilimika cimoza na hafu ico cajumpha. Pakung’anamukira ku ŵasambiri ŵake, iyo wakuti:

“Pa cifukwa ici nkhumuphalirani, Lekani kwenjerwa na umoyo winu pa ico muryenge panji vya mathupi ghinu pa ico muvwarenge. . . . Ŵanikani makora vihoŵe kuti vikuseŵa cara nesi kuvuna, ndipo vilije nthamba nesi pakulonga, ndipouli, Ciuta wakuvilyeska. . . . Ŵanikani makora umo maluŵa ghakukulira; ghakutokatoka cara nesi kupanga salu; kweni nkhumuphalirani, Nanga ni Solomoni mu ucindami wake wose wakavwarapo nga ndimoza la igho cara. . . .

“Ntheura lekani kwenjerwa na ivyo muryenge na ivyo mumwenge, ndipo lekani kufipa mtima; cifukwa vyose ivi ni vinthu ivyo mitundu ya caru yikupenjisiska, kweni Ŵawiskemwe ŵakumanya kuti mukukhumba vinthu ivi. Ndipouli, lutilirani kupenja ufumu wake, ndipo vinthu ivi visazgikengeko kwa imwe.”

Mazgu gha Yesu ghakugwira nchito comene para ndalama zasuzga. Munthu uyo wakwenjerwa comene na vinthu vyathupi na kuwelera nyuma mu vyauzimu, wakulongora kuti walije cipulikano cakuti Ciuta wakupwelelera ŵateŵeti ŵake. Luka 12:1-31; Duteronome 21:17.

▪ Kasi cingaŵa cifukwa wuli ico munthu uyu wakupemphera ciharo, ndipo Yesu wakuwusoka wuli mzinda?

▪ Kasi Yesu wakuyowoya ntharika wuli, ndipo fundo yake yikuru njakuti wuli?

▪ Kasi Yesu wakuwerezgapo fundo wuli, ndipo cifukwa wuli njakwenelera?