Cipaturo 86

Nkhani ya Mwana Wakuzgeŵa

WATI wamara waka kuphalira Ŵafarisi ntharika zakukhwaskana na kusangaso mberere yakuzgeŵa ndiposo ndalama ya dirakima, Yesu wakuyowoyaso ntharika yinyake. Ntharika iyi yikuyowoya za dada wacitemwa ndiposo umo wakucitira na ŵana ŵake ŵaŵiri, awo ŵali na masuzgo ghakuru.

Cakwamba, pali mwana mucoko, uyo wakuzunulika comene mu ntharika iyi. Wakuwunjika ciharo, ico ŵawiske ŵakumupa na mtima wose. Ndipo wakufumapo pa nyumba na kwamba kucita makhaliro ghaheni. Kweni pulikizgani apo Yesu wakuyowoya nkhani iyi, ndipo wonani usange mungamanya awo ŵanthu ŵa mu ntharika iyi ŵakwimira.

Yesu wakwamba kuyowoya, wakuti: “Munthu yunji wakaŵa na ŵana ŵaŵiri ŵanalume. Ndipo mucoko wa iwo wakati ku ŵawiske, ‘Ŵadada, munipe cigaŵa ca katundu winu ico cikwenera kuŵa cane.’ Penepapo [wiskewo] wakaŵagaŵira ivyo wakaŵa navyo.” Kasi mwana mucoko uyu wakucita navyo vici ivyo wapokera?

Yesu wakulongosora kuti: “Pamanyuma pa mazuŵa ghacoko waka, mwana mucoko yura wakawunjika vinthu vyose pamoza na kuluta ku caru cinyake ca kutali, ndipo kura wakasakaza katundu wake mu makhaliro ghaheni.” Ndalama zake wakumalira ŵanakazi ŵazaghali. Pamanyuma, vinthu vikwamba kumusuzga, nga umo Yesu wakulongosolera kuti:

“Wakati wasamphanya vyose, njara yikuru yikawa mu caru cose cira, ndipo wakamba kuŵa wakusoŵerwa. Nakuti mpaka wakaluta na kujibatika kwa yumoza wa ŵenekaya ŵa caru cira, ndipo wakamutuma ku minda yake kukaliska nkhumba. Ndipo wakadokeranga kukhutiskika na misekese iyo nkhumba zikaryanga, ndipo pakaŵavya munthu uyo wakamupako kanthu.”

Nchinthu capasi comene kwamba kugwira nchito ya kuliska nkhumba, pakuti mwakuyana na Dango, viŵeto ivi vikaŵa vyakufipirwa. Kweni ico cikumuŵinya comene mwana uyu ni njara iyo yikumupangiska kuti wadokerenge vyakurya vya nkhumba. Cifukwa ca suzgo ili, Yesu wakuti, mwana uyu ‘wakajinyumwa.’

Pakulutilira na nkhani iyi, Yesu wakulongosora kuti: “Wakayowoya [kwa iyomwene] kuti, ‘Ŵadada ŵali na ŵanchito ŵanandi awo ŵakuzara na cingwa, apo ine kuno nkhufwa na njara! Niwukenge na kuluta ku ŵadada ndipo namuti kwa iwo: “Ŵadada, nanangira kucanya na imwe wuwo. Niliso wakwenelera cara kucemeka mwana winu. Munizgore nga njumoza wa ŵanchito ŵinu.”’ Ntheura wakawuka na kuluta ku ŵawiske.”

Apa pali cinthu cinyake ico tikwenera kughanaghanira: Dada yura waŵenge kuti wakamukalipira mwana uyu apo wakafumangapo pa nyumba, mphanyi wanguŵavya cifukwa cakuti wawelere kukwake. Mphanyi waghanaghana kuwerako na kusanga nchito ku malo ghanyake mu caru cakwake mwakuti waleke kukumana na ŵawiske. Ndipouli, walije maghanoghano agha mu mtima wake. Iyo wakukhumba kuwelera ku nyumba mbwenu!

Nchakuwonekerathu kuti dada wa mu ntharika ya Yesu wakwimira Yehova Ciuta, Dada withu wakucanya uyo ngwacitemwa, na wacisungusungu. Ndipo panyake mukumanya kuti mwana wakuzgeŵa wakwimira ŵanthu awo ŵakumanyikwa kuti mbakwananga. Ŵafarisi awo Yesu wakuyowoya nawo, ŵali kumususkapo kale cifukwa ca kurya pamoza na ŵanthu aŵa. Kweni kasi mwana mulara wakwimira njani?

Mwana Wakuzgeŵa Wati Wasangika

Mwana wakuzgeŵa mu ntharika ya Yesu wati wawelera ku nyumba ya ŵawiske, kasi ŵakumupokelera wuli? Pulikizgani apo Yesu wakulongosora, wakuti:

“Apo wakaŵa patali, ŵawiske ŵakamuwona ndipo citima cikaŵakora, ndipo ŵakacimbira na kumuwira mu singo na kumufyofyontha mwacitemwa.” Dada uyu ngwacisungusungu na wa mtima uwemi, ndipo wakwimira nadi Yehova, Dada withu wakucanya.

Dada uyu wakwenera kuti wali kupulika za makhaliro ghaheni gha mwana wake. Kweni wakumupokelera ku nyumba kwambura kulindizga kuti walongosore dankha kalikose. Yesu nayo ndimo wakucitira, ndipo wakwamba ndiyo kufikira ŵakwananga na ŵakusonkheska msonkho, awo mu ntharika iyi ŵakuyana waka na mwana wakuzgeŵa.

Nadi, tikukayika yayi kuti dada waumanyi wa mu ntharika ya Yesu wakuwona kuti mwana wake wapera pakuwona kuti apo wakwiza cisko cake nchacitima ndiposo cakuwa. Kweni ivyo dada uyu wakucita vikovwira kuti ciŵe cipusu ku mwana kuzomera zakwananga zake, nga umo Yesu wakulongosolera kuti: “Penepapo mwana yura wakati kwa iwo, ‘Ŵadada, nanangira kucanya na imwe wuwo. Niliso wakwenelera cara kucemeka mwana winu. Munizgore nga njumoza wa ŵanchito ŵinu.’”

Kweni mwana wacali wandamare kuyowoya, ŵawiske ŵakucitapo kanthu, ŵakulangura ŵazga ŵawo kuti: “Luŵiro! torani munjilira, uwemi comene, ndipo mumuvwalike, ndiposo muvwalikani mphete pa woko lake na vilyato ku malundi ghake. Ndipo mutore kankhambako kakututuŵa, mukome ndipo tirye na kusangwa, cifukwa mwana wane uyu, wakaŵa wakufwa ndipo waŵaso wamoyo; wakazgeŵa ndipo wasangika.” Ndipo ŵakwamba “kusangwa.”

Apo ivi vikucitika, “mwana mulara wakaŵa ku munda.” Wonani usange mungamanya awo mwana uyu wakwimira apo mukulutilira kupulikizga nkhani iyi. Pakuyowoya za mwana mulara, Yesu wakuti: “Apo wakizanga na kusendelera ku nyumba wakapulika sumu na kuvina. Ntheura wakacema yumoza wa ŵateŵeti na kufumba ico cikacitikanga. Muteŵeti wakati kwa iyo, ‘Munung’una winu wiza, ndipo ŵawiskemwe ŵakoma kankhambako kakututuŵa, cifukwa ŵamupokelera wali makora waka.’ Kweni wakatukutwa ndipo wakakhumba cara kunjiramo. Penepapo ŵawiske ŵakafuma na kwamba kumuŵeyelera. Pakuzgora wakati ku ŵawiske, ‘Wonani! vilimika vinandi comene nateŵetera nga ni muzga winu ndipo nindaswepo dango linu, ndipouli, nanga nkhamoza pera mundanipepo kanambuzi kuti nisangwe pamoza na ŵabwezi ŵane. Kweni wati wiza waka mwana winu uyu, mweneuyo wakarya ivyo mukaŵa navyo pamoza na ŵanakazi ŵazaghali, mwamukomera kankhambako kakututuŵa.’”

Kasi mbanjani awo, nga ni mwana mulara, ŵakususka cisungusungu ico cikulongoreka ku ŵakwananga? Asi mbalembi na Ŵafarisi? Pakuti Yesu wakuyowoya ntharika iyi cifukwa cakuti ŵakumususka kuti wakupokelera ŵakwananga, ndiwo nadi ŵakuyana na mwana mulara.

Yesu wakumalizga nkhani yake na mazgu agho dada wakuŵeyelera mwana wake mulara kuti: “Wamwana, nyengo zose waŵa pamoza nane, ndipo vinthu vyose ivyo ni vyane ni vyako; kweni tikwenera kusangwa na kusekelera, cifukwa munung’una wako uyu wakaŵa wakufwa ndipo waŵaso wamoyo, kweniso wakazgeŵa ndipo wasangika.”

Ntheura Yesu wakulongosora yayi ivyo mwana mulara wakucita paumaliro. Nadi, pamanyuma, Yesu wati wafwa na kuwuka, “mzinda wa ŵasofi ukamba kuŵa wakupulikira ku cipulikano,” panji ŵanji ŵa iwo ŵakaŵa mu gulu la “mwana mulara” awo Yesu wakuyowoya nawo apa.

Kweni mbanjani lero awo ŵakuyana na ŵana ŵaŵiri aŵa? Ni awo ŵamanya vinandi vyakukhwaskana na khumbo la Yehova kuti ŵaŵe nayo paubwezi. Mwana mulara wakwimira ŵanji ŵa “kamskambo kacoko,” panji kuti “mpingo wa mwana wakwamba kubabika wa awo ŵalembeka mu macanya.” Aŵa ŵakaŵa na mtima nga wa mwana mulara yura. Ŵakakhumba cara kupokelera gulu la pa caru capasi, la “mberere zinyake,” izo ŵakawonanga kuti Ciuta wakuzitemwera comene.

Kweni mwana wakuzgeŵa wakwimira ŵanthu ŵa Ciuta awo ŵakufuma mu gulu na kuluta kukasangwa na vyakukondweska vya caru. Ndipouli, para nyengo yajumphapo, ŵakupera na kuwelera ndipo ŵakwambaso kulimbikira kuteŵetera Ciuta. Nadi, Dada withu ngwacitemwa na wacisungusungu ku awo ŵakumanya kuti ŵakukhumbikwira cigowokero na kuwelera kwa iyo! Luka 15:11-32; Leviticus 11:7, 8; Milimo 6:7; Luka 12:32; Ŵahebere 12:23; Yohane 10:16.

▪ Kasi Yesu wakuyowoya kwa njani ntharika iyi, panji kuti nkhani, ndipo cifukwa wuli?

▪ Kasi ni njani uyo wakuzunulika comene mu nkhani iyi, ndipo nchivici cikumucitikira?

▪ Kasi dada na mwana mucoko ŵakwimira njani mu nyengo ya Yesu?

▪ Kasi Yesu wakutolera wuli mtima walusungu wa dada wa mu ntharika yake?

▪ Kasi mwana mulara wakucita wuli pakuwona kuti munung’una wake wapokelereka makora, ndipo Ŵafarisi ŵakucita wuli mwakuyana na mwana mulara uyu?

▪ Kasi ŵanthu ŵa mu ntharika ya Yesu ŵakwimira anjani mazuŵa ghano?