Cipaturo 107

Ntharika ya Ciphikiro ca Nthengwa

KWIZIRA mu ntharika ziŵiri, Yesu wavumbura uheni wa ŵalembi na ŵalara ŵa ŵasofi, ndipo ŵakukhumba kumukoma. Kweni Yesu wakulekera penepapa yayi. Wakuŵaphalira ntharika yinyake, wakuti:

“Ufumu wa kucanya ukulinganizgika na munthu, themba, ilo likamunozgera ciphikiro ca nthengwa mwana wake. Ndipo likatuma ŵazga ŵake kukacema awo ŵakacemeka ku ciphikiro ca nthengwa, kweni ŵakakhumba cara kwiza.”

Yehova Ciuta ndiyo ni Themba ilo likunozgera Mwana wake, Yesu Khristu, ciphikiro ca nthengwa. Paumaliro, gulu la mwali la ŵalondezgi ŵakuphakazgika ŵa 144,000 ndilo lamuŵa lumoza na Yesu kucanya. Ŵanthu ŵa Themba ili Mbaisrayeli, awo pakutolekera mu phangano la Dango mu 1513 B.C.E., ŵakapika mwaŵi kuti ŵaŵe “ufumu wa ŵasofi.” Pa nyengo iyo, ndiwo ŵakadankha kupokera nchemo ya ciphikiro ca nthengwa.

Ndipouli, nchemo yakwamba ya ŵakucemeka yikacitika yayi mpaka mu 29 C.E., apo Yesu na ŵasambiri ŵake (ŵazga ŵa themba) ŵakamba mulimo wawo wa kupharazga Ufumu. Kweni Ŵaisrayeli awo ŵakapokera nchemo iyi kufuma ku ŵazga mu 29 C.E. mpaka mu 33 C.E., ŵakakhumba cara kwiza. Ntheura Ciuta wakawupa mwaŵi unyake mtundu wakucemeka uwu, nga umo Yesu wakuyowoyera kuti:

“Likatumaso ŵazga ŵanyake, likati, ‘Phalirani ŵakucemeka kuti: “Wonani! Nanozga cakurya ca muhanya, nkhambako zane na nyama zakututuŵa zakomeka, ndipo vinthu vyose vyanozgeka. Zaninge ku ciphikiro ca nthengwa.”’” Nchemo yaciŵiri na yaumaliro iyi, yikamba pa Pentekoste mu 33 C.E., apo mzimu utuŵa ukapungulika pa ŵalondezgi ŵa Yesu. Nchemo iyi yikalutilira mpaka mu 36 C.E.

Ndipouli, wumba ukuru wa Ŵaisrayeli ukaŵikako mahara yayi ku nchemo iyi. Yesu wakuti: “Kwambura kuŵikako mahara ŵakaluta, munyake ku munda wake, munyake ku malonda ghake; kweni ŵanyake wose, ŵakakora ŵazga ŵake, ŵakaŵacitira msinjiro na kuŵakoma.” Yesu wakulutilira kuti: “Kweni themba likatukutwa comene, ndipo likatuma ŵankhondo ŵake ndipo ŵakaparanya ŵakukoma ŵanthu ŵara na kocha msumba wawo.” Ici cikacitika mu 70 C.E., apo Yerusalemu wakabwangandulika na Ŵaroma ndipo ŵakukoma ŵanthu ŵara ŵakakomeka.

Kufuma apo, Yesu wakulongosora ivyo vikucitika pa nyengo iyi, wakuti: “Penepapo [themba] likati ku ŵazga ŵake, ‘Ciphikiro ca nthengwa canozgeka nadi, kweni awo ŵakacemeka ŵakaŵa ŵambura kwenelera. Ntheura, lutani mu misewu yakufumira kuwaro kwa msumba, ndipo waliyose uyo mwamumusanga mukamucemere ku ciphikiro ca nthengwa.’” Ŵazga ŵakucita ici, ndipo “cipinda cakucitiramo ukwati cikazura na awo ŵakakhala pa thebulu.”

Mulimo uwu wa kuwunganya ŵalendo ŵa mu nthowa zakuwaro kwa msumba wa ŵakucemeka ukamba mu 36 C.E. Mulongozgi wa kagulu ka ŵasilikari ŵa Romu Koroneliyo na mbumba yake ŵakaŵa ŵanthu ŵakwamba pa ŵanthu ŵambura kukotoleka awo ŵakawunganyika. Nchito ya kuwunganya ŵanthu ŵa mitundu yinyake aŵa, ŵeneawo ŵakunjira mu malo gha awo ŵakakana kupulikira nchemo, yikulutilira mpaka mu nyengo yithu yino.

Cipinda cakucitiramo ukwati cikuzura mu nyengo yithu yino. Yesu wakulongosora ivyo vikucitika pa nyengo iyi, wakuti: “Themba likati lanjira kuzakendera ŵalendo, likawonamo munthu wambura kuvwara laya la nthengwa. Ntheura likati kwa iyo, ‘Nganya, wanjira wuli muno kwambura kuvwara laya la nthengwa?’ Iyo wakasoŵa cakuyowoya. Penepapo themba likati ku ŵateŵeti ŵake, ‘Mukakani mawoko na malundi ndipo mumuponye kuwaro ku cisi. Kwenekura ndiko kuzamuŵa kulira na kuska mino ghake.’”

Munthu uyo walije laya la nthengwa wakwimira Ŵakhristu zina pera. Aŵa, Ciuta wakuŵapima kuŵa ŵambura kwenelera kucemeka Ŵaisrayeli ŵauzimu. Ciuta wandaŵaphakazge na mzimu utuŵa kuŵa ŵahaliri ŵa Ufumu. Ntheura ŵakuponyeka kuwaro ku cisi uko ŵazamuparanyika.

Pakumalizga ntharika yake, Yesu wakuyowoya kuti: “Pakuti pali ŵanandi ŵakucemeka, kweni ŵacoko ŵakusoleka.” Enya, pakaŵa ŵanandi awo ŵakacemeka ku mtundu wa Israyeli kuti ŵaŵe mu gulu la mwali wa Khristu, kweni Mbaisrayeli ŵacoko waka awo ŵakasoleka. Ŵalendo ŵanandi ŵa gulu la 144,000 awo ŵakupokera njombe yakucanya, mbanthu awo Mbaisrayeli yayi. Mateyu 22:1-14; Exodus 19:1-6; Uvumbuzi 14:1-3.

▪ Kasi mbanjani awo ŵakamba kucemeka ku ciphikiro ca nthengwa, ndipo mphawuli apo ŵakapika nchemo iyi?

▪ Mphawuli apo nchemo yikamba kupelekeka ku ŵakucemeka, ndipo ŵazga awo ŵakupeleka nchemo iyi mbanjani?

▪ Kasi nchemo yaciŵiri yikupelekeka pawuli, ndipo kufuma apo mbanjani ŵakucemeka?

▪ Kasi munthu uyo walije laya la nthengwa wakwimira njani?

▪ Kasi ŵanandi awo ŵakucemeka mbanjani, ndipo ŵacoko awo ŵakusoleka mbanjani?