Cipaturo 100

Ntharika ya Mamina

PANJI Yesu wacali pa nyumba ya Zakeyu, apo wakupumura pa ulendo wakuya ku Yerusalemu. Ŵasambiri ŵake ŵakugomezga kuti para wakafika mu Yerusalemu, wamupharazga kuti ni Mesiya ndipo wamwimika Ufumu wake. Kuti waŵawovwire pa fundo iyi ndiposo kuti walongore kuti Ufumu ucali kutali, Yesu wakuyowoya ntharika.

Wakulongosora kuti: “Munthu yunji wakuzirwa wakaŵa pafupi kuluta ku caru cakutali kuti wakajisangire mazaza gha kuwusa na kuwerako.” Yesu ndiyo ni ‘munthu wakuzirwa,’ ndipo “caru cakutali” nkhucanya. Para Yesu wakafika kura, Adada ŵake ŵamumupa mazaza gha kuwusa.

Ndipouli, pambere wandanyamuke, munthu wakuzirwa uyu wakucema ŵazga khumi ndipo waliyose wakumupa mina yasiliva, wakuti: “Citani malonda mpaka nize.” Pakufiskika kwakwamba kwa ntharika iyi, ŵazga khumi ŵakwimira ŵasambiri ŵakwambilira ŵa Yesu. Kweniso ŵakwimira wose awo ŵazamuŵa ŵahaliri pamoza na iyo mu Ufumu wakucanya.

Mamina ghasiliva ni ndalama zakuzirwa comene, mina yimoza yikuyana na malipiro gha myezi yitatu ya uyo wakucita ganyu wa kulima. Kweni kasi mamina ghakwimira vici? Ndipo kasi ni mtundu wuli wa malonda uwo ŵazga ŵakwenera kucita na ndalama izi?

Mamina ghakwimira katundu uyo ŵasambiri ŵakuphakazgika na mzimu ŵangagwiliskira nchito pa kupanga ŵahaliri ŵanandi ŵa Ufumu wakucanya mpaka Yesu wize pakuŵa Themba la Ufumu wakulayizgika. Yesu wakati wawuka ku ŵakufwa na kuwonekera ku ŵasambiri ŵake, wakaŵapa mamina ghakuyelezgera kuti ŵazgore ŵanandi kuŵa ŵasambiri, mwakuti gulu la Ufumu wa kucanya lisazgikireko.

Yesu wakulutilira kuti: “Kweni ŵenekaya ŵanyake ŵakamutinkha ndipo ŵakatuma ciwuru ca ŵimiliri pamanyuma pake, kukayowoya kuti, ‘Tikukhumba cara kuti munthu uyu waŵe themba pa ise.’” Ŵenekaya aŵa Mbaisrayeli, panji kuti Ŵayuda, kwambura kusazgako ŵasambiri ŵake. Yesu wati wakwera kucanya, Ŵayuda aŵa ŵakalongora kuti ŵakukhumba yayi kuti iyo waŵe themba lawo, ŵakatambuzga ŵasambiri ŵake. Ntheura ŵakaŵa nga mbenekaya awo ŵakatuma ciwuru ca ŵimiliri.

Kasi ŵazga khumi ŵakucita wuli na mamina ghawo? Yesu wakulongosora kuti: “Paumaliro wakati wawerako, wati wasanga mazaza gha kuwusa, wakalangura kuti ŵacemekere kwa iyo ŵazga aŵa, ŵeneawo wakaŵapa ndalama zasiliva, mwakuti wawone izo ŵandulirapo mwa kucita malonda. Penepapo wakwamba wakafika, wakati, ‘Fumu, mina yinu yandula mamina khumi.’ Ntheura wakati kwa iyo, ‘Wacita makora, muzga muwemi! Cifukwa cakuti mu kanthu kacoko comene wajilongora kuŵa wakugomezgeka, uŵe na mazaza pa misumba khumi.’ Sono waciŵiri wakiza, wakati, ‘Mina yinu, Fumu, yapanga mamina ghankhondi.’ Wakayowoyaso kwa uyu kuti, ‘Iwe nawe, uŵe mulaŵiliri wa misumba yinkhondi.’”

Muzga uyo wali na mamina khumi wakwimira gulu la ŵasambiri kufuma pa Pentekoste 33 C.E. mpaka sono, ndipo ŵapositole nawo ŵali mu gulu ili. Muzga uyo wakasangirapo mamina ghankhondi nayo wakwimira gulu la mu nyengo yakuyana waka, ilo likusazgirapo katundu wa themba pa caru capasi mwakuyana na mpata ndiposo nkhongono zake. Magulu ghose ghaŵiri ghakupharazga makani ghawemi mwamwamphu, ndipo pa cifukwa ici, ŵanthu ŵanandi ŵa mitima yiwemi ŵakuzgoka Ŵakhristu. Ŵazga ŵankhondi na ŵanayi ŵakacita makora malonda ndipo ŵakasazgirapo ivyo ŵakapika.

Yesu wakulutilira kuti: “Kweni munyake wakiza, wakati, ‘Fumu, enani mina yinu iyi, yeneiyo nkhasunga mu salu. Mwawona, nkhopanga imwe, cifukwa ndimwe munthu munonono; mukutora ico mukasunga cara ndipo mukuvuna ico mukaseŵa cara.’ Wakati kwa iyo, ‘Nkhukweruzga na ivyo vikufuma mu mulomo wako, muzga muheni iwe. Asi ukamanya kuti ndine munthu munonono, nkhutora ico nkhasunga cara na kuvuna ico nkhaseŵa cara? Ntheura ukalekeraci kuŵika ndalama yane yasiliva ku wakusunga ndalama? Ndipo pakwiza mphanyi nayitora pamoza na yapacanya.’ “Pa ici wakati ku awo ŵakimilira pafupi, ‘Torani mina kwa iyo ndipo mupeleke kwa uyo wali na mamina khumi.’”

Kupokeka mina kwa muzga muheni uyu, nkhutaya malo mu Ufumu wakucanya. Enya, vili nga ni para wakutaya mwaŵi wa kuwusa misumba khumi panji misumba yinkhondi. Wonaniso kuti muzga uyu wakucemeka kuti muheni cifukwa cakuti wacita ubudi uliwose yayi, kweni cifukwa ca kutondeka kugwira nchito kuti wasazgireko cuma ca ufumu wa fumu yake.

Apo mina ya muzga muheni yikupelekeka kwa muzga wakwamba, ŵanji ŵakuti: “Fumu, wali na mamina khumi!” Kweni Yesu wakuzgora kuti: “Yose uyo wali navyo, vinandi vipikenge kwa iyo; kweni uyo walije, nanga ni ico wali naco cizamutoleka kwa iyo. Kweniso ŵalwani ŵane aŵa, ŵeneawo ŵakakhumbanga cara kuti ine niŵe themba pa iwo, zani nawo kuno ndipo muŵakomere panthazi pane.” Luka 19:11-27; Mateyu 28:19, 20.

▪ Cifukwa wuli Yesu wakuyowoya ntharika ya mamina?

▪ Kasi munthu wakuzirwa ni njani, ndipo caru ico wakulutako ni vici?

▪ Kasi ŵazga mbanjani, ndipo mamina ghakwimira vici?

▪ Kasi ŵenekaya mbanjani, ndipo ŵakulongora wuli thinkho lawo?

▪ Cifukwa wuli muzga yumoza wakucemeka muheni, ndipo kupokeka mina yake cikung’anamuraci?