Cipaturo 66

Pa Ciphikiro ca Mahema

YESU wamanyikwa comene mu vilimika vitatu ivi kufuma apo wakabapatizikira. Ŵanthu vikwi vinandi ŵali kuwona minthondwe iyo wakucita ndipo milimo yake yamanyikwa mu caru cose. Sono, apo ŵanthu ŵakuwungana pa Ciphikiro ca Mahema mu Yerusalemu, ŵakumupenjapenja kwenekura. Ŵakufumbana kuti: “Wali nkhu munthu yura?”

Nkhani iyo yili mu milomo ya ŵanthu nja Yesu. Ŵanji ŵakuti: “Ni munthu muwemi.” Ŵanji ŵakuti: “Ni muwemi cara, kweni wakupuluska mzinda.” Mu mazuŵa ghakwambilira gha ciphikiro, pa malo agha pali mahumuhumu gha mtundu uwu ghanandi. Kweni palije uyo wali na cikanga kulumba Yesu pakweru. Ici nchifukwa cakuti ŵanthu ŵakopa kuti ŵalongozgi ŵa Ŵayuda ŵangaŵakalipira.

Peneapo ciphikiro cili pakatikati, Yesu wakufika. Wakwiza mu tempele, mweneumo ŵanthu ŵakuzukuma na luso lwake pakusambizga. Pakuti Yesu wandayeko ku sukulu za Ŵarabi, Ŵayuda ŵakuzizwa kuti: “Kasi munthu uyu wakumanya wuli malembo, uku wandasambire sukulu?”

Yesu wakulongosora kuti: “Ivyo nkhusambizga ni vyane cara, kweni vya uyo wakanituma. Usange munthu wakukhumba kucita khumbo Lake, wamanyenge vya cisambizgo ici usange nchakufuma kwa Ciuta panji nkhuyowoya vya namwene.” Ivyo Yesu wakusambizga vikukolerana comene na dango la Ciuta. Ntheura nchakuwonekerathu kuti wakupenja ucindami wa Ciuta, wake yayi. Yesu wakufumba kuti: “Asi Mozesi wakamupani Dango?” Ndipo wakuŵacenya, wakuti: “Palije nanga njumoza wa imwe uyo wakupulikira Dango ili.”

Yesu wakufumbaso kuti: “Cifukwa wuli mukukhumba kunikoma?”

Ŵanthu ŵanyake mu mzinda awo mbalendo ku ciphikiro ici ŵakwenera kuti ŵakumanya cara kuti ndivyo viliko. Ŵakuwona kuti nchambura kupulikikwa kuti munthu munyake wangakhumba kukoma msambizgi muwemi nga ni uyu. Ntheura ŵakughanaghana kuti panji Yesu mutu ukwenda makora cara, lekani wakuyowoya nthena. Ndipo ŵakuti: “Uli na ciŵanda. Ni njani wakukhumba kukukoma?”

Ŵalongozgi ŵa Ŵayuda ŵakukhumba kuti Yesu wakomeke, nangauli mzinda ungaŵa kuti ukumanya cara. Cilimika cimoza na hafu ico cajumpha, apo Yesu wakacizga munthu pa Sabata, ŵalongozgi aŵa ŵakakhumba kumukoma. Ntheura Yesu wakuvumbura kuti ŵalije vinjeru, wakuŵafumba kuti: “Usange munthu wakupokera ukotoli pa sabata mwakuti dango la Mozesi lileke kusweka, kasi mukunikalipira cifukwa cakuti nkhacizga munthu makoraghene pa sabata? Lekani kweruzga mwakuyana na mawonekero gha kuwaro, kweni yeruzgani na ceruzgo caurunji.”

Ŵanthu awo ŵakukhala mu Yerusalemu, awo ŵakuyimanya nkhani iyi, sono ŵakuti: “Asi uyu ndiyo munthu uyo ŵakukhumba kumukoma? Kweni wonani! wakuyowoya pakweru, ndipo ŵakuyowoya kanthu cara kwa iyo. Panyake kasi ŵawusi ŵacali ŵandamanye makora kuti uyu ni Khristu?” Ŵanthu ŵa mu Yerusalemu aŵa ŵakulongosora cifukwa ico ŵakulekera kugomezga kuti Yesu ni Khristu, ŵakuti: “Ise tikumanya uko wakufuma munthu uyu; kweni para Khristu wakwiza, palije uyo wazamumanya uko wafuma.”

Yesu wakuzgora kuti: “Imwe mukunimanya ndiposo mukumanya na uko nkhufuma wuwo. Kweniso, kuti nkhiza mwa ine nekha cara, kweni uyo wakanituma ngwanadi, ndipo imwe mukumumanya cara. Ine nkhumumanya, cifukwa ndine mwimiliri wakufuma kwa iyo, ndipo Iyo yura wakanituma.” Wati wayowoya nthena ŵakukhumba kumukora, panji kuti ŵamuponye mu jele, panji kuti wakomeke. Kweni vikuŵatonda cifukwa nyengo yakuti Yesu wafwe yindafike.

Ŵanthu ŵanandi ŵakulutilira kupulikana mwa Yesu nga umo ŵakwenera kucitira. Vili nthena cifukwa cakuti wali kwendapo pa maji, kulekeska cimphupulu, kucetamiska nyanja, kulyeska ŵanthu vikwi vinandi mwamunthondwe na vingwa vicoko waka na somba, kucitiska ŵakupendera kwenda, kujura maso gha ŵacibulumutira, kucizga ŵavyoni, na kuwuska ŵakufwa. Ntheura ŵakufumba kuti: “Usange Khristu wiza, kasi wazamucita vimanyikwiro vinandi kuluska ivyo wacita munthu uyu?”

Ŵafarisi ŵati ŵapulika kuti ŵanthu ŵakuphwepwerana vinthu ivi, iwo na ŵalara ŵa ŵasofi ŵakutuma ŵasilikari kuti ŵakakake Yesu. Yohane 7:11-32.

▪ Kasi Yesu wakufika pawuli ku ciphikiro, ndipo ŵanthu ŵakuti wuli za iyo?

▪ Cifukwa wuli ŵanji ŵakuti Yesu wali na ciŵanda?

▪ Kasi ŵanthu awo ŵakukhala mu Yerusalemu ŵakughanaghana wuli za Yesu?

▪ Cifukwa wuli ŵanthu ŵanandi ŵakupulikana mwa Yesu?