Cipaturo 121

Panthazi pa Sanihedirini, Kufuma Apo kwa Pilato

USIKU uli pafupi kumara. Petrosi wakana Yesu kacitatu, Sanihedirini yamara kweruzga Yesu ndipo yapatukana. Ndipouli, kwati kwaca mulenji pa Cinkhondi, ŵakuwunganaso, kweni sono ŵakuwungana mu nyumba yawo ya Sanihedirini. Panji cilato cawo nchakuti ŵaleke kumanyikwa kuti ŵeruzganga mulandu usiku. Yesu wati watolekera panthazi pawo, ŵakuyowoya nga umo ŵanguyowoyera usiku kuti: “Usange ndiwe Khristu, utiphalire.”

Yesu wakuzgora kuti: “Nanga nimuphalirani, mungagomezga cara. Kweniso usange ningamufumbani, mungazgora cara.” Ndipouli, Yesu wakujiphara mwacikanga, wakuti: “Kufuma sono Mwana wa munthu wakhalenge ku woko lamalyero lankhongono la Ciuta.”

Wose ŵakumufumba kuti: “Ipo kasi ndiwe Mwana wa Ciuta?”

Yesu wakuzgora kuti: “Imwe mwaŵene mukuyowoya kuti ndine.”

Cifukwa cakuti ŵanthu aŵa ŵakukhumba kuti ŵamukome, zgoro ili ndakukwana. Iwo ŵakuwona kuti ni muyuyuro. Ŵakufumba kuti: “Tikukhumbiraci ukaboni unyakeso? Pakuti tajipulikira taŵene kufuma mu mulomo wake.” Ntheura ŵakumukaka Yesu, ndipo ŵakumutora na kuluta nayo kwa kazembe Waciroma Pontiyo Pilato.

Yudasi, uyo wapeleka Yesu, wawoneleranga vyose ivyo vyacitika. Wati wawona kuti Yesu weruzgika, citima camukora. Ntheura wakuluta ku ŵalara ŵa ŵasofi na ŵanalume ŵalara kuti wakawezge ndalama zasiliva 30, wakulongosora kuti: “Nili kunanga kupeleka ndopa zambura mulandu.”

Iwo ŵakumuzgora kuti: “Ici cili na kanthu wuli kwa ise? Ujiwonere wekha!” Ntheura Yudasi wakutaya ndalama zasiliva mu tempele na kufuma kuti wakajikake. Ndipouli, vikuwoneka kuti munthavi uwo Yudasi wakukakako cingwe ukuphyoka, ndipo wakujimbecura pa malibwe, na kuphumuka.

Ŵalara ŵa ŵasofi ŵakumanya yayi ico ŵangacita nagho masiliva agha. Ŵakudumura kuti: “Nchakuzomerezgeka cara kughaponya mu malo ghakupatulika ghakusungiramo vyuma, cifukwa ni ndalama za ndopa.” Ntheura ŵati ŵadumbirana, ndalama izi ŵakugulira munda wa muwuvi kuti ŵasungengepo ŵalendo. Ntheura munda uwu ukucemeka “Munda wa Ndopa.”

Kucali mulenjilenji apo Yesu wakutolekera ku nyumba ya kazembe. Kweni Ŵayuda awo ŵakumupelekezga ŵakukana kunjira cifukwa ŵakugomezga kuti ŵangafipirwa usange ŵanganjira mu nyumba ya munthu wa mtundu unyake. Ntheura Pilato wakufumira pawaro. Iyo wakufumba kuti: “Kasi ni mulandu wuli uwo mwiza nawo kwimikana na munthu uyu?”

Iwo ŵakuzgora kuti: “Munthu uyu waŵenge wambura kubuda, mphanyi tamupeleka kwa imwe cara.”

Pakuti wakukhumba yayi kunjilirapo, Pilato wakuti: “Mutorani mwaŵene na kumweruzga mwakuyana na dango linu.”

Ŵayuda ŵakuvumbura kuti cilato cawo nchakuti ŵamukome, apo ŵakuti: “Nchakuzomerezgeka cara kwa ise kukoma munthu.” Nadi, ŵakomenge Yesu pa Ciphikiro ca Paska, mphanyi panguŵa civulupi, pakuti ŵanthu ŵanandi ŵakumucindika Yesu. Kweni usange ŵangacitiska Ŵaroma kuti ŵamukome pa vifukwa vya ndyali, ŵanthu ŵawonenge nga kuti iwo mbambura mulandu.

Ntheura ŵalongozgi ŵa cisopa, kwambura kuyowoya kuti ŵamweruzga kale Yesu ndipo ŵamusanga na mulandu wa muyuyuro, sono ŵakwata milandu yinyake. Iwo ŵakumutundura pa vifukwa vitatu, ŵakuti: “Munthu uyu tamusanga kuti [1] wakupatuska mtundu withu na [2] kukanizga kupeleka misonkho kwa Kesare ndipo [3] wakuti iyomwene ni Khristu themba.”

Pilato wakufipa mtima na nkhani yakuti Yesu wakujicema kuti ni themba. Ntheura wakunjiraso mu nyumba, wakucema Yesu na kumufumba kuti: “Kasi ndiwe themba la Ŵayuda?” Fumbo ili likung’anamuraso kuti, kasi waswa dango mwa kujicema themba kususkana na Kesare?

Yesu wakukhumba kumanya ivyo Pilato wapulika kale vya iyo, ntheura wakufumba kuti: “Kasi ukuyowoya ici mwa wamwene, panji ŵanji ŵakuphalira vya ine?”

Pilato wakukana kuti wakumumanya ndipo wakukhumba kumanya vinandi. Wakuzgora kuti: “Kasi ine nili Muyuda? Mtundu wako na ŵalara ŵa ŵasofi ndiwo ŵakupeleka iwe kwa ine. Kasi wacitaci?”

Yesu wakukhumba yayi kugwentha nkhani iyo yilipo, yakukhwaskana na ufumu. Tikukayika yayi kuti Pilato wakuzizwa na zgoro ilo Yesu wakuzgora. Luka 22:66–23:3; Mateyu 27:1-11; Mariko 15:1; Yohane 18:28-35; Milimo 1:16-20.

▪ Kasi Sanihedirini yikuwunganaso mulenji na cilato wuli?

▪ Kasi Yudasi wakufwa wuli, ndipo ndalama zasiliva 30 ŵakucita nazo vici?

▪ Cifukwa wuli Ŵayuda ŵakukhumba kuti Ŵaroma ndiwo ŵamukome Yesu, m’malo mwa kumukoma ŵekha?

▪ Kasi Ŵayuda ŵakumupa milandu wuli Yesu?