Cipaturo 93

Para Mwana wa Munthu Wavumbukwa

YESU wacali kumpoto (mu Samariya panji mu Galileya), Ŵafarisi ŵakumufumba za kwiza kwa Ufumu. Iwo ŵakugomezga kuti wizenge na kujilongora kukuru, kweni Yesu wakuti: “Ufumu wa Ciuta wizenge mwakuwonekera ku wose cara, nesi ŵanthu ŵazamuyowoyapo cara kuti, ‘Wonani kuno!’ panji ‘Kura!’ Pakuti wonani! ufumu wa Ciuta uli pakati pinu.”

Mu Mabaibolo ghanyake mazgu gha Yesu ghakuti “pakati pinu,” ghali kung’anamurika kuti “mukati mwinu.” Ntheura ŵanji ŵakughanaghana kuti Yesu wakang’anamuranga kuti Ufumu wa Ciuta ukuwusa mu mitima ya ŵateŵeti ŵa Ciuta. Kweni nchakuwonekerathu kuti Ufumu wa Ciuta ungaŵa mu mitima ya Ŵafarisi ŵambura kugomezga aŵa yayi, ŵeneawo Yesu wakuyowoya nawo. Kweni uli pakati pawo, cifukwa cakuti Yesu Khristu uyo ni Themba lakusolekerathu la Ufumu wa Ciuta wali pakati pawo.

Panji Yesu wakulutilira kuyowoya na ŵasambiri ŵake vya Ufumu wa Ciuta, Ŵafarisi ŵati ŵafumapo. Wakughanaghanira za kuŵapo kwake munthazi mu nkhongono za Ufumu, apo wakucenjezga kuti: “Ŵanthu ŵazamuti kwa imwe, ‘Wonani kura!’ panji ‘Wonani kuno!’ Kuyako cara panji kuŵalondezga [ŵa Mesiya ŵatesi aŵa]. Pakuti nga ni umo leza, na kumwetuka kwake, wakuŵalira kufuma ku cigaŵa cimoza pasi pa mtambo mpaka ku cigaŵa cinyake pasi pa mtambo, ntheura ndimo wazamuŵira Mwana wa munthu.” Ntheura Yesu wakulongora kuti nga umo leza wakuwonekera kutali, ukaboni wa kuŵapo kwake mu nkhongono za Ufumu uzamuwonekera ku wose awo ŵakukhumba kuwuwona.

Kufuma apo, Yesu wakuyowoya vyakucitika vya mu nyengo yakale, kulongora umo ŵanthu ŵazamuŵira mu nyengo ya kuŵapo kwake munthazi. Wakulongosora kuti: “Nakuti nga ni umo vikacitikira mu mazuŵa gha Nowa, ntheura ndimo vizamuŵira mu mazuŵa gha Mwana wa munthu . . . Mwakuyana waka, nga ni umo vikacitikira mu mazuŵa gha Loti: ŵakaryanga, ŵakamwanga, ŵakagulanga, ŵakaguliskanga, ŵakapandanga, ŵakazenganga. Kweni pa zuŵa ilo Loti wakafumira mu Sodomu, kukalokwa moto na sulefure kufuma kucanya na kuŵaparanya wose. Mwakuyana waka, ndimo kuzamuŵira pa zuŵa ilo, apo Mwana wa munthu wazamuvumbukwa.”

Apa, Yesu wakuyowoya kuti ŵanthu ŵa mu nyengo ya Nowa na Loti ŵakaparanyika cifukwa ca kurya, kumwa, kugura, kuguliska, kupanda mbuto, na kuzenga yayi. Nowa na Loti ndiposo mbumba zawo nawo ŵakacitanga vinthu ivi. Kweni ŵanji ŵakacitanga vinthu ivi kwambura kughanaghanira khumbo la Ciuta, lekani ŵakaparanyika. Cifukwa cenecici ici, ndico ŵanthu ŵazamuparanyikira apo Khristu wazamuvumbukwa pa suzgo yikuru iyo yizenge pa mgonezi uwu.

Pakulongora kuti nchakuzirwa kucitapo kanthu mwaluŵiro pakuwona ukaboni wa kuŵapo kwake kwa munthazi mu nkhongono za Ufumu, Yesu wakusazgirapo kuti: “Pa zuŵa ilo, munthu uyo wali pacanya pa nyumba kweni vinthu vyake vili mu nyumba wangakhiranga cara kuti wakavitore, ndipo munthu uyo wali ku munda, nayo wangaweleranga ku vinthu vyakumasinda cara. Kumbukani muwoli wa Loti.”

Para ukaboni wa kuŵapo kwa Khristu wawoneka, ŵanthu ŵangazomerezganga yayi kuti vinthu vyawo vyathupi viŵatondeske kucitapo kanthu mwaluŵiro. Pakufuma mu Sodomu, muwoli wa Loti wakalaŵiska kumasinda cifukwa mtima wake ukaŵa pa vinthu ivyo wakavileka, ndipo wakazgoka ciduli ca mcere.

Pakulutilira kulongosora umo vinthu vizamuŵira pa kuŵapo kwake, Yesu wakuphalira ŵasambiri ŵake kuti: “Mu usiku uwo, ŵanalume ŵaŵiri ŵazamuŵa mu bedi limoza; yumoza wazamutolekapo, kweni munyake wazamujowoleka. Pazamuŵa ŵanakazi ŵaŵiri ŵakusira pa lwara limoza; yumoza wazamutolekapo, kweni munyake wazamujowoleka.”

Kutolekapo kukuyana waka na umo Nowa na mbumba yake ŵakanjilira mu cingalaŵa ndiposo umo ŵangelo ŵakatolera Loti na mbumba yake kufuma mu Sodomu. Kutolekapo cikung’anamura kuponoskeka. Kweni kujowoleka cikung’anamura kuparanyika.

Wati wayowoya ivi, ŵasambiri ŵakufumba kuti: “Nkhu Fumu?”

Yesu wakuzgora kuti: “Uko kuli citanda, nombo zizamuwungana pamoza kwenekuko.” Awo ‘ŵakutolekapo’ kuti ŵaponoskeke ŵakuyana waka na nombo izo zikulaŵiska patali mu fundo yakuti ŵakuwungana ku “citanda.” Citanda cikwimira Khristu mweneco pa nyengo ya kuŵapo kwake kwambura kuwoneka mu nkhongono za Ufumu ndiposo ciphikiro cauzimu ico Yehova wakupeleka. Luka 17:20-37; Genesis 19:26.

▪ Kasi Ufumu ukaŵa wuli pakati pa Ŵafarisi?

▪ Kasi kuŵapo kwa Khristu kukuyana wuli na leza?

▪ Cifukwa wuli ŵanthu ŵazamuparanyika mwakuyana na ivyo ŵakucita mu nyengo ya kuŵapo kwa Khristu?

▪ Kasi kutolekapo na kujowoleka vikung’anamuraci?