Cipaturo 112

Paska Laumaliro kwa Yesu Lili Pafupi

APO zuŵa la Ciŵiri, Nisani 11, lili pafupi kumara, Yesu wakumalizga kusambizga ŵapositole ŵake pa Lupiri lwa Maolive. Languŵa zuŵa la nthangwanika na lakuvuska comene. Sono, panji apo ŵakuwelera ku Betaniya kuti ŵakagone, Yesu wakuphalira ŵapositole ŵake kuti: “Mukumanya kuti mazuŵa ghaŵiri kufuma sono paska licitikenge, ndipo Mwana wa munthu wamupelekeka kuti wapayikike.”

Zuŵa lakulondezgapo la Citatu, Nisani 12, Yesu wakwenera kuti wakutandara kwayekha na ŵapositole ŵake. Mayiro ghake, wakacenya ŵalongozgi ŵa cisopa pa wumba, ndipo wakumanya kuti ŵakukhumba kumukoma. Ntheura pa Citatu, wakuwoneka pakweru yayi, pakuti wakukhumba yayi kuti cinthu cinyake cimutimbanizge kucita Paska pamoza na ŵapositole ŵake mise yakulondezgapo.

Pa nyengo yeneyiyi, ŵalara ŵa ŵasofi nawo na ŵanalume ŵalara ŵa ŵanthu ŵawungana mu mphara ya musofi mukuru, Kayafa. Pakukwiya na ivyo Yesu wakaŵayowoyera mayiro ghake, ŵakupangana kuti ŵamukore mwaucenjezi na kumukoma. Ndipouli, ŵakuyowoya kuti: “Pa ciphikiro cara, mwakuti paleke kuwuka civulupi pakati pa ŵanthu.” Iwo ŵakopa ŵanthu, ŵeneawo ŵakumutemwa Yesu.

Apo ŵalongozgi ŵa cisopa ŵali mukati mwa kupangana kuti ŵakome Yesu, ŵakupokelera mulendo. Ico cikuŵazizwiska nchakuti mulendo uyu njumoza wa ŵapositole ŵa Yesu, Yudasi Isikariyoti, mweneuyo Satana wapandamo maghanoghano ghakuti wendere mphiska Fumu yake. Ŵakukondwa comene apo Yudasi wakuŵafumba kuti: “Kasi munipenge vici kuti nimupeleke kwa imwe?” Mwakukondwa ŵakupangana nayo masiliva 30, mtengo wakugulira muzga mwakuyana na phangano la Dango la Mozesi. Kufuma apa, Yudasi wakupenja mpata uwemi kuti wapeleke Yesu kwa iwo kwambura mzinda pafupi.

Nisani 13 yikwamba pa Citatu para dazi lanjira. Yesu wakiza pa Cinkhondi kufuma ku Yeriko, ntheura ili ni zuŵa lacinkhondi na cimoza ndiposo laumaliro ilo wakukhala mu Betaniya. Zuŵa lakulondezgapo, la Cinayi, pakhumbikwirenge kumalizga kunozgekera Paska, ilo likwamba para dazi lanjira. Pa zuŵa ili mwanamberere wa Paska wakwenera kukomeka na kocheka wamusuma. Kasi ŵamucitira nkhu ciphikiro ici, ndipo ni njani wamunozga vyakukhumbikwira?

Yesu wandayowoyepo cilicose, panji kuti Yudasi waleke kukaphalira ŵalara ŵa ŵasofi mwakuti ŵamukore Yesu pa nyengo ya Paska. Kweni sono, panji pa Cinayi muhanya, Yesu wakutuma Petrosi na Yohane kufuma ku Betaniya, wakuti: “Lutani ndipo mukatinozgere paska kuti tirye.”

Iwo ŵakufumba kuti: “Kasi mukukhumba kuti tikamunozgerani nkhu?”

Yesu wakulongosora kuti: “Para mwanjira mu msumba, munthu uyo wayegha ciŵiya ca maji cadongo wamukumana namwe. Mukamulondezge mpaka mu nyumba iyo wamunjiramo. Ndipo mukayowoye kwa mweneco wa nyumba kuti, ‘Msambizgi wakuti kwa imwe: “Kasi cipinda ca ŵalendo cili nkhu umo nkhwenera kulyera paska pamoza na ŵasambiri ŵane?”’ Ndipo munthu yura wamumulongorani cipinda cikuru ca mucanya cakunozgeka. Mukanozge mwenemura.”

Tikukayika yayi kuti mweneco wa nyumba ni msambiri wa Yesu uyo panji wakulindilira kuti Yesu wamulombenge nyumba yake kuti wacitiremo cinthu capadera ici. Kwali ndimo viliri nadi panji yayi, kweni apo Petrosi na Yohane ŵakufika mu Yerusalemu, ŵakusanga kuti vinthu vyose vili nga umo Yesu wanguŵaphalilira. Ntheura ŵaŵiri aŵa ŵakuwoneseska kuti mwanamberere wanozgeka ndiposo kuti vinthu vinyake vyose vyacitika mwakuti ŵanthu 13, Yesu na ŵapositole ŵake 12, ŵarye makora Paska. Mateyu 26:1-5, 14-19; Mariko 14:1, 2, 10-16; Luka 22:1-13; Exodus 21:32.

▪ Kasi Yesu wakwenera kuti wakucita vici pa Citatu, ndipo cifukwa wuli?

▪ Kasi ni ungano wuli uwo ukucitikira mu nyumba ya musofi mukuru, ndipo Yudasi wapukwa vici ku ŵalongozgi ŵa cisopa?

▪ Kasi Yesu wakutuma njani ku Yerusalemu pa Cinayi, ndipo ŵamucita vici?

▪ Kasi awo ŵatumika ŵakusanga vici ico cikuvumbura kuti Yesu wali na nkhongono zakucitira minthondwe?