Cipaturo 120

Petrosi Wakukana Yesu

ŴATI ŵamusida Yesu mu munda wa Getisemane na kucimbira pamoza na ŵapositole ŵanyawo wose cifukwa ca wofi, Petrosi na Yohane ŵakwimilira. Panyake ŵakukumanaso na ŵanthu awo ŵakaka Yesu apo ŵakumutolera ku nyumba ya Anasi. Apo Anasi wakutuma Yesu kwa Musofi Mukuru, Kayafa, Petrosi na Yohane ŵakulondezga pataliko, panji ŵakopa kuti ŵangakomeka kweniso ŵakufipa mtima na ivyo vicitikirenge Fumu yawo.

Ŵati ŵafika pa nyumba ya Kayafa, Yohane wakunjira mu mphara, pakuti wakumanyikwa kwa musofi mukuru. Ndipouli, Petrosi wamuleka kuwaro pa mulyango. Kweni mwaluŵiro Yohane wakuwelera na kuyowoya na mulinda wa pa mulyango, muteŵeti mwanakazi, ndipo Petrosi wakuzomerezgeka kunjira.

Pasono kukuzizima, ndipo ŵateŵeti ŵa mu nyumba na ŵalinda ŵa musofi mukuru ŵapemba moto wa makara. Petrosi nayo wakwiza na kotha nawo uku wakulindilira umo vinthu vimalirenge. Cifukwa ca ungweru wa moto, mulinda wa pa mulyango uyo wangunjizga Petrosi mukati sono wakumuwoneseska. Iyo wakuti: “Iwe nawe ukaŵa pamoza na Yesu Mugalileya!”

Pakukwiya cifukwa cakuti ŵamumanya, Petrosi wakukana Yesu panthazi pa wose. Wakuti: “Nkhumumanya iyo cara nesi kupulikiska ico ukuyowoya.”

Pa ici, Petrosi wakufuma kuya kufupi na cipata. Kwenekura, msungwana munyake wakumumanyaso ndipo wakuphalira awo ŵimilira pafupi kuti: “Munthu uyu wakaŵa pamoza na Yesu Munazarete.” Kaciŵiri, Petrosi wakukana na kulapa wuwo, wakuti: “Nkhumumanya cara munthu uyu!”

Petrosi wacali mu mphara, wakuyezgayezga kuti waleke kuwonekera. Panyake pa nyengo iyi wakuciluka na kulira kwa tambala wakwamba. Nyengo iyi, Yesu wali mukati mu kweruzgika, ivi vikwenera kuti vikucitikira mu cipinda cinyake pacanya pa mphara. Tikukayika yayi kuti Petrosi na ŵanji awo ŵakulindilira musi ŵakuwona ŵakaboni ŵakupambanapambana ŵakwiza kupeleka ukaboni wawo na kuluta.

Pafupifupi ora limoza lajumphapo kufuma apo Petrosi wangumanyikwira kakwamba kuti wakendanga na Yesu. Sono ŵanandi awo ŵimilira pafupi ŵakwiza ndipo ŵakuti: “Nadi, iwe nawe uli yumoza wawo, nakuti nanga nkhayowoyero kako kakukukoleska.” Yumoza wa ŵanthu aŵa ni mbali wa Maliko, uyo Petrosi wangumuwunguzura khutu. Iyo wakuti: “Asi nangukuwona mu munda pamoza na iyo?”

Petrosi wakukana ciŵenjuŵenju, wakuti: “Nkhumumanya cara munthu uyu!” Nakuti pakukhumba kuŵakhorweska kuti ŵabudiska wakutemba na kulapa, wakuŵa nga wakuyowoya kuti ciheni cimuwire usange wakuteta.

Apo Petrosi wakukana kacitatu, tambala wakulira. Ndipo pa nyengo iyi, Yesu uyo wafuma mu cipinda capacanya na kuwonekera pa mphara, wakung’anamuka na kumulaŵiska. Penepapo, Petrosi wakukumbuka ivyo Yesu wanguyowoya maora ghacoko agho ghajumphapo mu cipinda camucanya, apo wanguti: “Pambere tambala wandalire kaŵiri, iwe apa, unikanenge katatu.” Pakuŵa na citima cifukwa ca ukuru wa kwananga kwake, Petrosi wakufumira kuwaro na kulira comene.

Kasi ivi vingacitika wuli? Kasi vingacitika wuli kuti Petrosi wakane Fumu yake katatu mwakulondezgana nthena, uku wangusimikizga kuti wali na nkhongono zauzimu? Tikukayika yayi kuti Petrosi wamanyanga yayi kuti ivi vingacitika. Unenesko watimbanizgika, ndipo Yesu wakuwoneka nga ni para nchigeŵenga. Ico nchiwemi caŵa nga nchiheni, munthu muwemi waŵa nga ni para ni muheni. Ntheura cifukwa ca umo vinthu viliri apa, Petrosi wahangayika. Mwaluŵiro, maghanoghano ghake ghawemi ghakuti waŵe wakugomezgeka ghakumara; sono wali na citima cifukwa ca kopa ŵanthu. Mphanyi taŵa maso kuti ivi vileke kuticitikira. Mateyu 26:57, 58, 69-75; Mariko 14:30, 53, 54, 66-72; Luka 22:54-62; Yohane 18:15-18, 25-27.

▪ Kasi Petrosi na Yohane ŵakunjira wuli mu mphara ya musofi mukuru?

▪ Apo Petrosi na Yohane ŵali mu mphara, kasi nchivici ico cikucitika mu nyumba?

▪ Kasi tambala wakulira kalinga, ndipo Petrosi wakumukana kalinga Khristu?

▪ Cifukwa wuli Petrosi wakutemba na kulapa?

▪ Nchivici ico cikupangiska kuti Petrosi wakane Yesu?