Cipaturo 40

Sambiro pa Nkhani ya Cisungusungu

YESU wakwenera kuti wacali ku Nayini, uko sonosono apa wakawuska mwana wa cokoro ku ŵakufwa, panji wakwendera msumba wa kufupi na Nayini. Mufarisi zina lake Simoni wakukhumba kumuwonera pafupi munthu uyo wakucita milimo yakuzizwiska iyi. Ntheura wakucema Yesu kuti wakarye nayo cakurya.

Pakuwona kuti uwu ni mwaŵi wakuti wakapharazgire ŵanji awo ŵamuŵapo, Yesu wakuzomera nchemo iyi, nga umo wakazomelera kukarya pamoza na ŵakusonkheska msonkho na ŵakwananga. Ndipouli, apo wakunjira mu nyumba ya Simoni, Yesu wakupokelereka mwakuyana na kaluso kawo yayi.

Para munthu wavwara vilyato malundi ghakocha ndipo ghakubinkha cifukwa ca kwenda mu nthowa za cuvu. Ndipo nkhaluso kugeziska malundi gha ŵalendo na maji ghakuzizima. Kweni apo Yesu wakufika, ŵakumugeziska yayi. Ndiposo ŵakumufyofyontha yayi pakumupokelera, kaluso ako ŵanthu wose ŵakutemwa kucita. Ndipo pakupokelera mulendo ŵakumuphaka mafuta ku mutu, kweni Yesu ŵakumuphaka yayi.

Pa nyengo ya cakurya, uku ŵalendo ŵakukhala pa thebulu, mwanakazi munyake wambura kucemeka wakunjira cisisi mu cipinda. Wakumanyikwa mu msumba kuti wali na nkharo yiheni. Wakwenera kuti wali kupulika visambizgo vya Yesu, na nchemo yakuti ‘wose awo mbakuphyoka ŵize kwa iyo kuti ŵasamphuskike.’ Ndipo pakutoleka mtima na ivyo wali kuwona na kupulika, wapenjanga Yesu.

Mwanakazi uyu wakwiza kumasinda kwa Yesu pa thebulu ndipo wakujikama pafupi na malundi ghake. Apo masozi ghake ghakuwa pa malundi gha Yesu, mwanakazi wakughapuputa na sisi lake. Wakutoraso mafuta ghakununkhira mu supa yake, ndipo apo wakufyofyontha malundi gha Yesu, wakupungulirapo mafuta. Simoni wakuwonelera kweni wandakondwe. Wakuti mu mtima wake: “Munthu uyu waŵenge nchimi, mphanyi wamumanya kuti ni njani ndipo ngwa mtundu wuli mwanakazi uyo wakumukhwaska, kuti ngwakwananga.”

Pakumanya maghanoghano ghake, Yesu wakuti: “Simoni, nili na cakuyowoya kwa iwe.”

Wakuzgora kuti: “Yowoyani msambizgi!”

Yesu wakwamba kuyowoya, wakuti: “Ŵanthu ŵaŵiri ŵakaŵa na ngongoli ku wakukongozga yunji; yumoza wakaŵa na ngongoli ya madinari mahandiredi ghankhondi, kweni munyake makumi ghankhondi. Apo ŵakaŵavya kanthu kakuti ŵawezgere, wakaŵagowokera na mtima wose, ŵaŵiri wuwo. Ntheura, ni nju uyo wamutemwenge comene?”

Mutepanji kwambura kuŵikako mahara ku fumbo ilo likuwoneka nga ndambura fundo, Simoni wakuti: “Nkhuwona kuti ni uyo wakamugowokera vinandi na mtima wose.”

Yesu wakuti: “Weruzga makora.” Ndipo pakung’anamukira ku mwanakazi, wakuti kwa Simoni: “Wamuwona mwanakazi uyu? Nangunjira mu nyumba yako; wangunipa cara maji ghakugeziska malundi ghane. Kweni mwanakazi uyu wanyevya malundi ghane na masozi ghake na kughapuputa na sisi lake. Wangunifyofyontha cara; kweni mwanakazi uyu kufuma pa ora ilo nangunjilira muno, wandalekepo kufyofyontha malundi ghane mwacitemwa. Wanguwuphakazga cara mutu wane na mafuta; kweni mwanakazi uyu waphakazga malundi ghane mafuta ghakununkhira.”

Ntheura mwanakazi uyu walongora kuti wapera na mtima wose ku nkharo yake yiheni. Ndipo Yesu wakumalizga na mazgu agha: “Pa cifukwa ici, nkhukuphalira, zakwananga zake, nangauli ni zinandi, zagowokereka, cifukwa watemwa comene; kweni uyo wakugowokereka pacoko, wakutemwa pacoko.”

Apa Yesu kuti wakuzomerezga panji kulekelera nkharo yiheni yayi. M’malo mwake, ici cikulongora kuti iyo wali na cisungusungu ku ŵanthu awo ŵabuda kweni citima cikuŵakora cifukwa ca maubudi ghawo ndipo ŵakwiza kwa Khristu kuti waŵavwire. Pakumusamphuska nadi mwanakazi uyu, Yesu wakuti: “Zakwananga zako zagowokereka. . . . Cipulikano cako cakuponoska; lutanga mu mtende.” Luka 7:36-50; Mateyu 11:28-30.

▪ Kasi Yesu wapokelereka wuli na Simoni?

▪ Ni njani wapenjanga Yesu, ndipo cifukwa wuli?

▪ Kasi Yesu wakuyowoya ntharika wuli, ndipo wakuyilongosora wuli?