Cipaturo 64

Sambiro pa Nkhani ya Kugowokera

YESU na ŵasambiri ŵake ŵakwenera kuti ŵacali mu nyumba mu Kaperenaumu. Wadumbirananga nawo umo ŵangacitira na masuzgo pakati pa ŵabali, ntheura Petrosi wakufumba kuti: “Fumu, kasi mbali wane wakwenera kuninangira kalinga ndipo ine nkhwenera kumugowokera?” Pakuti ŵasambizgi ŵa cisopa ca Ŵayuda ŵakuti munthu wakwenera kugowokera katatu, Petrosi wakuwona kuti nchiwemi kusacizga kugowokera “mpaka kankhondi na kaŵiri.”

Kweni kusunga nyengo izo munthu wagowokelera munyake, nako nkhuheni. Yesu wakusambizga Petrosi kuti: “Nkhukuphalira kuti, Mpaka kankhondi na kaŵiri cara, kweni, Mpaka makumi ghankhondi na ghaŵiri pacanya kankhondi na kaŵiri (77).” Yesu wakulongora kuti Petrosi wakwenera kuŵa na mphaka yayi pakugowokera mbali wake.

Pakukhumba kuŵawovwira ŵasambiri ŵake kuti ŵakwenera kugowokera, Yesu wakuŵaphalira ntharika. Ntharika iyi yikuyowoya za themba ilo likukhumba kupoka ndalama zake ku ŵazga ŵake. Muzga yumoza uyo wali nalo na ngongoli yikuru comene ya madinari 60,000,000 wakutolekera kwa ilo. Walije nthowa yakuti wawezgere ngongoli iyi. Ntheura nga umo Yesu wakulongosolera, themba ili likulangura kuti muzga uyu, muwoli ŵake na ŵana ŵaguliskike ndipo ngongoli yipelekeke.

Pakupulika nthena, muzga uyu wakuwa pa malundi gha fumu yake na kuŵeyelera kuti: “Munipe nyengo ndipo niwezgenge cilicose kwa imwe.”

Pakuŵa na citima, fumu iyi yikumucitira cisungusungu na kumuphalira kuti waleke waka kupeleka ngongoli iyi. Yesu wakulutilira kuti, mwaluŵiro ivi vyati vyacitika, muzga uyu wakuluta na kusanga muzga munyake uyo wali na ngongoli yake ya madinari 100. Munthu uyu wakukora muzga munyake pa singo na kwamba kumutikita, wakuti: “Wezga cilicose ico ukakongora.”

Kweni muzga munyake walije ndalama. Ntheura wakuwa pa malundi gha muzga uyo wali nayo na ngongoli, wakumuŵeyelera kuti: “Unipe nyengo ndipo nikuwezgerenge vyako.” Mwakupambana na fumu yake, muzga uyu walije cisungusungu, ndipo wakuponya muzga munyake mu jele.

Yesu wakulutizga kuti, ŵazga ŵanyake awo ŵawonanga ivyo vyacitika, ŵakuluta na kuphalira fumu yawo. Fumu yakwiya, ndipo yikucema muzga yura. Yikuti: “Muzga muheni, nkhakugowokera ngongoli yose yira, apo ukaniŵeyelera. Asi nawe ukenera kuŵa na cisungusungu pa muzga munyako, nga ni umo nane nkhaŵira na cisungusungu pa iwe?” Cifukwa ca kukwiya, fumu yira yikupeleka muzga wambura cisungusungu uyu ku ŵalinda ŵa jele mpaka wawezge vyose ivyo wakakongora.

Ndipo Yesu wakumalizga kuti: “Mwakuyana waka, Ŵadada ŵakucanya ndimo ŵazamucitira na imwe usange mukugowokera cara waliyose mbali wake kufuma mu mitima yinu.”

Ili ni sambiro liwemi comene pa nkhani ya kugowokera. Ubudi uliwose uwo Ŵakhristu ŵanyithu ŵangaticitira ngucoko comene pakuyaniska na ngongoli yikuru ya zakwananga iyo Ciuta watigowokera. Kweniso Yehova Ciuta watigowokera kanandi waka. Kanandi tikumanya na kumanya wuwo yayi kuti tamunangira. Ntheura, kasi tingagowokera yayi ŵabali ŵithu nyengo zicoko waka izo watibudira, nangauli tingaŵa na vifukwa vyakwenelera vyakudandawulira? Kumbukani kuti nga umo Yesu wakasambizgira mu Upharazgi wa pa Lupiri, Ciuta watigowokerenge “ngongoli yithu ya zakwananga, umo nase taŵagowokelera awo ŵali na ngongoli ya zakwananga kwa ise.” Mateyu 18:21-35; 6:12; Ŵakolose 3:13.

▪ Nchivici cikupangiska Petrosi kufumba za kugowokera mbali wake, ndipo cifukwa wuli iyo wakuwona kuti sacizgo la kugowokera munthu kankhondi na kaŵiri ndiwemi?

▪ Kasi pali mphambano wuli pakati pa umo themba likucitira na muzga uyo wakuliŵeya kuti limucitire cisungusungu na umo muzga uyu wakucitira na muzga munyake?

▪ Kasi tikusambirako vici ku ntharika ya Yesu iyi?