Cipaturo 62

Sambiro pa Nkhani ya Kujiyuyura

YESU wati wacizga msepuka uyo wakaŵa na ciŵanda mu cigaŵa ca kufupi na Kesareya Filipi, wakukhumba kuwelera kukwake ku Kaperenaumu. Ndipouli, pa ulendo uwu wakukhumba kwenda na ŵasambiri ŵake pera mwakuti waŵawovwire kunozgekera nyifwa yake ndiposo milimo iyo ŵazamucita para iyo waluta. Wakulongosora kuti: “Mwana wa munthu wakwenera kupelekeka mu mawoko gha ŵanthu, ndipo ŵamumukoma, kweni nanga wakomeke, wamuwuka pamanyuma pa mazuŵa ghatatu.”

Nangauli Yesu wakayowoyapo kale za nyifwa yake, ndipo ŵapositole ŵake ŵatatu ŵakamuwona apo wakasintha mawonekero apo pakayowoyeka nkhani ya “kuwukapo” kwake, ŵalondezgi ŵake ŵacali ŵandapulikiske nkhani iyi. Nangauli palije yumoza wa iwo uyo wakukana kuti Yesu wakomekenge, nga umo Petrosi wakacitira pakwamba, ŵakopa kumufumba vinandi pa nkhani iyi.

Paumaliro, ŵakufika mu Kaperenaumu, uko tingati nchikaya ico Yesu wakutemwa kukhala pa nyengo ya uteŵeti wake. Kweniso nkhwawo kwa Petrosi na ŵapositole ŵanji. Kura, ŵanalume awo ŵakusonkheska msonkho wa pa tempele ŵakwiza kwa Petrosi. Panji pakukhumba kumusanga na mulandu Yesu wa kuleka kulondezga kaluso ako nkhakuzomerezgeka, ŵakufumba kuti: “Kasi msambizgi winu wakupeleka cara msonkho wa pa tempele?”

Petrosi wakuzgora kuti: “Enya,” wakupeleka.

Yesu, uyo wakwenera kuti wafika waka mu nyumba, wakumanya ivyo vyacitika. Ntheura pambere Petrosi wandayowoye nkhani iyi, Yesu wakufumba kuti: “Ukughanaghana wuli Simoni? Kasi mathemba gha caru capasi ghakupokera kwa njani muthulo panji msonkho? Ku ŵana ŵawo panji ŵalendo?”

Petrosi wakuzgora kuti: “Ku ŵalendo.”

Yesu wakuti: “Ipo nadi, ŵana ŵakusonkha cara msonkho.” Pakuti Wiske wa Yesu ni Themba la cilengiwa cose, ilo ŵanthu ŵakusopa pa tempele, nchakukhumbikwa nadi yayi kuti Mwana wa Ciuta wapeleke msonkho wa pa tempele. Yesu wakuti: “Kweni kuti tileke kuŵakhuŵazga, luta ku nyanja, ukaponye mbeja, ndipo ukatore somba yakwamba kukoleka, ndipo para wagagawura mulomo wake, wamusangamo ndalama yasiliva [yakuyana na madirakima ghanayi]. Ukatore yeneyira ukapeleke kwa iwo, ya ine na iwe.”

Apo ŵasambiri ŵakuwungana pamoza ŵati ŵawelera ku Kaperenaumu, panji mu nyumba ya Petrosi, ŵakufumba kuti: “Ni njani uyo ni mukuru comene mu ufumu wa kucanya?” Yesu wakumanya ico ŵakufumbira fumbo ili, pakumanya ivyo ŵayowoyanga apo ŵizanga kumanyuma kwake pakufuma ku Kesareya Filipi. Ntheura wakuŵafumba kuti: “Kasi mwakwesananga vici pa nthowa?” Ŵasambiri soni zaŵakora, ndipo ŵakukhala cete, pakuti ŵakwesananga za uyo waŵenge mukuru pakati pawo.

Pakuwona kuti Yesu waŵasambizga pafupifupi vilimika vitatu, kasi cingaŵa cakwenelera kuti ŵasambiri ŵakwesanenge nthena? Ici cikuvumbura umo munthu wakucitira cifukwa ca kuwura kufikapo ndiposo ivyo wasambizgika na cisopa. Ŵasambiri ŵakulira mu cisopa ca Ŵayuda, ndipo mu cisopa ici ŵanthu ŵakuwona mazaza panji udindo kuŵa vyakuzirwa comene. Kweniso cifukwa cakuti Yesu walayizga Petrosi kuti wamupenge “vijuliro” vinyake vya Ufumu, panji iyo wakujiwona kuŵa wapacanya. Yakobe na Yohane nawo ŵakwenera kuti ŵali na maghanoghano agha cifukwa cakuti ŵakapika mwaŵi wa kuwona Yesu wakusintha mawonekero.

Kwali ndimo viliri nadi kwali yayi, kweni Yesu wakucita cinthu cinyake ico ciŵawovwirenge kusintha nkharo yawo. Wakucema mwana, wakumwimika pakati pawo na kumukora mu singo, ndipo wakuti: “Kwambura kuti mwang’anamuka na kuzgoka nga ni mwana mucoko, muzamunjira cara mu ufumu wa kucanya. Ntheura, yose uyo wajiyuyurenge nga ni mwana mucoko uyu ndiyo ni mukuru comene mu ufumu wa kucanya; ndipo yose uyo wakupokelera yumoza wa ŵana ŵacoko ntheura mu zina lane wakupokeleraso ine.”

Iyi ni nthowa yiwemi comene yakusambizgira ŵasambiri ŵake. Yesu wakuŵakwiyira yayi nesi kuŵakalipira kuti mbakujikuzga, ŵambunu, panji ŵakujikhumbira vikuru. Kweni wakusambizga na ciyelezgero ca ŵana, awo kanandi ŵakuŵa ŵakujicefya ndipo ŵakujikhumbira vikuru yayi ndiposo kanandi ŵakupenja udindo yayi pakati pawo. Ntheura Yesu wakulongora kuti ŵasambiri ŵake ŵakukhumbikwira kuŵa nga mbana awo ŵakuŵa ŵakujiyuyura. Yesu wakumalizga na mazgu ghakuti: “Uyo wakucita nga ni mucoko comene pakati pa mose ndiyo ni mukuru.” Mateyu 17:22-27; 18:1-5; Mariko 9:30-37; Luka 9:43-48.

▪ Pakuwelera ku Kaperenaumu, kasi Yesu wakuwerezgapo cisambizgo wuli, ndipo ŵakucipokelera wuli?

▪ Cifukwa wuli Yesu wakwenera yayi kupeleka msonkho wa pa tempele, kweni cifukwa wuli wapeleka?

▪ Kasi ŵasambiri ŵakwenera kuti ŵakukwesana pa vici, ndipo Yesu wakuŵawovwira wuli?