Cipaturo 95

Sambiro pa Nkhani ya Kupatana na Kutemwa Ŵana

YESU na ŵasambiri ŵake ŵali pa ulendo kuya ku Yerusalemu kuti ŵakaŵepo pa Paska la 33 C.E. Ŵakwambuka Mlonga wa Yorodani ndipo ŵakutora nthowa iyo yikujumpha mu Pereya. Sabata zicoko izo zajumpha, Yesu wakaŵa mu Pereya, kweni wakacemekera ku Yudeya cifukwa mubwezi wake, Lazaro, wakaŵa mulwari. Pa nyengo yira apo wakaŵa mu Pereya, Yesu wakayowoya na Ŵafarisi vya kupatana, ndipo sono ŵakumufumbaso nkhani iyi.

Ŵafarisi ŵali na maghanoghano ghakupambanapambana pa nkhani ya kupatana. Mozesi wakayowoya kuti mwanakazi wangapatika para “mwa iye kanthu ka cifipizgo” kasangikamo. Ŵanji ŵakugomezga kuti apa wakayowoyanga za kwenda uheni. Kweni ŵanyake ŵakughanaghana kuti “kanthu ka cifipizgo” nthumilandu tucokotucoko. Ntheura pakukhumba kuyezga Yesu, Ŵafarisi ŵakumufumba kuti: “Kasi nchakuzomerezgeka kwa mwanalume kupata muwoli wake pa cifukwa ca mtundu uliwose?” Ŵakugomezga kuti cilicose ico Yesu wayowoyenge cimupangiskenge kuti wasuzgane na Ŵafarisi awo ŵali na maghanoghano ghawo na ghawo.

Yesu wakuzgora mwaluso fumbo ili, kwambura kukondweska munthu waliyose, kweni wakuyowoya za umo nthengwa yikanozgekera pakwamba. Wakufumba kuti: “Kasi mundaŵazge kuti uyo wakaŵalenga pakwamba wakaŵalenga iwo mwanalume na mwanakazi ndipo wakati, ‘Pa cifukwa ici mwanalume wasidenge ŵawiske na ŵanyina ndipo wademelerenge ku muwoli wake, ndipo wose ŵaŵiri ŵaŵenge thupi limoza’? Ntheura kuti mbaŵiriso cara, kweni thupi limoza. Pa cifukwa ici, ico Ciuta wagumanya pamoza munthu waleke kupatura.”

Yesu wakulongora kuti cilato cakudankha ca Ciuta, nchakuti ŵakutorana ŵakhalenge pamoza, kwambura kupatana. Ŵafarisi ŵakuti usange ndimo viliri, “ipo cifukwa wuli Mozesi wakalangura kupeleka kalata ya cipati na kumupata mwanakazi?”

Yesu wakuzgora kuti: “Mozesi, pakuwona unonono wa mitima yinu, wakamuzomerezgani kupata ŵawoli ŵinu, kweni ndimo vikaŵira cara kufuma pakwamba.” Enya, apo Ciuta wakapelekanga malango gha nthengwa mu munda wa Edeni, wakayowoyapo yayi vya kupatana.

Yesu wakulutilira kuphalira Ŵafarisi kuti: “Nkhumuphalirani kuti yose uyo wakupata muwoli wake, kwambura cifukwa ca uzaghali [kufuma ku Cigiriki, por·neiʹa], na kutora munyake wakucita uleŵi.” Ntheura wakulongora kuti por·neiʹa, ico nkhugonana kwambura kuzomerezgeka, ndico nchifukwa cekha ico Ciuta wakuzomerezgera kupatana.

Pakumanya kuti nthengwa yikwenera kumara yayi ndipo uleŵi ndico cifukwa cekha cakupatirana, ŵasambiri ŵakuti: “Usange ndimo viliri kwa mwanalume na muwoli wake, mbwenu nchiwemi cara kutora.” Nchakuzirwa comene kuti uyo wakukhumba kutora panji kutengwa waghanaghanirengepo comene pa nkhani yakuti nthengwa njambura kumara.

Yesu wakulutizga mwa kuyowoya za kukhala kwambura kutora panji kutengwa. Wakulongosora kuti ŵasepuka ŵanji ŵakubabika nthunguli, mbakuti ŵangatora yayi cifukwa cakuti ŵalije khumbo la kugonana. Ŵanji ŵali kuzgoreka nthunguli na ŵanthu, cifukwa cakuti ŵali kuŵapweteka. Caumaliro nchakuti ŵanji ŵakukanizga khumbo la kutora panji kutengwa ndiposo la kugonana mwakuti ŵacitenge vinandi vyakukhwaskana na Ufumu wa kucanya. Yesu wakumalizga kuti: “Uyo wangakwaniska [kukhala kwambura kutora panji kutengwa], wacipokelere.”

Sono ŵanthu ŵakwamba kwiza na ŵana kwa Yesu. Ndipouli, ŵasambiri ŵakukalipira ŵana na kukhumba kuŵacimbizga, panji kuti ŵaleke kuvuska Yesu. Kweni Yesu wakuti: “Lekani ŵana ŵacoko ŵize kwa ine; mungayezganga cara kuŵakanizga, cifukwa ufumu wa Ciuta ngwa ŵakuŵa ntheura. Nadi pano nkhumuphalirani, Yose uyo wakupokelera cara ufumu wa Ciuta nga ni mwana mucoko wazamunjiramo cara.”

Apa Yesu wasambizga visambizgo viwemi comene. Kuti tizakanjire mu Ufumu wa Ciuta, tikwenera kutolera mtima wa ŵana wa kujiyuyura na kusambizgika. Kweniso ivyo Yesu wacita apa vikulongora kuti nchakuzirwa, comenecomene ku ŵapapi, kucezga na ŵana ŵawo. Sono pakulongora kuti wakutemwa twana, Yesu wakutunyamura na kututumbika. Mateyu 19:1-15; Duteronome 24:1; Luka 16:18; Mariko 10:1-16; Luka 18:15-17.

▪ Kasi ni maghanoghano wuli ghakupambana agho Ŵafarisi ŵali nagho pa nkhani ya kupatana, ndipo ŵakumuyezga wuli Yesu?

▪ Kasi Yesu wakucita wuli apo Ŵafarisi ŵakumuyezga, ndipo wakulongosora cifukwa wuli cimoza ico ŵanthu ŵangapatirana?

▪ Cifukwa wuli ŵasambiri ŵa Yesu ŵakuti nchiwemi yayi kutora, ndipo Yesu wakulongosora kuti cingaŵa ciwemi kucita vici?

▪ Kasi Yesu wakutisambizga vici pa umo wakucitira na ŵana?