Cipaturo 49

Ulendo Unyake wa Kukapharazga mu Galileya

WATI wapharazga pafupifupi vilimika viŵiri, kasi sono Yesu wambenge kuthika lusoko? Yayi. Kweni wakusazgirako mulimo wake wa kupharazga, wakwambaso ulendo unyake, wacitatu wa kukapharazga mu Galileya. Wakwendera misumba yose na mizi mu cigaŵa ici, kusambizga mu masunagoge na kupharazga makani ghawemi gha Ufumu. Ivyo wakuwona pa ulendo uwu vikumukhorweska comene, ntheura wakuwona kuti nchakukhumbikwa comene kusazgirako mulimo wa kupharazga.

Kulikose uko Yesu wakuluta, wakuwona mizinda iyo yikukhumbikwira kucizgika na kusanguluskika mwauzimu. Ŵanthu aŵa ŵali nga ni mberere zambura muliska, zakufyopoka na kujowoleka, ndipo wakuŵalengera citima. Wakuphalira ŵasambiri ŵake kuti: “Enya, vuna njinandi, kweni ŵanchito mbacoko. Ntheura lombani Mweneco wa vuna kuti watume ŵanchito ku vuna yake.”

Yesu wakunozga nthowa yakucitira mulimo uwu. Wakucema ŵapositole ŵake 12, awo ŵakasoleka pafupifupi cilimika cimoza ico cajumpha. Wakuŵagaŵa ŵaŵiriŵaŵiri, kupanga magulu ghankhondi na limoza gha ŵapharazgi, ndipo wakuŵaphalira vyakucita. Wakulongosora kuti: “Kuluta mu nthowa ya mitundu cara, ndipo kunjira mu msumba wa Ŵasamariya cara; kweni nyengo zose lutaninge ku mberere zakuzgeŵa za nyumba ya Israyeli. Uku mukuluta, pharazgani, mutenge, ‘Ufumu wa kucanya waneng’enera.’”

Ufumu uwo ŵakwenera kupharazga ni uwo Yesu wakaŵasambizga mu lurombo lwake lwakuwonerapo kuti ŵalombenge. Ufumu waneng’enera mu fundo yakuti Themba lakusolekerathu la Ciuta, Yesu Khristu, lilipo. Pakukhumba kusimikizgira kuti ŵasambiri ŵake mbimiliri ŵa boma la kucanya, Yesu wakuŵapa nkhongono zakucizgira ŵalwari na kuwuskira ŵakufwa. Wakuŵaphalira kuti ŵacitenge vinthu ivi kwambura kulipiliska.

Kufuma apo, wakuphalira ŵasambiri ŵake kuti ŵaleke kujinozgera vinthu vyathupi pa ulendo wawo wa kukapharazga. Iyo wakuti: “Kutora golide panji siliva panji mkuŵa cara mu tuvikwama twinu twa ndalama, panji thumba la cakurya ca pa ulendo, panji malaya ghaŵiri ghamukati, panji vilyato panji ndodo, pakuti wanchito wakwenera kupika cakurya cake.” Awo ŵakukondwa na uthenga uwu ŵamupulikira ndipo ŵamuŵapa vyakurya na pakugona. Nga umo Yesu wakuyowoyera: “Mu msumba uliwose panji muzi uwo mwanjiramo, penjanimo uyo ngwakwenelera, ndipo khalani mwenemumo mpaka mufumemo.”

Kufuma apo, Yesu wakuŵaphalira umo ŵangafikira ŵenenyumba na uthenga wa Ufumu. Wakuti: “Para mukunjira mu nyumba, tawuzgani ŵamunyumba; ndipo usange nyumba njakwenelera, mtende uwo mukuyikhumbira wize pa iyo; kweni usange njambura kwenelera, mtende uwo mwanguyikhumbira uwelere pa imwe. Kulikose uko munthu waleka kumupokelerani panji kupulikizga mazgu ghinu, pakufuma mu nyumba iyo panji msumba uwo, phatani fuvu ku malundi ghinu.”

Pakuyowoya za msumba uwo ukukana uthenga wawo, Yesu wakuvumbura kuti cilango cake cizamuŵa cikuru comene. Wakulongosora kuti: “Nadi pano, nkhumuphalirani, Kuzamuŵa mphanyiko ku caru ca Sodomu na Gomora pa Zuŵa la Ceruzgo kuluska msumba uwo.” Mateyu 9:35–10:15; Mariko 6:6-12; Luka 9:1-5.

▪ Mphawuli apo Yesu wakwamba ulendo wacitatu wa kukapharazga mu Galileya, ndipo wakukhorwa kuti vici?

▪ Apo Yesu wakutuma ŵapositole ŵake 12 kukapharazga, kasi wakuŵaphalira vici?

▪ Cifukwa wuli nchakwenelera kuti ŵasambiri ŵakasambizgenge kuti Ufumu waneng’enera?