Cipaturo 63

Ulongozgi Wakusazgikira

APO Yesu na ŵapositole ŵake ŵacali mu nyumba mu Kaperenaumu, ŵakudumbiskana cinthu cinyake padera pa nkhani ya uyo ni mukuru. Ici nchinyake ico cikwenera kuti cikacitika apo ŵakaweleranga ku Kaperenaumu, apo Yesu pakaŵavya. Mpositole Yohane wakuti: “Tikawona munthu munyake wakufumiska viŵanda mu zina linu ndipo tikayezga kumukanizga, cifukwa wakendanga nase cara.”

Panji Yohane wakuwona kuti ŵapositole ŵekha ndiwo nkhagulu ka awo ŵakucizga ŵanthu. Ntheura wakuwona kuti munthu yura wakacitanga milimo yankhongono mwambura kwenelera cifukwa wakaŵa wa kagulu kawo yayi.

Ndipouli, Yesu wakuti: “Mungayezganga cara kumukanizga, cifukwa palije uyo wacitenge mulimo wankhongono mu zina lane, mweneuyo mwaluŵiro wamanyenge kunituka; pakuti uyo wakwimikana nase cara, wali kwa ise. Pakuti yose uyo wakumupani nkhombo ya maji kuti mumwe cifukwa cakuti muli ŵalondezgi ŵa Khristu, nadi pano nkhumuphalirani, watayenge cara njombe yake.”

Cikaŵa cakwenelera yayi kuti munthu uyu wendenge na Yesu kuti waŵe ku cigaŵa cake. Mpingo Wacikhristu kukaŵavya pa nyengo yira, ntheura pakuti wakaŵa pa gulu lawo yayi cikung’anamura kuti wakaŵa wa mpingo unyake yayi. Munthu uyu wakaŵa nadi na cipulikano mu zina la Yesu, lekani wakafumiskanga viŵanda. Wakacitanga cinthu ico cikuyana waka na ico Yesu wakuti cikwenelera njombe. Yesu wakulongora kuti pakucita ici, watayenge yayi njombe yake.

Kweni munthu yura wakhuŵarenge na mazgu ndiposo vyakucita vya ŵapositole, mphanyi vikaŵa wuli? Ici mphanyi cikaŵa ciheni comene. Yesu wakuti: “Yose uyo wakukhuŵazga yumoza wa ŵacoko aŵa ŵeneawo ŵakugomezga, cingaŵa ciwemi kwa iyo kuti lwara nga ulo lukwendeskeka na mbunda lukakike mu singo yake ndipo waponyeke mu nyanja.”

Yesu wakuti ŵalondezgi ŵake ŵakwenera kutaya cilicose mu umoyo wawo ico cingaŵakhuŵazga, nanga cingaŵa cakutemweka, nga ni woko, lundi, panji jiso. Nchiwemi kuŵa wambura cinthu cakutemweka ici na kunjira mu Ufumu wa Ciuta kuluska kuŵa naco na kuponyeka mu Gehena (malo ghakocherako viswaswa kufupi na Yerusalemu), uyo wakwimira pharanyiko lamuyirayira.

Yesu wakucenjezgaso kuti: “Woneseskani imwe mwaŵanthu kuti mukwelura yumoza wa ŵacoko aŵa cara; pakuti nkhumuphalirani kuti ŵangelo ŵawo kucanya nyengo zose ŵakulaŵiska cisko ca Ŵadada awo ŵali kucanya.” Ndipo wakulongosora kuzirwa kwa “ŵacoko” apo wakuŵaphalira ntharika ya munthu uyo wali na mberere 100 kweni yimoza yazgeŵa. Yesu wakulongosora kuti munthu uyu walekenge mberere 99 na kuluta kukapenja yimoza iyo yazgeŵa, ndipo para wayisanga wasekelerenge comene cifukwa ca yimoza kuluska 99. Yesu wakumalizga kuti: “Mwakuyana waka, Ŵadada awo ŵali kucanya ŵakukhumba cara kuti yumoza wa ŵacoko aŵa watayike.”

Panyake cifukwa ca kukumbuka kuti ŵapositole ŵake ŵakwesananga, Yesu wakuŵaciska kuti: “Muŵe na mcere mwa imwe mwaŵene, ndipo sungani mtende pakati pa yumoza na munyake.” Vyakurya vyambura kunowa vikunowera mcere. Ntheura, mcere wakuyelezgera ukupangiska kuti ciŵe cipusu kuzomerezga ico yunji wayowoya. Kuŵa na mcere wanthena uwu kuŵawovwirenge kusunga mtende.

Kweni cifukwa ca kuwura urunji, nyengo zinyake paŵenge mphindano. Yesu wakuyowoyaso ulongozgi wakumazgira mphindano izi. Yesu wakuti: “Usange mbali wako wananga, luta ukamuphalire ubudi wake pakati pa iwe na iyo pamwekha. Usange wakupulikira, ndikuti wamuwezga mbali wako.” Usange watondeka kupulika, Yesu wakuti, “tolerapo pamoza nawe munthu yumoza panji ŵaŵiri, mwakuti na mulomo wa ŵakaboni ŵaŵiri panji ŵatatu nkhani yiliyose yikhozgeke.”

Kweni para wakana nipera, Yesu wakuti nkhani iyi mukayipeleke ku “mpingo,” kung’anamura ku ŵalaŵiliri ŵa mpingo awo ŵangeruzga. Usange wakwananga wakupulikira yayi ulongozgi wawo, Yesu wakumalizga kuti, “waŵe kwa iwe nga ni munthu wa mitundu kweniso nga ngwakusonkheska msonkho.”

Pakudumura nkhani zanthena izi, ŵalaŵiliri ŵakwenera kulondezga comene ulongozgi wa mu Mazgu gha Yehova. Ntheura para munthu uyu ŵamusanga na mulandu ndipo wakwenelera cilango, weruzgi wawo uŵenge kuti ‘wakakika kale kucanya.’ Ndipo para ‘ŵasutura pa caru capasi,’ kung’anamura kumusanga wambura mulandu, ciŵenge kuti ‘casutulika kale kucanya.’ Pakudumbiskana nkhani za weruzgi izi, Yesu wakuti, “apo pali ŵaŵiri panji ŵatatu ŵakuwungana pamoza mu zina lane, nane nili penepapo pakati pawo.” Mateyu 18:6-20; Mariko 9:38-50; Luka 9:49, 50.

▪ Cifukwa wuli mu nyengo ya Yesu cikaŵa cakwenelera viŵi yayi kwenda nayo?

▪ Kasi nkhani ya kukhuŵazga yumoza wa ŵacoko njakofya wuli, ndipo Yesu wakuyowoya ntharika wuli iyo yikulongora kuti ŵacoko aŵa mbakuzirwa?

▪ Nchivici ico cingaŵa kuti cikupangiska Yesu kuciska ŵapositole ŵake kuti ŵaŵe na mcere pakati pawo?

▪ Kasi mazgu ghakuti ‘kukaka’ na ‘kusutura’ ghakung’anamuraci?