Cipaturo 58

Vingwa na Cilungo

MIZINDA yawungana kwa Yesu mu Dekapoli. Ŵanandi ŵafuma kutali comene kwiza ku cigaŵa ici ca ŵa mitundu kuzakapulikizga mazgu gha Yesu na kucizgika ku maulwari ghawo. Ŵiza na vidunga vikuruvikuru ivyo kanandi ŵakuyeghamo vyakurya para ŵakwenda mu vigaŵa vya ŵa mitundu.

Ndipouli, paumaliro Yesu wakucema ŵasambiri ŵake na kuyowoya kuti: “Nili na citima na mzinda, cifukwa mazuŵa ghatatu ghalutapo kale ŵakhala nane ndipo ŵalije cakuti ŵarye; ndipo usange ningaŵatuma kuti ŵalutenge ku vikaya vyawo na njara, ŵalendukenge pa nthowa. Nadi, ŵanji ŵali kufuma kutali comene.”

Ŵasambiri ŵakufumba kuti: “Kasi ni nkhu uko munthu mu mayiyi ghano, wangasanga vingwa kuti wakhutiske ŵanthu aŵa?”

Yesu wakuŵafumba kuti: “Muli na vingwa vilinga?”

Ŵakuzgora kuti: “Vinkhondi na viŵiri, ndiposo tusomba tucoko waka.”

Wati waphalira ŵanthu kuti ŵakhale pasi, Yesu wakutora vingwa na somba, wakulomba kwa Ciuta, wakuvimenya, ndipo wakwamba kuvipeleka ku ŵasambiri ŵake. Ŵasambiri ŵakuvigaŵizga ku ŵanthu, ndipo wose ŵakurya na kukhuta. Kufuma apo, vingwa vyakukhalapo vyati vyatoleka vikuzura vidunga vikuruvikuru vinkhondi na viŵiri, nangauli ŵanalume pafupifupi vikwi vinayi ŵarya, kweniso ŵanakazi na ŵana.

Yesu wakuwezga mizinda, wakukwera boti pamoza na ŵasambiri ŵake, ndipo ŵakwambukira ku cigaŵa ca kuzambwe mumphepete mwa Nyanja ya Galileya. Uku, Ŵafarisi pamoza na gulu la cisopa la Ŵasaduki, ŵakukhumba kumuyezga, ŵakumulomba kuti waŵalongore cimanyikwiro cakufuma kucanya.

Pakumanya kuti ŵakukhumba kumuyezga, Yesu wakuzgora kuti: “Para kwaŵa mise, muli kuzgoŵera kuyowoya kuti, ‘Kucenge makora, cifukwa mtambo nguswesi comene’; ndipo mulenji mukuti, ‘Muhanya uno kuzizimenge ndipo kuŵenge vula, cifukwa mtambo nguswesi comene, kweni ukuwoneka ufipa.’ Mukumanya kulongosora mawonekero gha mtambo, kweni vimanyikwiro vya zinyengo mungavilongosora cara.”

Pa cifukwa ici, Yesu wakuŵacema kuti muwiro uheni na wauleŵi ndipo wakuŵacenjezga kuti nga umo wakaphalilira Ŵafarisi pakwambilira, cimanyikwiro cipelekekenge cara kwa iwo, kweni cimanyikwiro ca Yona pera. Pakufumako kura, iyo na ŵasambiri ŵake ŵakukwera boti ndipo ŵakulazga ku Betesayida kumpoto ca kuvuma kwa Nyanja ya Galileya. Uku ŵali mu nthowa, ŵasambiri ŵakusanga kuti ŵaluwa kuyegha vingwa, kweni ŵali na cingwa cimoza pera.

Pakukumbuka ivyo vyacitika cifukwa ca kukumana na Ŵafarisi na Ŵasaduki awo ŵakukolerana na Herode, Yesu wakusoka ŵasambiri kuti: “Muŵenge maso, cenjerani na cilungo ca Ŵafarisi na cilungo ca Herode.” Apo wakuzunura za cilungo, ŵasambiri ŵakughanaghana kuti Yesu wakuyowoya za vingwa ivyo ŵaluwa, ntheura ŵakwamba kukwesana ŵekhaŵekha. Pakuwona kuti ŵandapulikiske, Yesu wakuti: “Cifukwa wuli mukukwesana pa fundo yakuti mulije vingwa?”

Ni kale viŵi yayi, Yesu wakandaniska vingwa mwamunthondwe na kulyeska ŵanthu vikwi vinandi, ndipo panyake pajumpha waka zuŵa limoza panji ghaŵiri kufuma apo wakacitira munthondwe waumaliro uwu. Ŵakwenera kumanya kuti iyo wakufipa mtima na vingwa vyeneko yayi. Wakuŵakumbuska kuti: “Kasi mukukumbuka cara, apo nkhamenyera vingwa vinkhondi ŵanalume vikwi vinkhondi, kasi mukatora vidunga vilinga vyakuzura na vimenyu?”

Ŵakuzgora kuti: “Khumi na viŵiri.”

“Apo nkhamenyera vingwa vinkhondi na viŵiri ŵanalume vikwi vinayi, kasi mukatora vidunga vikuruvikuru vilinga vyakuzura na vimenyu?”

Ŵakuzgora kuti: “Vinkhondi na viŵiri.”

Yesu wakufumba kuti: “Kasi mucali mundamanye ng’anamuro lake?” “Vyaŵa wuli kuti mwangumanya cara kuti nayowoyanga namwe vya vingwa cara? Kweni cenjerani na cilungo ca Ŵafarisi na Ŵasaduki.”

Paumaliro ŵasambiri ŵakumanya ico wakung’anamura. Cilungo, cinthu ico cikutukumuska cingwa, cikwimira kwanangika. Ntheura sono ŵasambiri ŵamanya kuti Yesu wakuyowoya lizgu lakuyelezgera waka, wakuŵacenjezga kuti ŵaŵe maso na “visambizgo vya Ŵafarisi na Ŵasaduki.” Visambizgo ivi vikunanga. Mariko 8:1-21; Mateyu 15:32–16:12.

▪ Cifukwa wuli ŵanthu ŵali na vidunga vikuruvikuru?

▪ Wati wafuma mu Dekapoli, kasi Yesu wakunyamuka kuya nkhu pa boti?

▪ Kasi ŵasambiri ŵakughanaghana vici apo Yesu wakuyowoya za cilungo?

▪ Kasi Yesu wakung’anamuraci pakuyowoya za “cilungo ca Ŵafarisi na Ŵasaduki”?