Cipaturo 116

Wakovwira Ŵapositole Kuti Ŵaŵe Ŵakunozgeka Cifukwa Wakuwukapo

MUGONERO wamara, kweni Yesu na ŵapositole ŵake ŵacali mu cipinda camucanya. Nangauli Yesu wawukengepo sonosono, wacali na vinthu vinandi vyakuti wayowoye. Wakuŵakhwimiska, wakuti: “Mitima yinu yingakweŵekanga cara. Muŵe na cipulikano mwa Ciuta.” Kweni wakusazgirapo kuti: “Muŵeso na cipulikano mwa ine.”

Yesu wakulutilira, wakuti: “Mu nyumba ya Ŵadada muli malo ghanandi ghakukhalamo. . . . Nkhuluta kukamunozgerani malo . . . mwakuti uko ine nili ndiko namwe muŵenge. Ndipo uko nkhuya nthowa mukuyimanya.” Ŵapositole ŵakumanya yayi kuti Yesu wakuyowoya za kuluta kucanya, ntheura Tomasi wakufumba kuti: “Fumu, tikumanya cara uko mukuya. Kasi nthowa tingayimanya wuli?”

Yesu wakuzgora kuti: “Ine ndine nthowa na unenesko na umoyo.” Enya, kwekha para munthu wakupulikira Yesu na kucita vinthu nga ndiyo ndipo wanganjira mu nyumba yakucanya ya Ŵawiske, cifukwa nga umo Yesu wakuyowoyera: “Palije uyo wakwiza ku Ŵadada kweni kwizira mwa ine.”

Filipu wakupempha kuti: “Fumu, tilongorani Ŵawiskemwe, ndipo tikhorwenge.” Panji Filipu wakukhumba kuti Yesu waŵalongore Ciuta kwizira mu mboniwoni, nga umo vikaŵira kwa Mozesi, Eliya na Yesaya mu nyengo yakale. Kweni ŵapositole ŵali na Yesu uyo wakuluska mboniwoni zira, nga umo iyo wakuyowoyera kuti: “Imwe mwaŵanthu, nakhala namwe nyengo yose iyi, ndipouli, Filipu, kasi undafike pa kunimanya? Uyo wawona ine wawona na Ŵadada wuwo.”

Yesu wakulongora wunthu wa Ŵawiske nkhanira ndendende, mwakuti para munthu wakuwona iyo, wakuŵa nga wakuwona Ŵawiske. Kweni Ŵawiske mbakuru kwa iyo, nga umo wakuzomerezgera kuti: “Vinthu ivyo nkhuyowoya kwa imwe mwaŵanthu nkhuyowoya mwa namwene cara.” Nchakwenelera kuti Yesu wakulumba Ŵawiske ŵakucanya cifukwa ca visambizgo ivyo ŵali kumupa.

Ŵapositole ŵakwenera kuti ŵakukhozgeka comene apo sono Yesu wakuŵaphalira kuti: “Uyo wakupulikana mwa ine, iyo uyu wacitengeso milimo iyo ine nkhucita; ndipo wacitenge milimo yikuru kuluska iyi.” Yesu wakung’anamura kuti ŵalondezgi ŵake ŵazamuŵa na nkhongono zakucitira minthondwe kuluska iyo yayi. Kweni iyo wakung’anamura kuti ŵazamucita uteŵeti kwa nyengo yitaliko, mu cigaŵa cikuru, ndiposo ku ŵanthu ŵanandi.

Para waluta, Yesu waŵalekerengethu yayi ŵapositole ŵake. Wakulayizga kuti: “Cilicose ico mulombenge mu zina lane, nizamucicita.” Wakulutilira kuti: “Namulomba Ŵadada ndipo ŵazamumupani movwiri munyake kuti waŵenge namwe muyirayira, mzimu wa unenesko.” Wati wakwera kucanya, Yesu wakupungulira mzimu utuŵa pa ŵasambiri ŵake, uwo ni movwiri munyake.

Yesu wali pafupi kuwukapo, nga umo wakuyowoyera kuti: “Kwakhala pacoko, caru ciniwonengeso cara.” Yesu wamuŵa cilengiwa cauzimu ico ŵanthu ŵangaciwona yayi. Kweniso Yesu wakulayizga ŵapositole ŵake ŵakugomezgeka kuti: “Imwe muniwonenge, cifukwa nili wamoyo ndipo imwe muŵenge ŵamoyo.” Enya, Yesu wawonekenge ku ŵasambiri ŵake para wawuskika kweniso pa nyengo yakutemeka para wazakaŵawuskira ku umoyo pamoza na iyo kucanya nga ni vilengiwa vyauzimu.

Sono Yesu wakuyowoya fundo yipusu yakuzirwa iyi: “Uyo wali na malango ghane na kughasungilira, iyo uyu ndiyo wakunitemwa. Ndipo uyo wakunitemwa watemwekenge na Ŵadada, ndipo nimutemwenge na kujilongora pakweru kwa iyo.”

Wati wayowoya ici, mpositole Yudasi, uyo wakucemekaso Tadeyu, wakumudumulizga, wakuti: “Fumu, vyaŵa wuli kuti mukukhumba kujilongora pakweru kwa ise, ku caru cara?”

Yesu wakuzgora kuti: “Usange yunji wakunitemwa, wasungilirenge mazgu ghane, ndipo Ŵadada ŵamutemwenge . . . Uyo wakunitemwa cara wakusungilira mazgu ghane cara.” Mwakupambana na ŵalondezgi ŵake ŵakugomezgeka, caru cikukana visambizgo vya Khristu. Ntheura wakujivumbura cara kwa iwo.

Mu uteŵeti wake wa pa caru capasi, Yesu wasambizga ŵapositole ŵake vinthu vinandi. Kasi ŵavikumbukenge wuli vyose, pakuti nanga ni sono nthena ŵakutondeka kupulikiska vinandi? Cakukondweska nchakuti Yesu wakuŵalayizga kuti: “Movwiri, mzimu utuŵa, uwo Ŵadada ŵazamutuma mu zina lane, iwo uwu, uzamumusambizgani vinthu vyose na kumukumbuskani vinthu vyose ivyo namuphalirani.”

Pakulutilira kuŵakhwimiska, Yesu wakuti: “Nkhumusidirani mtende, nkhumupani mtende wane. . . . Mitima yinu yingakweŵekanga cara.” Mbunenesko kuti Yesu wakuluta, kweni iyo wakulongosora kuti: “Munitemwenge ine, mphanyi mwasekelera kuti nkhuluta ku Ŵadada, cifukwa Ŵadada mbakuru kuluska ine.”

Nyengo iyo yakhalako yakuti Yesu waŵire lumoza na iwo njicoko comene. Iyo wakuti: “Niyowoyengeso vinandi kwa imwe cara, pakuti muwusi wa caru wakwiza. Ndipo iyo walije mazaza pa ine.” Satana Dyabulosi, uyo wakanjira mwa Yudasi na kuŵa na mazaza pa iyo, ndiyo ni muwusi wa caru. Kweni Yesu walije kwananga kulikose uko Satana wanganjilirapo kuti wamupatuske pakuteŵetera Ciuta.

Kuŵa Paubwezi Uwemi Comene

Ciphikiro cati camara, Yesu wakuciska ŵapositole, wakudumbiskana nawo mwaubwezi comene. Nyengo yikwenera kuti yajumpha 12 koloko usiku. Ntheura Yesu wakuŵaciska kuti: “Wukani, tiyeni tifumepo pano.” Ndipouli, pambere ŵandanyamuke, pakuti wakuŵatemwa comene, Yesu wakulutilira kuyowoya, wakuŵaphalira ntharika yakucontha mtima comene.

Wakuti: “Ndine mpheska yeneko, ndipo Ŵadada ndiwo mbalimi.” Mulimi Mukuru, Yehova Ciuta, wakapanda mpheska yakuyelezgera iyi apo wakaphakazga Yesu na mzimu utuŵa peneapo wakabapatizikanga mu 29 C.E. Kweni Yesu wakulutilira, wakulongora kuti mpheska iyi yikwimira iyo pera yayi, wakuti: “Munthavi uliwose mwa ine wambura kupambika vipambi ŵakuwuwuskako, ndipo uliwose uwo ukupambika vipambi ŵakuwutozga, mwakuti upambike vipambi vinandi. . . . Umo munthavi ungapambikira vipambi cara mwa iwowene kwambura kuti ukukhalilira mu mpheska, mwakuyana waka imwe namwe mungapambika cara, kwambura kuti mukukhalilira mu umoza na ine. Ndine mpheska, imwe ndimwe minthavi.”

Pa Pentekoste, pati pajumpha mazuŵa 51, ŵapositole na ŵanji ŵakuzgoka minthavi ya mpheska iyi apo mzimu utuŵa ukupungulikira pa iwo. Paumaliro, ŵanthu 144,000 ŵakuŵa minthavi ya mpheska yakuyelezgera iyi. Yesu Khristu pamoza na ŵanthu aŵa, ndiwo ni mpheska yakuyelezgera iyo yikupambika vipambi vya Ufumu wa Ciuta.

Yesu wakulongosora nthowa yakupambikira vipambi, wakuti: “Uyo wakukhalilira mu umoza na ine, ndipo ine mu umoza na iyo, iyo uyu wakupambika vipambi vinandi; cifukwa kwambura ine mungacita kanthu cara nanga nkhamoza.” Ndipouli, usange munthu wakutondeka kupambika vipambi, Yesu wakuti, “wakuponyeka kuwaro nga ni munthavi ndipo wakomira; ndipo ŵanthu ŵakuwunjika minthavi yira na kuyiponya mu moto ndipo yikuphya.” Kweniso Yesu wakulayizga kuti: “Usange mukukhalilira mu umoza na ine ndipo mazgu ghane ghakukhalilira mwa imwe, lombani cilicose ico mukukhumba ndipo cicitikenge kwa imwe.”

Yesu wakulutilira kuyowoya ku ŵapositole ŵake kuti: “Ŵadada ŵakupika ucindami mu ici, kuti mulutilire kupambika vipambi vinandi na kujilongora mwaŵene kuti muli ŵasambiri ŵane.” Vipambi ivyo Ciuta wakukhumba ku minthavi nkhulongora wunthu wakuyana na wa Khristu, comenecomene citemwa. Kweniso pakuti Khristu wakaŵa mupharazgi wa Ufumu wa Ciuta, cipambi cinyake cakukhumbikwa nkhucita mulimo wa kuzgora ŵanthu kuŵa ŵasambiri nga umo iyo wakacitira.

Sono Yesu wakuŵaciska kuti: “Khalilirani mu citemwa cane.” Kweni kasi ŵapositole ŵangacita wuli ici? Iyo wakuti: “Usange mukusungilira malango ghane, mukhalilirenge mu citemwa cane.” Yesu wakulutizga kulongosora, wakuti: “Ili ni dango lane, lakuti mutemwanenge yumoza na munyake umo ine namutemwerani imwe. Palije munthu wali na citemwa cikuru kuluska ici, cakuti yunji wapeleke umoyo wake cifukwa ca ŵabwezi ŵake.”

Para pajumpha maora ghacoko waka, Yesu walongorenge citemwa cikuru ici pakupeleka umoyo wake cifukwa ca ŵapositole ŵake, kweniso ŵanji wose awo ŵaŵenge na cipulikano mwa iyo. Ŵalondezgi ŵake nawo ŵakwenera kutemwana comene yumoza na munyake nga umo iyo wakucitira. Citemwa ici ciŵenge cimanyikwiro cawo, nga umo Yesu wanguyowoyera kale kuti: “Na ici, wose ŵamanyenge kuti ndimwe ŵasambiri ŵane, usange muli na citemwa pakati pinu.”

Yesu wakunyoloskera woko ku ŵabwezi ŵake, wakuti: “Imwe muli ŵa bwezi ŵane usange mukucita ivyo nkhumulangurani. Nkhumucemaniso ŵazga cara, cifukwa muzga wakumanya cara ivyo fumu yake yikucita. Kweni ine namucemani ŵabwezi, cifukwa vinthu vyose ivyo napulika ku Ŵadada namumanyiskani.”

Kuŵa ŵabwezi ŵa Yesu, nchinthu cakuzirwa comene. Kweni kuti ubwezi uwu ukhore, ŵalondezgi ŵake ŵakwenera kulutilira “kupambika vipambi.” Usange ŵacita nthena, Yesu wakuti, “cilicose ico mulombenge ku Ŵadada mu zina lane ŵamupaninge.” Nadi, iyi ni njombe yikuru comene iyo yikusangika cifukwa ca kupambika vipambi vya Ufumu. Wati waŵaciskaso ŵapositole ŵake kuti ‘ŵatemwanenge yumoza na munyake,’ Yesu wakuŵalongosolera kuti caru ciŵatinkhenge. Kweni wakuŵakhwimiska, wakuti: “Usange caru cikumutinkhani, imwe mukumanya kuti cadankha kutinkha ine pambere cindatinkhe imwe.” Kufuma apo, Yesu wakulongosora cifukwa ico caru cikutinkhira ŵalondezgi ŵake, wakuti: “Pakuti muli cigaŵa ca caru cara, kweni ine namusorani kufuma mu caru, pa cifukwa ici caru cikumutinkhani.”

Pakulutilira kulongosora cifukwa ico caru cikutinkhira ŵalondezgi ŵake, Yesu wakuti: “Ŵacitenge vinthu vyose ivi kwimikana namwe cifukwa ca zina lane, cifukwa ŵakumanya cara [Yehova Ciuta] uyo wakanituma.” Minthondwe iyo Yesu wakacitanga, yikuŵakaka awo ŵakumutinkha, nga umo wakuyowoyera kuti: “Niŵenge kuti nindacite pakati pawo milimo iyo palije munthu munyake wali kucitapo, mphanyi ŵalije kwananga; kweni sono ŵawona na kunitinkha ine kweniso Ŵadada.” Ntheura nga umo Yesu wakuyowoyera, lemba lafiskika lakuti: “Ŵakanitinkha kwambura cifukwa.”

Nga umo wangucitira pakwamba, Yesu wakuŵakhwimiskaso, wakuŵalayizga kuti wamuŵatumira movwiri, mzimu utuŵa, uwo ni nkhongono ya Ciuta iyo yikugwira nchito. “Iwo uwu uzamunicitira ukaboni; ndipo imwe namwe mukwenera kucitira ukaboni.”

Wakulutilira Kuŵaciska Pakulayirana Nawo

Yesu na ŵapositole ŵake ŵali pafupi kufumamo mu cipinda camucanya. Wakulutilira kuyowoya, wakuti: “Nayowoya vinthu ivi kwa imwe kuti muleke kukhuŵara.” Wati wayowoya ivi, wakuŵasoka, wakuti: “Ŵanthu ŵazamumusezgani mu sunagoge. Nakuti ora likwiza apo waliyose uyo wakukoma imwe wazamughanaghana kuti wakucita uteŵeti wakupatulika kwa Ciuta.”

Ŵapositole ŵakusuzgika comene maghanoghano na cenjezgo ili. Nangauli Yesu wayowoyapo kale kuti caru ciŵatinkhenge, kweni wandayowoyepo mwakudunjika kuti ŵakomekenge. Yesu wakulongosora kuti: “Vinthu ivi nkhamuphalirani cara pakwamba, cifukwa nkhaŵa namwe.” Kweni nchiwemi comene kuti Yesu waŵaphalilirathu vinthu ivi pambere wandalute.

Yesu wakulutilira, wakuti: “Kweni sono nkhuluta kwa uyo wakanituma, ndipouli, palije yumoza wa imwe wakunifumba kuti, ‘Mukuya nkhu?’” Mise ya usiku uwu, ŵangufumba uko wakuya, kweni sono ŵakofiwa comene mwakuti ŵakutondeka nanga nkhumufumba vinandi pa nkhani iyi. Ntheura Yesu wakuti: “Cifukwa cakuti nayowoya vinthu ivi kwa imwe citima cazura mu mitima yinu.” Ŵapositole ŵali na citima cifukwa ŵamanya kuti ŵazamusuzgika na kukomeka, kweniso cifukwa cakuti Fumu yawo yiŵasidenge.

Ntheura Yesu wakulongosora kuti: “Nkhuluta kuti imwe musange candulo. Pakuti usange nkhuluta cara, movwiri wizenge cara kwa imwe; kweni usange nkhuluta, nizamumutuma kwa imwe.” Pakuŵa munthu, Yesu wangaŵa pa malo ghamoza pa nyengo yimoza, kweni para wali kucanya, wangatuma movwiri, uwo ni mzimu utuŵa wa Ciuta, ku ŵalondezgi ŵake kulikose uko ŵangaŵa pa caru capasi. Ntheura nchacandulo kuti Yesu wakuwukapo.

Yesu wakuti mzimu utuŵa uzamupeleka “ukaboni wakukhorweska ku caru pakuyowoya za kwananga ndiposo pakuyowoya za urunji kweniso pakuyowoya za ceruzgo.” Kwananga kwa caru, uko nkhuleka kupulikana mwa Mwana wa Ciuta, kuzamuvumbukwa. Mwakusazgirapo, pakukwera ku Ŵawiske, ukaboni wakukhorweska wakuti Yesu ni murunji uzamuwoneka. Ndipo pakuti Satana na caru cake ciheni ŵatondeka kutimbanizga Yesu, mbukaboni wakukhorweska wakuti muwusi wa caru weruzgika uheni comene.

Yesu wakulutilira kuti: “Nicali na vinthu vinandi kuti niyowoye kwa imwe, kweni mungamanya kuvipulikiska sono cara.” Ntheura Yesu wakulayizga kuti para waŵapungulira mzimu utuŵa, uwo ni nkhongono ya Ciuta iyo yikugwira nchito, uzamuŵalongozga kuti ŵapulikiske vinthu ivi mwakuyana na umo ŵangakwaniskira.

Ŵapositole ŵakupulikiska yayi kuti Yesu wafwenge ndiposo kuti wazamuwoneka kwa iwo para wawuskika. Ntheura ŵakufumbana yumoza na munyake kuti: “Kasi ici cikung’anamuraci apo wakuti kwa ise, ‘Mu kanyengo kacoko waka muniwonenge cara, ndiposo, mu kanyengo kacoko waka muzamuniwona,’ kweniso ‘cifukwa nkhuluta ku Ŵadada’?”

Yesu wakumanya kuti ŵakukhumba kumufumba, ntheura wakulongosora kuti: “Nadi, nadi nkhumuphalirani, Mulirenge na kutengera, kweni caru cisekelerenge; muŵenge na citima, kweni citima cinu cizamuzgoka cimwemwe.” Zuŵa lenelili kumise, apo Yesu wakukomeka, ŵalongozgi ŵa cisopa ŵakusekelera, kweni ŵasambiri ŵakuŵa na citima. Ndipouli, citima cawo cikuzgoka cimwemwe apo Yesu wakuwuskika. Ndipo ŵakulutilira kuŵa na cimwemwe apo wakuŵapa nkhongono pa Pentekoste, mwa kuŵapungulira mzimu utuŵa wa Ciuta.

Pakuyaniska ivyo vicitikirenge ŵapositole ŵake na vyakuŵinya vya mwanakazi para wakubaba, Yesu wakuti: “Para mwanakazi wakubaba, wakuŵa na citima, cifukwa ora lake lafika.” Kweni Yesu wakuti para mwana wababika, mwanakazi wakukumbukaso suzgo yayi, ndipo wakuciska ŵapositole ŵake kuti: “Ntheura imwe namwe, sono muli na citima nadi; kweni nizamumuwonaniso [para nawuskika] ndipo mitima yinu yizamusekelera, ndipo palije uyo wazamupoka cimwemwe cinu.”

Ŵapositole ŵandalombepo kanthu mu zina la Yesu mpaka pa nyengo iyi. Kweni sono Yesu wakuti: “Usange mulombenge kanthu ku Ŵadada ŵamupaninge mu zina lane. . . . Cifukwa Ŵadada iwoŵene ŵakumutemwani, pakuti imwe mukanitemwa ine ndipo mwagomezga kuti nili kwiza nga mwimiliri wa Ŵadada. Nkhafuma ku Ŵadada ndipo nili kwiza mu caru. Kweniso nkhufumamo mu caru ndipo nkhuya ku Ŵadada.”

Mazgu gha Yesu agha ngakukhozga comene ku ŵapositole. Iwo ŵakuti: “Na ici tikugomezga kuti muli kufuma kwa Ciuta.” Yesu wakufumba kuti: “Kasi mukugomezga sono? Wonani! Ora likwiza, nadi, liza, apo mumbininikenge waliyose kuya ku nyumba yake ndipo munisidenge nekha.” Nangauli ici cikuwoneka nga nchambura macitiko, kweni cikucitika usiku ucali undamare.

Yesu wakumalizga kuti: “Nayowoya vinthu ivi kwa imwe kuti kwizira mwa ine muŵe na mtende. Mu caru muli na suzgo, kweni khwimani mtima! Ine natonda caru.” Yesu wakatonda caru apo wakafiska khumbo la Ciuta mwakugomezgeka, nangauli Satana na caru cake ŵakakhumba kumutimbanizga.

Lurombo Lwaumaliro mu Cipinda Camucanya

Pakuŵatemwa comene ŵapositole ŵake, Yesu waŵawovwira kuti ŵaŵe ŵakunozgeka apo iyo wali pafupi kuwukapo. Sono, wati waŵasoka na kuŵakhwimiska nyengo yitali, wakwinuska maso ghake kucanya na kulomba Ŵawiske kuti: “Pelekani ucindami kwa mwana winu, mwakuti mwana winu wamupani ucindami, mwakuyana na umo mwamupira mazaza pa ŵanthu wose, mwakuti wose awo imwe mwamupa, iyo waŵape umoyo wamuyirayira.”

Yesu wambiska mutu uwemi comene wa nkhani, umoyo wamuyirayira. Pakuti wapika “mazaza pa ŵanthu wose,” Yesu wangapeleka vyandulo vya sembe yakuwombora ku ŵanthu wose, ŵeneawo ŵakufwa. Kweni wakupeleka “umoyo wamuyirayira,” ku ŵekha awo Ŵawiske ŵazomerezga. Pa nkhani yeneyiyi ya umoyo wamuyirayira, Yesu wakulutilira na lurombo lwake, wakuti:

“Kuti ŵaŵe na umoyo wamuyirayira, ŵakwenera kumumanyani imwe Ciuta waunenesko yekha, ndiposo Yesu Khristu, mweneuyo mukamutuma.” Enya, kuti munthu wazakapone, wakwenera kumanya Ciuta na Mwana wake. Kweni ni vinandi ivyo vikukhumbikwa kuluska kuŵamanya waka.

Munthu wakwenera kuŵamanya makora na kuŵa nawo paubwezi. Wakweneraso kuwona vinthu umo iwo ŵakuviwonera. Ndipo pa vyose, munthu wakwenera kuyezgayezga kulondezga nkharo yawo yapacanya pakucita vinthu na ŵanji.

Kufuma apo, Yesu wakulomba kuti: “Namupani ucindami pa caru capasi, cifukwa namalizga mulimo uwo mukanipa kuti nicite.” Ntheura pakuti wafiska mulimo wake, ndiposo pakuŵa na cigomezgo ca ivyo vili munthazi, wakulomba kuti: “Ŵadada, nicindikani pamoza na mwaŵene na ucindami uwo nkhaŵa nawo pamoza na imwe pambere caru cindaŵeko.” Enya, sono wakulomba kuti wawezgekere mu ucindami wake uwo wakaŵa nawo kucanya, kwizira mu ciwuka.

Pakuyowoya mwakudumura za mulimo wake ukuru pa caru capasi, Yesu wakuti: “Navumbura zina linu ku ŵanthu awo mukanipa kufuma mu caru. Ŵakaŵa ŵinu, ndipo mukaŵapeleka kwa ine, ndipo ŵasungilira mazgu ghinu.” Yesu wakazunuranga zina la Ciuta lakuti Yehova mu uteŵeti wake ndipo wakalizunuranga mwakwenelera, kweni wakacita vinandi padera pa kuŵamanyiska waka ŵapositole ŵake zina la Ciuta. Wakaŵawovwiraso kuti ŵamumanye makora Yehova, wunthu wake, ndiposo vilato vyake.

Pakulongora kuti Yehova ni Mukuru, uyo iyo wakumuteŵetera, Yesu wakuzomerezga kuti: “Mazgu agho mukanipa ine naŵapa, ndipo ŵaghapokera ndipo ŵafika nadi pa kumanya kuti nili kwiza nga ni mwimiliri winu, ndipo ŵagomezga kuti imwe muli kunituma.”

Pakupambaniska ŵalondezgi ŵake na ŵanthu ŵanyake wose, Yesu wakulomba kuti: “Nkhuŵalombera iwo; kuti nkhulombera caru cara, kweni awo mwanipa . . . Apo nkhaŵa nawo nkhaŵavikiliranga . . . , ndipo naŵasungilira, ndipo palije yumoza wa iwo waparanyika kweni mwana wa pharanyiko pera,” uyo ni Yudasi Isikariyoti. Pa nyengo iyi, Yudasi wali pa ulendo wa kukapeleka Yesu. Ntheura Yudasi wakufiska Malemba, nangauli mweneco wakumanya yayi.

Yesu wakulutilira kulomba, wakuti: “Caru caŵatinkha, . . . Nkhumulombani imwe, kuti muŵafumyemo mu caru cara, kweni kuti muŵavikilire cifukwa ca muheni. Ŵali ku cigaŵa ca caru cara, umo ine niliri ku cigaŵa ca caru cara.” Ŵalondezgi ŵa Yesu ŵali mu caru, ico cikuwusika na Satana, kweni mbakupatukako ku caru na uheni wake ndiposo ŵakwenera kucita ntheura nyengo zose.

Yesu wakulutilira kuti: “Ŵatuŵiskani na unenesko; mazgu ghinu mbunenesko.” Apa Yesu wakuzunura Malemba Ghacihebere agho waghazunura mazgu kanandi waka kuti, “mbunenesko.” Kweni mazgu agho wakasambizga ŵasambiri ŵake na agho iwo ŵakalemba mwakukhuŵilizgika na mzimu utuŵa nyengo yati yajumphapo, agho ghakucemeka Malemba Ghacigiriki, nagho “mbunenesko.” Unenesko uwu ungatuŵiska munthu, kusinthirathu umoyo wake, na kumupatura ku caru.

Sono Yesu wakulombera “iwo pera cara, kweniso awo ŵakupulikana mwa [iyo] kwizira mu mazgu ghawo.” Ntheura Yesu wakulombera awo ŵaŵenge ŵalondezgi ŵake ŵakuphakazgika ndiposo ŵasambiri ŵanyake ŵa munthazi awo ŵandawunganyike kuŵa “mskambo umoza.” Kasi wakuŵalombera vici wose aŵa?

“Mwakuti wose ŵaŵenge ŵamoza, umo imwe, Ŵadada muliri mu umoza na ine ndipo ine nili mu umoza na imwe, . . . mwakuti ŵaŵenge ŵamoza umo ise tiliri ŵamoza.” Yesu na Ŵawiske kuti mbakubamphikana yayi, kweni mbakukolerana mu vinthu vyose. Yesu wakulomba kuti ŵalondezgi ŵake nawo ŵaŵe mu umoza uwu mwakuti “caru cimanye kuti mukanituma ndipo mukuŵatemwa iwo umo mukunitemwera ine.”

Sono Yesu wakulombera awo ŵaŵenge ŵalondezgi ŵake ŵakuphakazgika ku Ŵawiske ŵakucanya. Wakuŵalombera vici? Mwakuti “nawo ŵaŵenge pamoza na ine uko ine nili, mwakuti ŵawonenge ucindami uwo mwanipa, cifukwa imwe mukanitemwa pambere caru cindazikike,” ndiko kuti pambere Adamu na Eva ŵandambe kubaba ŵana. Nyengo yitali pambere ici cindacitike, Ciuta wakatemwa Mwana wake wapadera yekha, uyo wakazakaŵa Yesu Khristu.

Pakumalizga lurombo lwake, Yesu wakuyowoyaposo kuti: “Naŵamanyiska zina linu ndipo nilimanyiskenge, mwakuti citemwa ico mwanitemwa naco ciŵenge mwa iwo ndipo ine mu umoza na iwo.” Pakuti ŵapositole ŵamanya zina ili, ŵacimanyaso makora citemwa ca Ciuta. Yohane 14:1–17:26; 13:27, 35, 36; 10:16; Luka 22:3, 4; Exodus 24:10; 1 Mathemba 19:9-13; Yesaya 6:1-5; Ŵagalatiya 6:16; Salmo 35:19; 69:4; Zintharika 8:22, 30.

▪ Kasi Yesu wakuya nkhu, ndipo kasi wakumuzgora wuli Tomasi za uko wakuya?

▪ Kwizira mu pempho lake, kasi Filipu wakwenera kuti wakukhumba kuti Yesu waŵacitire vici?

▪ Cifukwa wuli uyo wawona Yesu wawona na Ŵawiske wuwo?

▪ Kasi ŵalondezgi ŵa Yesu ŵazamucita wuli milimo yikuru kuluska iyo wakucita iyo?

▪ Kasi Satana walije mazaza pa Yesu mu nthowa wuli?

▪ Kasi Yehova wakapanda pawuli mpheska yakuyelezgera, ndipo mphawuli apo ŵanji ŵakuŵa cigaŵa ca mpheska iyi ndipo vikucitika wuli?

▪ Kasi mpheska yakuyelezgera yikuŵa na minthavi yilinga paumaliro?

▪ Kasi ni vipambi wuli ivyo Ciuta wakukhumba ku minthavi?

▪ Kasi tingaŵa wuli ŵabwezi ŵa Yesu?

▪ Cifukwa wuli caru cikutinkha ŵalondezgi ŵa Yesu?

▪ Kasi ni cenjezgo wuli la Yesu ilo likukweŵeska ŵapositole ŵake?

▪ Cifukwa wuli ŵapositole ŵakutondeka kufumba Yesu za uko wakuya?

▪ Kasi ŵapositole ŵakutondeka kupulikiska vici?

▪ Kasi Yesu wakulongora wuli kuti vinthu visinthenge ku ŵapositole kufuma ku citima kuya ku cimwemwe?

▪ Kasi Yesu wakuyowoya kuti ŵapositole ŵacitengeci sonosono?

▪ Kasi Yesu wakutonda wuli caru?

▪ Kasi Yesu wapika “mazaza pa ŵanthu wose” mu nthowa wuli?

▪ Kasi kumanya Ciuta na Mwana wake cikung’anamuraci?

▪ Kasi Yesu wakuŵamanyiska wuli ŵanthu zina la Ciuta?

▪ Kasi ‘unenesko’ ni vici, ndipo ‘ukutuŵiska’ wuli Mkhristu?

▪ Kasi Ciuta, Mwana wake, na ŵasopi wose ŵaunenesko mbamoza wuli?

▪ Kasi ‘caru cikazikika’ pawuli?