Cipaturo 50

Wakuŵawovwira Kunozgekera Nthambuzgo

YESU wati wasambizga ŵapositole ŵake umo ŵangapharazgira, wakuŵacenjezga za ŵakususka. Wakuti: “Wonani! nkhumutumani nga ni mberere pakati pa mphumphi . . . Cenjerani na ŵanthu; pakuti ŵazamumupelekani ku zimphara, ndipo ŵazamumuthyapurani mu masunagoge ghawo. Nakuti muzamutolekera panthazi pa ŵakazembe na mathemba cifukwa ca zina lane.”

Nangauli ŵalondezgi ŵake ŵazamutambuzgika comene, Yesu wakuŵasimikizgira kuti: “Para ŵamupelekani, kwenjerwa cara na umo mukwenera kuyowoyera panji ico mukwenera kuyowoya; cifukwa ico mukwenera kuyowoya cizamupika kwa imwe mu ora lenelilo; pakuti awo ŵakuyowoya ndimwe pera cara, kweni ni mzimu wa Ŵawiskemwe uwo ukuyowoya kwizira mwa imwe.”

Yesu wakulutizga kuti: “Kweniso mbali wazamupeleka mbali ku nyifwa, ndipo wiske wazamupeleka mwana wake, ŵana ŵazamuwukira ŵapapi ndipo ŵazamuŵapeleka ku nyifwa.” Wakusazgirapo kuti: “Muzamuŵa ŵakutinkhika na ŵanthu wose cifukwa ca zina lane; kweni uyo wazizipizga mpaka ku umaliro ndiyo wazamuponoskeka.”

Kupharazga nkhwakuzirwa comene. Pa cifukwa ici, Yesu wakuŵaphalira kuti nchakukhumbikwa kuŵa ŵakucenjera mwakuti ŵaŵe ŵanangwa kucita mulimo uwu. Iyo wakuti: “Para ŵamutambuzgani mu msumba umoza, cimbilirani ku unyake; cifukwa nadi pano, nkhumuphalirani, muzamumara cara kuzingilira misumba ya Israyeli, mpaka Mwana wa munthu wafike.”

Mbunenesko kuti apa Yesu wakusambizga, kucenjezga na kukhwimiska ŵapositole ŵake 12, kweni fundo izi zikovwiraso ŵanthu wose awo ŵacitengeko mulimo uwu pa caru cose para iyo wafwa na kuwuka. Fundo iyi yikuwoneka mu mazgu agho waphalira ŵasambiri ŵake ghakuti ‘ŵazamutinkhika na ŵanthu wose,’ kuti na Ŵaisrayeli pera yayi uko ŵapositole ŵatumika kukapharazga. Kweniso ŵapositole ŵakatolekera panthazi pa ŵakazembe na mathemba yayi apo Yesu wakaŵatuma kukapharazga. Ndiposo, ŵakupulikana pa nyengo yira, ŵakakomeka na ŵamunyumba yawo yayi.

Ntheura pakuyowoya kuti ŵasambiri ŵake ŵazamumara cara kuzingilira misumba yose kupharazga “mpaka Mwana wa munthu wafike,” Yesu wakuphalira ise kuti timalenge yayi kuzingilira caru cose capasi kupharazga vya Ufumu wa Ciuta, pambere Themba Laucindami, Yesu Khristu, lindafike nga ni mweruzgi wa Yehova pa Haramagedoni.

Pakulutilira kuŵaphalira umo ŵangapharazgira, Yesu wakuti: “Msambiri wali pacanya pa msambizgi wake cara, nesi muzga pacanya pa fumu yake.” Ntheura ŵalondezgi ŵa Yesu ŵakwenera kukhazga kuti nawo ŵasuzgikenge na kutambuzgika nga ndiyo cifukwa ca kupharazga Ufumu wa Ciuta. Kweni wakuŵasoka kuti: “Mungofiwanga cara na awo ŵakukoma thupi kweni ŵangakoma umoyo cara; m’malo mwake, mopenge uyo wangaparanya vyose, umoyo na thupi wuwo mu Gehena.”

Yesu wakwenera kwamba ndiyo kucita ici. Wakwenera kuzizipizga kwambura wofi m’malo mwa kuleka kugomezgeka kwa Uyo wali na nkhongonozose, Yehova Ciuta. Enya, Yehova ndiyo wangakoma “umoyo” wa munthu, (kung’anamura ivyo munthu wakulindizga munthazi) panji kumuwuska ku ŵakufwa, kuti wazakasange umoyo wamuyirayira. Yehova ni Dada wakucanya wacitemwa na waciwuravi nadi.

Kufuma apo, Yesu wakukhuŵilizga ŵasambiri ŵake na ntharika iyo yikulongora kuti Yehova wakuŵapwelelera comene. Wakufumba kuti: “Asi mpheta ziŵiri zikugulika na kanjawala kakuzirwa pacoko? Ndipouli, nanga njimoza ya izi yikuwa pasi cara kwambura Ŵawiskemwe kumanya. Kweni nanga ni masisi gha mu mitu yinu ghose ghali kupendeka. Ntheura kopa cara: Imwe muli ŵakuzirwa kuluska mpheta zinandi.”

Uthenga wa Ufumu uwo Yesu wakutuma ŵasambiri ŵake kukapharazga, uzamucitiska ŵanthu ŵa nyumba yimoza kugaŵikana, pakuti ŵanji ŵamuwupokelera ndipo ŵanji ŵamuwukana. Iyo wakulongosora kuti: “Mungaghanaghananga cara kuti nkhiza kuzakaŵika mtende pa caru capasi; nkhiza kuzakaŵikapo mtende cara, kweni lupanga.” Ntheura, kuti munthu yumoza mu mbumba wazomere unenesko wa mu Baibolo wakukhumbikwira cikanga. Yesu wakuti: “Uyo wali na citemwa cikuru pa ŵawiske panji ŵanyina kuluska pa ine, ngwakwenelera ine cara; ndipo uyo wali na citemwa cikuru pa mwana mwanalume panji mwana msungwana kuluska pa ine, ngwakwenelera ine cara.”

Paumaliro, Yesu wakulongosora kuti awo ŵakupokelera ŵasambiri ŵake ŵakupokelera na iyo wuwo. Wakuti: “Yose uyo wakupa yumoza wa ŵacoko aŵa nkhombo ya maji ghakuzizima kuti wamwe cifukwa cakuti ni msambiri, nadi pano, nkhumuphalirani, njombe yake yitayikenge cara.” Mateyu 10:16-42.

▪ Kasi Yesu wakuŵacenjezga vici ŵasambiri ŵake?

▪ Kasi wakuŵakhwimiska na kuŵasanguluska wuli?

▪ Cifukwa wuli ulongozgi wa Yesu ukugwiraso nchito ku Ŵakhristu mazuŵa ghano?

▪ Kasi msambiri wa Yesu wali pacanya pa msambizgi wake cara mu nthowa wuli?