Cipaturo 44

Wakucetamiska Cimphupulu Cakofya

YESU watangwanika zuŵa lose ili. Wasambizga mizinda pa nyanja, kufuma apo walongosolera ŵasambiri ŵake ng’anamuro la ntharika kwaŵekha. Kwati kwaŵa mise, wakuti: “Tiyeni tambukire ku sirya linyake mumphepete mwa nyanja.”

Kuvuma kwa Nyanja ya Galileya kuli cigaŵa cakucemeka Dekapoli. Lizgu ili likufuma ku la Cigiriki lakuti deʹka, ilo likung’anamura “khumi,” ndiposo poʹlis, ilo likung’anamura “msumba.” Mu misumba ya Dekapoli ndimo ŵanthu ŵakulondezga comene maluso gha Ŵagiriki, nangauli Ŵayuda ŵanandi ŵakwenera kuti ŵakukhalaso mwenemumu. Ndipouli, mu cigaŵa ici Yesu wakucitamo vinthu vicoko. Nanga mpha ulendo uwu, nga umo tiwonerenge, iyo wakukanizgika kukhalako nyengo yitali.

Apo Yesu wakupempha kuti ŵafumeko kuya ku sirya linyake la nyanja, ŵasambiri ŵake ŵakumukwezga pa boti. Ndipouli, ŵanthu ŵaŵawona kuti ŵafumapo. Mwaluŵiro, ŵanji ŵakukwera maboti ghawo kuti ŵaŵalondezge. Ni mtunda utali yayi. Nakuti Nyanja ya Galileya njikuru, mu utali yili pafupifupi makilomita 21 ndipo mu usani makilomita 12.

Nchakupulikikwa kuti Yesu ngwakuvuka comene. Ntheura, mwaluŵiro ŵati ŵanyamuka, wakugona kumasinda kwa boti, wakuŵika mutu wake pa msamiro, ndipo wakugona tulo. Ŵapositole ŵanandi ŵakumanya makora kwenda pa nyanja, pakuti ŵaloŵa somba nyengo yitali pa Nyanja ya Galileya. Ntheura ndiwo ŵakwendeska boti.

Kweni ulendo uwu kuti uŵenge upusu yayi. Cifukwa ca cithukivu ico cikuŵa pa nyanja, iyo yili musi comene kuluska nyanja zinyake, na mphepo yakuzizima iyo yikuŵa mu mapiri ghapafupi, nyengo zinyake mphepo yankhongono yikuputa pa nyanja iyi na kwambiska cimphupulu cakofya. Ivi ndivyo vikucitika sono. Mwaluŵiro majigha ghakwamba kutimba boti ndipo maji ghakunjira mukati, mwakuti lili pafupi kubira. Ndipouli, Yesu wacali mu tulo.

Ŵanalume ŵakumanya kwenda pa nyanja aŵa, ŵakuyezgayezga kwendeska boti. Tikukayika yayi kuti ŵali kwendapo kale mu vimphupulu vinandi kumasinda. Kweni sono vinthu vyaŵasuzga. Pakopa kuti ŵangafwa, ŵakuwuska Yesu. Ŵakucemerezga kuti: ‘Fumu, kasi mukupwelelerako yayi? Tikubira! Tiponoskani, tibirenge!’

Wati wawuka, Yesu wakulangura mphepo na nyanja, wakuti: “Cetama! Khala cete!” Ndipo mphepo yikuleka na nyanja yikukhala bata. Pakung’anamukira ku ŵasambiri ŵake, wakufumba kuti: ‘Cifukwa wuli mukopa nthena? Kasi mulije cipulikano nipera?’

Ŵati ŵawona ivi, ŵasambiri ŵakofiwa comene. Ŵakufumbana kuti: ‘Kasi munthu uyu ni njani comenecomene, pakuti wakulangura mphepo na maji wuwo, ndipo vikumupulikira?’

Yesu walongora nkhongono zikuru nadi. Ici cikutisimikizgira kuti Themba lithu lili na nkhongono pa vinthu vyacilengiwa, ndipo para lazakamba kunozga caru capasi mu Ufumu wake, ŵanthu wose ŵazamukhala mwakufwasa kwambura kopa masoka ghacilengiwa.

Cimphupulu cati caleka, Yesu na ŵasambiri ŵake ŵakufika makoraghene ku sirya linyake la nyanja. Panji maboti ghanyake ghapona cimphupulu ici ndipo ghafika makora kwawo. Mariko 4:35–5:1; Mateyu 8:18, 23-27; Luka 8:22-26.

▪ Kasi Dekapoli cikung’anamuraci, ndipo cigaŵa ici cikusangika nkhu?

▪ Kasi ni vinthu wuli ivyo vikupangiska kuti pa Nyanja ya Galileya paŵenge vimphupulu vyakofya?

▪ Kasi ŵasambiri ŵakucitaci, maluso ghawo ghakwendeskera boti ghati ghatondeka?