Cipaturo 2

Wakucindikika Pambere Wandababike

MUNGELO Gabriyeli wati waphalira Mariya kuti wababenge mwana msepuka uyo wazamuŵa themba lamuyirayira, Mariya wakuti: “Kasi ici cicitikenge wuli apo nkhumanyana na mwanalume cara?”

Gabriyeli wakulongosora kuti: “Mzimu utuŵa wizenge pa iwe, ndipo nkhongono ya Wapacanya Nkhanira yikubenekelerenge. Kweniso pa cifukwa ici, uyo wababikenge wazamucemeka mutuŵa, Mwana wa Ciuta.”

Kuti Mariya wagomezge uthenga wake, Gabriyeli wakulutilira kuti: “Ndipo wona! mbali wako Elizabeti nayo wali kuzuwuka mwana msepuka mu ucekuru wake, ndipo uwu ni mwezi wake wacinkhondi na cimoza, mweneuyo wakacemekanga cumba; cifukwa kwa Ciuta palije mazgu agho ghaŵenge ghambura macitiko.”

Mariya wakupulikira mazgu gha Gabriyeli. Ndipo kasi wakuti wuli? Mariya wakuti: “Wonani! muzgakazi wa Yehova! Vicitike kwa ine mwakuyana na mazgu ghinu.”

Gabriyeli wati waluta, Mariya wakunozgeka na kunyamuka kuya kwa Elizabeti, uyo wakukhala mu caru ca mapiri ca Yudeya, pamoza na mfumu wake Zekariya. Uwu ni mtunda utali, wa mazuŵa ghatatu panji ghanayi, kufuma ku Nazarete uko Mariya wakukhala.

Mariya wati wafika pa nyumba ya Zekariya, wakunjira na kutawuzga. Pa ici, Elizabeti wakuzuzgika na mzimu utuŵa, ndipo wakuti kwa Mariya: “Wakutumbikika ndiwe pakati pa ŵanakazi, ndipo cakutumbikika nchipambi ca nthumbo yako! Sono vyaŵa wuli kuti mwaŵi uwu ngwane, wakuti nyina wa Fumu yane wize kwa ine? Pakuti wona! mazgu gha kutawuzga kwako ghanguti ghafika mu makutu ghane, bonda mu nthumbo yane wangubwalanthuka na kukondwa kukuru.”

Wati wapulika ici, Mariya wakuzgora na mtima wakuwonga wakuti: “Umoyo wane ukukuzga Yehova, ndipo mzimu wane ungaleka cara kuŵa na cimwemwe cikuru kwa Ciuta Mponoski wane; cifukwa walaŵiska kuyuyuka kwa muzgakazi wake. Pakuti wonani! kufuma sono kuya munthazi miwiro yose yinicemenge wakutumbikika; cifukwa Wankhongono wanicitira milimo yikuru.” Nangauli Mariya watemweka ntheura, iyo wakucindika Ciuta. Wakuti: “Lituŵa ni zina lake; ndipo miwiro na miwiro, cisungusungu cake cili pa awo ŵakumopa.”

Mariya wakulutilira kulumba Ciuta mu sumu iyo mbucimi, wakuti: “Iyo wacita mwankhongono na woko lake, wambininiska awo mbakujikuzga mu makhumbiro gha mitima yawo. Wabwanthulira pasi ŵanthu ŵankhongono pa vizumbe na kukwezga ŵapasi; wakhorweska fikepo ŵanjara na vinthu viwemi ndipo waŵawezga mawoko ghawaka awo ŵakaŵa na vyuma. Wathelera Israyeli muteŵeti wake, kuti wakumbuke cisungusungu, umo wakayowoyera ku ŵasekuru ŵithu, kwa Abrahamu na ku mphapu yake muyirayira.”

Mariya wakukhala na Elizabeti pafupifupi myezi yitatu, ndipo tikukayika yayi kuti wakumovwira comene mu sabata zaumaliro za nthumbo yake. Nchiwemi nadi kuti ŵanakazi ŵakugomezgeka ŵaŵiri aŵa, awo ŵatora nthumbo mwakovwirika na Ciuta, ŵali pamoza pa nyengo iyi yeneiyo ŵatumbikikira mu umoyo wawo.

Kasi mwawona umo Yesu wangucindikikira pambere wandababike? Elizabeti wangumucema kuti “Fumu yane,” ndipo mwana wake wangubwalanthuka na kukondwa apo Mariya wafikanga. Kweni, nga umo tiwonerenge, ŵanji ŵamucindikenge viŵi yayi Mariya na mwana wake uyo wacali wandababike. Luka 1:26-56.

▪ Kasi Gabriyeli wakuyowoya vici kuti wawovwire Mariya kupulikiska umo waŵirenge na nthumbo?

▪ Kasi Yesu wakacindikika wuli pambere wandababike?

▪ Kasi Mariya wakuyowoya vici mu sumu yakulumba Ciuta iyo ni ucimi?

▪ Kasi Mariya wakukhala na Elizabeti kwa utali wuli, ndipo cifukwa wuli nchakwenelera kuti wakhale na Elizabeti pa nyengo iyi?