Cipaturo 25

Wakucitira Lusungu Wavyoni

APO Yesu na ŵasambiri ŵake ŵanayi ŵakwendera misumba ya mu Galileya, nkhani ya vinthu vyakuzizwiska ivyo wakucita yikuthandazgika mu cigaŵa cose. Nkhani iyi yafika mu msumba unyake umo muli munthu wakulwara vyoni. Mcizgi Luka wakumulongosora kuti ni munthu “wakuzura na vyoni.” Para nthenda iyi yapalara, yikunanga viŵaro vyakupambanapambana vya thupi. Ntheura munthu wavyoni uyu wakucitiska citima comene.

Apo Yesu wakufika mu msumba uwu, wavyoni wakwiza kwa iyo. Mwakuyana na Dango la Ciuta, wavyoni wakwenera kucemerezga kuti “Ndafipirwa, ndafipirwa!” kucenjezga ŵanji kuti ŵaleke kusendelera kufupi na kwamburako vyoni. Sono wavyoni uyu wakujikama pasi na kuŵeyelera Yesu kuti: “Fumu, usange mukukhumba, munganitozga.”

Munthu uyu wali na cipulikano cikuru nadi mwa Yesu! Ndipouli, cifukwa ca nthenda yake wakwenera kuti wakucitiska citima comene. Kasi Yesu wacitengeci? Muŵenge imwe mphanyi mwacita vici? Pakumulengera lusungu, Yesu wakunyoloska woko lake na kumukhwaska munthu uyu, ndipo wakuti: “Nkhukhumba. Tozgeka.” Ndipo nyengo yeneyiyo vyoni vikufumako kwa iyo.

Kasi mungatemwa kuti munthu walusungu nga ni uyu ŵaŵe themba linu? Ivyo Yesu wacitira wavyoni vikutipa cigomezgo cakuti mu Ufumu wake, ucimi wa mu Baibolo uzamufiskika, uwo ukuti: “Wakufwira lusungu ŵakutemphentha na ŵakavu, na kuponoska mizimu ya ŵasauci.” Enya, nyengo iyo, Yesu wazamufiska khumbo lake la kovwira ŵakusuzgika wose.

Ŵanthu ŵakukondwa comene na uteŵeti wa Yesu, nanga ni apo wandacizge munthu wavyoni. Pakufiska ucimi wa Yesaya, Yesu wakulangura munthu uyo wacizgika kuti: “Woneseska kuti uleke kuphalira kanthu munthu waliyose.” Ndipo wakumuphaliraso kuti: “Luta ukajilongore wamwene kwa musofi ndipo cifukwa ca kutozgeka kwako ukapeleke vinthu ivyo Mozesi wakalangura, kuti uŵe ukaboni kwa iwo.”

Kweni munthu uyu ngwakukondwa comene mwakuti wakutondeka kujikora. Wakuluta na kwamba kuthandazga nkhani iyi kulikose, ndipo wakwenera kuti wakucitiska ŵanthu kunweka na kukhumbisiska kumuwona Yesu, mwakuti Yesu wakutondeka kunjiraso mu msumba pakweru. Ntheura Yesu wakukhala ku malo agho kulije ŵanthu, ndipo ŵanthu ŵakufuma ku vigaŵa vyose ŵakwiza na kuzakamupulikizga ndiposo kucizgika ku matenda ghawo. Luka 5:12-16; Mariko 1:40-45; Mateyu 8:2-4; Leviticus 13:45; 14:10-13; Salmo 72:13; Yesaya 42:1, 2.

▪ Kasi nthenda ya vyoni yikucita nayo wuli munthu, ndipo wavyoni wakeneranga kupeleka cenjezgo wuli?

▪ Kasi wavyoni wakumuŵeyelera wuli Yesu, ndipo tikusambiraci pa ivyo Yesu wakucita?

▪ Kasi munthu uyo wacizgika wakutondeka wuli kupulikira Yesu, ndipo nchivici cikucitika?