Cipaturo 70

Wakucizga Munthu Uyo Wakababika Wacibulumutira

APO Ŵayuda ŵakukhumba kumuswa na malibwe, Yesu wakufumamo yayi mu Yerusalemu. Pamanyuma, pa Sabata, iyo na ŵasambiri ŵake ŵakwenda mu msumba apo ŵakuwona munthu uyo ngwacibulumutira ciwiro. Ŵasambiri ŵakufumba Yesukuti: “Rabi, ni njani wakananga, munthu uyu panji ŵapapi ŵake, ntheura kuti wakababika wacibulumutira?”

Panji ŵasambiri ŵakugomezga kuti munthu wangananga uku wali mu nthumbo ya ŵanyina, nga umo ŵarabi ŵanji ŵakugomezgera. Kweni Yesu wakuzgora kuti: “Munthu uyu wakananga cara nesi ŵapapi ŵake, kweni cikacitika mwakuti milimo ya Ciuta yiwoneke mwa iyo.” Munthu uyu wakababika wacibulumutira cifukwa cakuti wakananga yayi, nesi ŵapapi ŵake pera. Ŵanthu wose mbambura kufikapo cifukwa ca kwananga kwa munthu wakwamba Adamu, lekani ŵakubabika na vilema, ciyelezgero nkhubabika wacibulumutira. Suzgo ilo munthu uyu wali nalo likupeleka mwaŵi wakuti Yesu walongore milimo ya Ciuta.

Yesu wakulongora kuti milimo iyi yikwenera kucitika mwaluŵiro. Iyo wakuti: “Tikwenera kucita milimo ya uyo wali kunituma apo kucali muhanya; usiku ukwiza mu weneuwo palije munthu wangacita mulimo. Apo nicali mu caru, ndine ungweru wa caru.” Sonosono apa, Yesu wafwenge na kuŵa mu cisi ca dindi, umo wangacita kalikose yayi. Pasono wakungweluska caru.

Wati wayowoya vinthu ivi, Yesu wakuthunya mata pasi ndipo wakukonkha dongo na mata. Wakuŵika dongo ili mu maso gha munthu wacibulumutira, ndipo wakuti: “Luta kageze mu ciziŵa ca Siloamu.” Munthu uyu wakupulikira. Ndipo wati wageza, wakwamba kuwona. Pakuwera, wakusekelera comene pakuti nkhakwamba kuwona mu umoyo wake.

Ŵazengezgani na ŵanji awo ŵakumumanya ŵakuzizwa. Ŵakufumba kuti: “Asi munthu uyu ndiyo wakakhalanga pasi na kupempheska?” Ŵanji ŵakuzgora kuti: “Ni mweneyuyo.” Kweni ŵanji ŵakugomezga yayi, ŵakuti: “Ndiyo cara, kweni wakukozgana nayo.” Ndipouli, mweneko wakuti: “Ndine.”

Ŵanthu ŵakufumba kuti: “Ipo maso ghako ghajulika wuli?”

Iyo wakuzgora kuti: “Munthu wakucemeka Yesu wangukonkha dongo na kuliphaka mu maso ghane ndipo wanguti kwa ine, ‘Luta ku Siloamu ndipo ukageze.’ Ntheura nanguluta na kugeza ndipo namba kuwona.”

Ŵakufumba kuti: “Munthu uyo wali nkhu?”

Wakuzgora kuti: “Nkhumanya cara.”

Sono ŵanthu ŵakumulongozgera munthu uyo wakaŵa wacibulumutira ku Ŵafarisi, awo mbalongozgi ŵawo ŵa cisopa. Nawo ŵakwamba kumufumba umo wambira kuwona. Munthu uyu wakulongosora kuti: “Wanguphaka dongo mu maso ghane, ndipo nangugeza na kwamba kuwona.”

Nadi, Ŵafarisi ŵeneranga kusekelera na munthu wakupempheska uyo sono wacizgika. Kweni iwo ŵakumususka Yesu. Ŵakuti: “Uyu ni munthu wakufuma kwa Ciuta cara.” Cifukwa wuli ŵakuyowoya nthena? “Cifukwa wakusungilira cara Sabata.” Ndipouli, Ŵafarisi ŵanji ŵakuzizwa, ŵakuti: “Kasi munthu uyo ngwakwananga wangacita wuli vimanyikwiro vya mtundu uwu?” Ntheura pali kugaŵikana pakati pawo.

Ndipo ŵakufumba munthu uyu kuti: “Iwe ukuti wuli vya iyo, pakuwona kuti wajura maso ghako?”

Iyo wakuzgora kuti: “Ni nchimi.”

Ŵafarisi ŵakukana kugomezga fundo iyi. Ŵakughanaghana kuti Yesu na munthu uyu ŵapangana kuti ŵapusike ŵanthu. Ntheura kuti ŵamazge nkhani iyi, ŵakucema ŵapapi ŵa munthu uyu kuti ŵaŵafumbe. Yohane 8:59; 9:1-18.

▪ Nchivici ico cikapangiska kuti munthu uyu waŵe wacibulumutira, ndipo nchivici ico cikapangiska yayi?

▪ Kasi usiku uwo palije munthu wangagwira nchito ni vici?

▪ Munthu wati wacizgika, kasi awo ŵakumumanya ŵakucita wuli?

▪ Kasi Ŵafarisi ŵakugaŵikana wuli pa kucizgika kwa munthu uyu?