Cipaturo 33

Wakufiska Ucimi wa Yesaya

YESU wati wamanya kuti Ŵafarisi na ŵakulondezga cipani ca Herode ŵapangana kuti ŵamukome, iyo na ŵasambiri ŵake ŵakufumapo na kuya ku Nyanja ya Galileya. Wati wafika uku, mizinda yikuru kufuma ku malo ghose mu Palestina, nanga nkhuwaro kwa mphaka zake, yikuthilimukira kwa iyo. Wakucizga ŵanandi, mwakuti wose awo ŵali na matenda ghakofya ŵakufyenyana kuti ŵamukhwaske.

Cifukwa cakuti mzinda ngukuru comene, Yesu wakuphalira ŵasambiri ŵake kuti ŵatore boti mwakuti wakhalemo. Para wangaŵa pataliko na mlima, mizinda yingamufyenya yayi. Wangasambizga ŵanthu uku wali mu boti panji kwendapo kuya ku cigaŵa cinyake mumphepete mwa nyanja kukawovwiraso ŵanthu ŵanyake.

Msambiri Mateyu wakulongora kuti ivyo Yesu wakucita vikufiska “ico cikayowoyeka kwizira mwa Yesaya nchimi.” Kufuma apo, Mateyu wakuzunura ucimi uwo Yesu wakufiska, wakuti:

“Wonani! Muteŵeti wane uyo nkhamusora, wakutemweka wane, mweneuyo umoyo wane ukukondwa nayo! Niŵikenge mzimu wane pa iyo, ndipo walongorenge makoraghene uwo mburunji ku mitundu. Wakwesanenge na munthu cara, nesi kucemerezga, nesi munthu kupulika mazgu ghake mu nthowa zisani. Thete lakuphwanyika waliteketenge cara, ndipo cisunda cakulota wazimyenge cara, mpaka wacitiske urunji kutonda. Nadi, mu zina lake, mitundu yizamugomezga.”

Yesu ndiyo ni muteŵeti wakutemweka uyo Ciuta wakukondwa nayo. Ndipo Yesu wakulongora makoraghene uwo mburunji weneco, weneuwo ukujandizgika na maluso gha cisopa cautesi. Cifukwa ca kung’anamulira uheni dango la Ciuta, Ŵafarisi ŵangawovwira yayi munthu mulwari pa Sabata. Pakulongora makoraghene urunji wa Ciuta, Yesu wakufwatura ŵanthu ku maluso ghambura urunji, ndipo pa cifukwa ici, ŵalongozgi ŵa cisopa ŵakukhumba kumukoma.

Kasi cikung’anamuraci kuti ‘wakwesanenge na munthu cara, nesi kucemerezga mwakuti wapulikikwe mu nthowa zisani’? Apo wakucizga ŵanthu, Yesu ‘wakuŵacinyinthizga kuti ŵaleke kumuvumbura.’ Wakukhumba yayi kuti ŵanthu ŵamuhayenge mu misewu panji kuti ŵanthu ŵaphaliranenge vinthu vya iyo, cifukwa nyengo zinyake ŵangayowoya vyakubudika.

Kweniso Yesu wakupharazga uthenga wake wa cisangulusko ku ŵanthu awo ŵakuyana waka na thete lakuphwanyika, lakuphyoka ilo ŵanthu ŵakukandapo. Ŵali nga nchisunda cakulota, ico cakhala pacoko waka kuti cizimwirethu. Yesu wakuteketa yayi thete lakuphwanyika nesi kuzimya cisunda cakulota ico cikusunkha josi. Kweni wakuwuska ŵakuzika mwalusungu na citemwa. Nadi, Yesu ndiyo mitundu yingagomezga! Mateyu 12:15-21; Mariko 3:7-12; Yesaya 42:1-4.

▪ Kasi Yesu wakulongora wuli urunji kwambura kukwesana na ŵanthu panji kutumphuska mazgu ghake mu nthowa zisani?

▪ Mbanjani awo ŵali nga ni thete lakuphwanyika na cisunda cakulota, ndipo Yesu wakucita nawo wuli?