Cipaturo 48

Wakufuma ku Nyumba ya Yayiro Ndipo Wakuwelera ku Nazarete

YESU watangwanika zuŵa lose. Wenda ulendo wa pa nyanja kufuma ku Dekapoli, wacizga mwanakazi wakusulura ndopa, ndiposo wawuska mwana wa Yayiro ku ŵakufwa. Kweni zuŵa licali waka. Apo Yesu wakufuma ku nyumba ya Yayiro, ŵanalume ŵaŵiri ŵacibulumutira ŵakumulondezga, ŵakucemerezga kuti: “Muŵe nase na cisungusungu, Mwana wa Davide.”

Pakucema Yesu kuti “Mwana wa Davide,” ŵanalume aŵa ŵakulongora kuti ŵakugomezga kuti Yesu ni muhaliri wa cizumbe ca Davide, ntheura ni Mesiya wakulayizgika. Ndipouli, Yesu wakuŵa nga kuti wakuŵazerezga apo ŵakucemerezga kuti waŵawovwire. Panji wakucita nthena kuti wawone usange mbakukhumbisiska nadi. Kweni ŵanthu aŵa ŵakuleka yayi. Ŵakulondezga Yesu mpaka uko wakukhala, ndipo wati wanjira mu nyumba, nawo ŵakunjira.

Mwenemura, Yesu wakuŵafumba kuti: “Kasi muli na cipulikano kuti ningacita ici?”

Ŵakuzgora na cigomezgo cose kuti: “Enya Fumu.”

Ntheura, apo wakukhwaska maso ghawo, Yesu wakuti: “Mwakuyana na cipulikano cinu, cicitike ntheura kwa imwe.” Nyengo yeneyiyo ŵakwamba kulaŵiska. Ndipo Yesu wakuŵacinyinthizga kuti: “Woneseskani kuti munthu waleke kucimanya ici.” Kweni cifukwa ca kukondwa, ŵakusulako ivyo Yesu waŵaphalira ndipo ŵakuyowoya vya iyo mu vikaya vyose.

Apo ŵanalume aŵa ŵakuluta, ŵanthu ŵakwiza na munthu wakukoleka na ciŵanda ico cikumutondeska kuyowoya. Yesu wakufumya ciŵanda ici, ndipo nyengo yeneyiyo munthu uyu wakwamba kuyowoya. Mizinda yikuzukuma na minthondwe iyi, yikuti: “Cinthu canthena ici cindawonekepo mu Israyeli.”

Ŵafarisi nawo ŵalipo. Ŵangakana yayi kuti minthondwe yacitika, kweni cifukwa cakuti ŵandakhumbe kugomezga, ŵakuwerezgaso kumupa mulandu pa nkhongono izo Yesu wakucitira milimo iyi, ŵakuti: “Wakufumiska viŵanda na nkhongono za muwusi wa viŵanda.”

Mwaluŵiro vinthu ivi vyati vyacitika, Yesu wakuwelera ku tawuni yakwake ya Nazarete, ndipo pa nyengo iyi wali na ŵasambiri ŵake. Pafupifupi cilimika cimoza kumasinda, wakanjira mu sunagoge na kusambizga mwenemura. Nangauli pakwamba ŵanthu ŵakazukuma na mazgu ghake ghakukondweska, pamanyuma ŵakakhuŵara na cisambizgo cake ndipo ŵakakhumba kumukoma. Sono Yesu mwacisungusungu wakukhumbaso kovwira ŵazengezgani ŵake ŵakale.

Apo mu vigaŵa vinyake ŵanthu ŵakuthilimukira kwa Yesu, uku ndimo ŵakucitira yayi. Ntheura pa Sabata, wakuluta mu sunagoge kukasambizga. Ŵanandi awo ŵakumupulika ŵakuzizikika. Ŵakufumba kuti: “Kasi munthu uyu wali kuvitora nkhu vinjeru ivi na milimo yankhongono iyi? Asi uyu ni mwana wa misiri wa mathabwa? Asi ŵanyina zina lawo mba Mariya, ndipo ŵanung’una ŵake ni Yakobe na Yosefe na Simoni na Yudasi? Ndipo ŵadumbu ŵake, asi wose ŵali pamoza na ise? Ni nkhu pera uko munthu uyu wali kuvitora vinthu vyose ivi?”

Iwo ŵakuti, ‘Yesu wakuyana waka na ise. Tikamuwonanga wakukura, ndiposo mbumba yake tikuyimanya. Kasi wangaŵa wuli Mesiya?’ Ntheura nangauli ukaboni ŵakuwuwona, nga ni vinjeru vyake vikuru ndiposo minthondwe iyo wakucita, kweni ŵakumukana. Cifukwa ca kumuzgoŵera comene, nanga mbabali ŵake ŵeneko ŵakukhuŵara nayo, ico cikupangiska Yesu kuyowoya kuti: “Kulikose nchimi yikucindikika, kupatulako mu caru ca kwawo na pakati pa ŵabali ŵake na mu nyumba yake.”

Nadi, Yesu wakuzizwa kuti ŵalije cipulikano. Ntheura wakucitako munthondwe uliwose yayi kura padera pa kuŵika mawoko ghake pa ŵalwari ŵacoko waka na kuŵacizga. Mateyu 9:27-34; 13:54-58; Mariko 6:1-6; Yesaya 9:7.

▪ Pakucema Yesu kuti “Mwana wa Davide,” kasi ŵanalume ŵacibulumutira ŵakulongora kuti ŵakugomezga vici?

▪ Kasi Ŵafarisi ŵakulongosora kuti Yesu wakuzitora nkhu nkhongono zakucitira minthondwe?

▪ Cifukwa wuli tingayowoya kuti Yesu walongora cisungusungu pakuwelera ku Nazarete kuti wawovwire ŵanthu?

▪ Kasi ŵanthu ŵakumupokelera wuli Yesu mu Nazarete, ndipo cifukwa wuli?