Cipaturo 28

Wakufumbika za Kuziŵizga Kurya

PAJUMPHA pafupifupi cilimika cimoza kufuma apo Yesu wakaŵira pa Paska wa 30 C.E. Pasono, Yohane Mbapatizi wajalirika mu jele kwa myezi yinandiko. Nangauli Yohane wakakhumbanga kuti ŵasambiri ŵake ŵaŵe ŵalondezgi ŵa Khristu, kweni ni wose yayi awo ŵacita ntheura.

Sono ŵasambiri ŵanji ŵa Yohane, uyo wali mu jele, ŵakwiza kwa Yesu na kumufumba kuti: “Cifukwa wuli ise na Ŵafarisi tikuziŵizga kurya kweni ŵasambiri ŵinu ŵakuziŵizga cara?” Ŵafarisi ŵakuziŵizga kurya kaŵiri mu sabata nga nkhaluso ka cisopa cawo. Ŵasambiri ŵa Yohane nawo ŵakwenera kuti ŵakulondezga kaluso kenekaka. Panji cingaŵaso kuti ŵakuziŵizga kurya cifukwa ŵali na citima kuti Yohane wakakika ndipo ŵakuzizwa kuti ŵasambiri ŵa Yesu ŵakuziŵizga yayi kulongora citima.

Pakuzgora, Yesu wakulongosora kuti: “Kasi ŵabwezi ŵa mwenenthengwa ŵali na cifukwa cakutengelera peneapo mwenenthengwa wacali nawo? Kweni mazuŵa ghizenge apo mwenenthengwa wazamutolekako kwa iwo, penepapo ndipo ŵazamuziŵizga kurya.”

Ŵasambiri ŵa Yohane ŵakwenera kukumbuka kuti Yohane wakayowoya za Yesu kuti ni Mwenenthengwa. Ntheura peneapo Yesu walipo, Yohane wangawona kuti nchakwenelera yayi kuziŵizga kurya. Ŵasambiri ŵa Yesu nawo ntheura pera. Munthazi, para Yesu wafwa, ŵasambiri ŵake ŵazamutengera na kuziŵizga kurya. Kweni para wawuskika na kukwelera kucanya, ŵazamukhumbikwiraso kutengera na kuziŵizga kurya cara.

Kufuma apo, Yesu wakuyowoya ntharika izi: “Palije munthu uyo wakusona cigamba ciphya pa laya lakuwaro lakale; cifukwa nkhongono yake yose yingaguza laya lakuwaro ndipo kupaluka kwake kungaŵa kuheni comene. Nesi ŵanthu kuti ŵakuŵika vinyo liphya mu mathumba gha vikumba ghakale cara; kweni usange ŵacita ntheura, mbwenu mathumba gha vikumba ghakuphumuka ndipo vinyo likuthika na mathumba gha vikumba nagho ghakunangika. Kweni ŵanthu ŵakuŵika vinyo liphya mu mathumba gha vikumba ghaphya.” Kasi ntharika izi zikukolerana wuli na kuziŵizga kurya?

Yesu wakovwira ŵasambiri ŵa Yohane Mbapatizi kumanya kuti paŵavye munthu waghanaghane kuti ŵasambiri ŵake ŵatolerenge maluso ghakale gha cisopa ca Ŵayuda, nga nkhuziŵizga kurya. Yesu wakizira kugambika na kulutizga maluso gha kasopero kakale ako kali pafupi kutayika cara. Cikhristu cikenera cara kutolera cisopa ca Ŵayuda ca mu nyengo iyo pamoza na maluso gha ŵanthu. Kuti cikwenera kuŵa nga nchigamba ciphya pa laya lakale panji vinyo liphya mu mathumba ghakale yayi. Mateyu 9:14-17; Mariko 2:18-22; Luka 5:33-39; Yohane 3:27-29.

▪ Mbanjani ŵakuziŵizga kurya, ndipo pa cifukwa wuli?

▪ Cifukwa wuli ŵasambiri ŵa Yesu ŵakuziŵizga kurya yayi apo wacali nawo, ndipo kasi munthazi ŵazamuŵavya wuli cifukwa cakuziŵizgira kurya?

▪ Kasi Yesu wakuyowoya ntharika wuli, ndipo zikung’anamuraci?