Cipaturo 46

Wakukhwaska Laya Lake

NKHANI yakuti Yesu wawerako ku Dekapoli yafika ku Kaperenaumu, ndipo mzinda ukuru wawungana mumphepete mwa nyanja kuti umupokelere. Kwambura kukayika, mzinda uwu wapulika kuti Yesu wakacetamiska cimphupulu na kucizga ŵanalume ŵakukoleka na viŵanda. Sono apo wakufika pa mlima, ŵakumuwungilira, ndipo mbakunweka comene.

Yumoza uyo wakukhumba comene kuwonana na Yesu ni Yayiro, mulongozgi wa sunagoge. Wakujikama pafupi na Yesu ndipo wakumuŵeyelera kanandi waka, kuti: “Kana kane kasungwana nkhalwari nkhanira. Conde zani na kuŵika mawoko ghinu pa iko kuti kacire na kuŵa kamoyo.” Pakuti ni mwana wake yumoza pera ndipo wali na vilimika 12, ngwakuzirwa comene kwa Yayiro.

Yesu wakuzomera ndipo wakulongozgana na mzinda, kuluta ku nyumba ya Yayiro. Ŵanthu ŵakwenera kuti mbakukondwa comene apo ŵakukhazga kuti wamucitaso munthondwe unyake. Kweni mwanakazi yumoza mu mzinda uwu, maghanoghano ghali pa suzgo ilo wali nalo.

Mwanakazi uyu wasuzgika na nthenda ya kusulura ndopa kwa vilimika 12. Wenda ku ŵadokotala aŵa na aŵa, wamara ndalama zake zose pa kupenja wovwiri. Kweni wandawovwirike, m’malo mwake, sono ndipo suzgo lake lalutilira comene.

Nga umo mukwenera kuti mukumanyira, padera pa kumulopweska, nthenda iyi njakulengeska. Kanandi munthu wakuyowoyera pa wumba yayi nthenda iyi. Kweniso mwakuyana na Dango ilo Ciuta wakapeleka kwizira mwa Mozesi, para mwanakazi wakusulura ndopa wakuŵa wakufipirwa, ndipo waliyose uyo wakhwaska malaya ghake agho ghali na ndopa, wakwenera kugeza ndipo wakuŵa wakufipirwa mpaka mise.

Mwanakazi uyu, wali kupulikapo kuti Yesu wakucita minthondwe, ndipo wamupenjanga. Pakuwona kuti ngwakufipirwa, mwanakazi uyu wakusolota mu mzinda mwacibisibisi, wakuyowoya mu mtima wake kuti: “Usange ningakhwaska waka laya lake lakuwaro, mbwenu niŵenge makora.” Wati wamukhwaska, nyengo yeneyiyo wakuwona kuti ndopa zaleka kusulura.

“Ni njani uyo wanikhwaska?” Fumbo la Yesu ili likwenera kuti lamuciluska mwanakazi uyu! Kasi wamanya wuli? Petrosi wakuti: ‘Msambizgi, mizinda yikumuwungilirani na kumufinyilizgani, ndipo imwe mukuti, “Ni njani wanikhwaska?”’

Apo Yesu wakulaŵiska uku na uku kupenja mwanakazi, wakulongosora kuti: “Munthu munyake wanikhwaska, cifukwa namanya kuti nkhongono zafumamo mwa ine.” Nadi, uku nkhukhwaska bweka yayi, pakuti nkhongono za Yesu zafumamo cifukwa ca kucizga mwanakazi.

Pakuwona kuti wandabisame, mwanakazi uyu wakwiza na kujikama panthazi pa Yesu, wakopa na kutenthema. Panthazi pa ŵanthu wose, wakuphara unenesko wose wa ulwari wake ndiposo umo sono wacizgikira.

Pakuwona kuti wazomera pakweru, Yesu wakumukhwimiska mwalusungu kuti: “Wamwana, cipulikano cako cakucizga. Luta mu mtende, ndipo uŵe makora ku ulwari wako wakofya.” Nchiwemi nadi kumanya kuti Uyo Ciuta wasora kuzakawusa caru capasi ni munthu muwemi, walusungu, uyo wakupwelelera ŵanthu ndiposo wali na nkhongono kuŵawovwira! Mateyu 9:18-22; Mariko 5:21-34; Luka 8:40-48; Leviticus 15:25-27.

▪ Kasi Yayiro ni njani, ndipo cifukwa wuli wakwiza kwa Yesu?

▪ Kasi mwanakazi munyake wali na suzgo wuli, ndipo cifukwa wuli nchakusuzga kwa iyo kwiza kwa Yesu kuti wamovwire?

▪ Kasi mwanakazi wacizgika wuli, ndipo Yesu wakumukhwimiska wuli?