Cipaturo 125

Wakukweŵeka pa Khuni

ŴAKUPOKA vyaŵene ŵaŵiri ŵakulongozgeka pamoza na Yesu kuya ku malo ghakukomekera. Ŵanthu awo ŵakundonda ŵakuyima pa malo ghakucemeka Gologota, panji kuti Malo gha Bwaza, agho ghali patali viŵi yayi na msumba.

Ŵanthu ŵakukakika aŵa ŵakuŵavura malaya ghawo. Ndipo ŵakuŵapa vinyo lakusazgako munkhwala wakucemeka mure. Ŵanakazi ŵa mu Yerusalemu ndiwo ŵakwenera kuti ŵakunozga vinyo ili, ndipo Ŵaroma ŵakukana yayi kuti awo ŵapayikikenge ŵamwenge vinyo ili, ilo likucepeska ulwilwi. Ndipouli, Yesu wati waliceta, wakukana kumwa. Cifukwa wuli? Wakukhumba kuŵa na mahara ghose apo cipulikano cake cikuyezgeka comene.

Sono Yesu ŵamunyoloskera pa khuni ndipo mawoko ghake ghanyoloskekera pacanya pa mutu wake. Ndipo ŵasilikari ŵakukhoma mizumali yikuru mu mawoko na malundi ghake. Apo mizumali yikunjira mu minofu, Yesu wakunyongozeka na ulwilwi. Apo khuni likwimikika, ulwilwi ukusazgikira cifukwa uzito wa thupi lake ukupangiska kuti vilonda vya mizumali visazgikirengeko. Kweni m’malo mwa kuŵafinga, Yesu wakulombera ŵasilikari ŵa Ŵaroma, wakuti: “Ŵadada, muŵagowokere, cifukwa ŵakumanya cara ico ŵakucita.”

Pilato waŵikapo ciphambano pacanya pa khuni, ico cikuŵazgika kuti: “Yesu Munazarete, Themba la Ŵayuda.” Wakulemba nthena cifukwa cakuti wakucindika Yesu kweniso cifukwa cakuti wandakondwe na ŵasofi ŵa Ŵayuda awo ŵamucicizga kuti weruzgire Yesu ku nyifwa. Kuti wose ŵaŵazge ciphambano ici, Pilato wakulembapo mu viyowoyero vitatu, mu Cihebere, mu Cilatini, ndiposo mu Cigiriki.

Ŵalara ŵa ŵasofi, pamoza na Kayafa na Anasi wuwo, ŵandakondwe nagho mazgu agha. Mazgu ghawemi agho Pilato walemba ghakupangiska kuti vinthu vyose vinangike kwa iwo. Ntheura ŵakuti: “Kulemba kuti ‘Themba la Ŵayuda’ cara, kweni kuti iyo wakuti, ‘Ndine Themba la Ŵayuda.’” Pakukwiya cifukwa cakuti ŵasofi ŵamucicizga kucita vinthu, Pilato wakuzgora mwamsinjiro kuti: “Ico nalemba, nalemba.”

Sono ŵasofi pamoza na mzinda ukuru, ŵakuwungana pa malo ghakukomerapo, ndipo ŵasofi ŵakususka ukaboni uwo walembeka pa ciphambano. Ŵakuwerezgapo kuyowoya ukaboni wautesi uwo wangupelekeka apo ŵamweruzganga mu Sanihedirini. Ntheura nchakuzizwiska yayi kuti awo ŵakujumpha mu nthowa, ŵakwamba kuyowoya mwakunyoza, ŵakupukunya mitu yawo ndipo ŵakuti: “Iwe, wamweneiwe ukatenge uwiskirenge pasi tempele na kulizenga mu mazuŵa ghatatu, jiponoska wamwene! Usange ndiwe mwana wa Ciuta, khira pa khuni lakusuzgikirapo!”

Ŵalara ŵa ŵasofi na ŵanyawo ŵa cisopa nawo ŵakunjilirapo, ŵakuti: “Wakaponoska ŵanyake; iyomwene wangajiponoska cara! Iyo ni Themba la Israyeli; sono lekani wakhire pa khuni lakusuzgikirapo ndipo timugomezgenge. Iyo waŵika cigomezgo cake mwa Ciuta; usange Ciuta wakukondwa nayo, ipo wamuthaske, cifukwa wakati, ‘Nili Mwana wa Ciuta.’”

Pakuyegheka, ŵasilikari nawo ŵakwamba kuhoya Yesu. Ŵakumuseka na kumupa vinyo lakuŵaŵa, ndipo ŵakwenera kuti ŵakulikolelera pa milomo yake iyo pasono yomilira. Ŵakumunena kuti: “Usange ndiwe themba la Ŵayuda, jiponoska wamwene.” Nanga mbakupoka vyaŵene, awo ŵapayikika pamoza na Yesu, yumoza kumalyero ndipo munyake kumazere, ŵakumugoska. Ghanaghanirani waka. Munthu mukuru kuluska wose awo ŵali kuŵako, enya, uyo wakawovwiranga apo Yehova Ciuta wakalenganga vinthu vyose, wakusuzgika na nkhaza zose izi.

Ŵasilikari ŵakutora malaya ghakuwaro gha Yesu na kughagaŵa panayi. Ŵakupenduzga kuti ŵawone ico waliyose wapokenge. Ndipouli, laya lamukati lilije musono, ndapacanya comene. Ntheura ŵasilikari ŵakuyowoyeskana kuti: “Tingalipaluranga cara, kweni tiyeni tipenduzge kuti tiwone uyo liŵenge lake.” Ntheura kwambura kumanya, ŵakufiska lemba ilo likuti: “Ŵakagaŵana malaya ghane ghakuwaro, ndipo pa cakuvwara cane ŵakapenduzga.”

Nyengo yeneyiyi, yumoza wa ŵakupoka vyaŵene wakwamba kumanya kuti Yesu wakwenera kuti ni themba nadi. Ntheura, pakucenya munyake, wakuti: “Kasi ukopa Ciuta cara nanga mphacoko, sono pakuti uli mu ceruzgo cakuyana na ca munthu uyu? Ndipo ise, nadi, cikutenelera, pakuti tikupokerathu ico nchakwenelera kwa ise cifukwa ca vinthu ivyo tikacita; kweni munthu uyu wandacite kanthu kaheni.” Kufuma apo, wakuyowoya na Yesu, wakuŵeya kuti: “Muzakanikumbuke para mwiza mu ufumu winu.”

Yesu wakuzgora kuti: “Nadi pano nkhukuphalira muhanya uno, Uzamuŵa na ine mu Paradiso.” Layizgo ili lizamufiskika apo Yesu wazamuwusa nga ni Themba kucanya. Nyengo iyo, wazamuwuskira munthu wakupera uyu ku umoyo wamuyirayira mu Paradiso, uyo ŵanthu awo ŵazamupona pa Haramagedoni ndiposo ŵanyake ŵazamuŵa na mwaŵi kupwelelera. Mateyu 27:33-44; Mariko 15:22-32; Luka 23:27, 32-43; Yohane 19:17-24.

▪ Cifukwa wuli Yesu wakukana kumwa vinyo lakusazgako munkhwala wakucemeka mure?

▪ Kasi cingaŵa cifukwa wuli ico pa khuni la Yesu ŵaŵikirapo ciphambano, ndipo ici cikupangiska kuti Pilato na ŵalara ŵa ŵasofi ŵadumbiskane vici?

▪ Kasi ni nkhaza wuli zinyake izo ŵakumucitira Yesu apo wali pa khuni, ndipo nchivici cikwenera kuti cikupangiska?

▪ Kasi ucimi ukufiskika wuli na ivyo vikucitikira malaya gha Yesu?

▪ Kasi yumoza wa ŵakupoka vyaŵene wakusintha wuli, ndipo Yesu wazamufiska wuli pempho lake?