Cipaturo 103

Wakulutaso ku Tempele

YESU na ŵasambiri ŵake, ŵakhalamo mazuŵa ghatatu mu Betaniya, kufuma apo ŵakizira kufuma ku Yeriko. Sono ni mulenji zuŵa la Mande, pa Nisani 10, ndipo iwo ŵali mu nthowa kuluta ku Yerusalemu. Yesu njara yamukora. Ntheura wati wawona kuti khuni la mkuyu lili na mahamba wakuluta kuti wakawone usange muli vipambi.

Khuni lasunda luŵiro mahamba pakuti nyengo ya vikuyu ni mu Juni, kweni sono ni Malici kuumaliro. Ndipouli, panji Yesu wakughanaghana kuti pakuti mahamba ghasunda luŵiro, ipo vikuyu navyo vikwenera kuti vyaca luŵiro. Wati wafika, wakusangamo kanthu yayi. Mahamba gha khuni ghamupusika. Kufuma apo, Yesu wakutemba khuni, wakuti: “Munthu waleke kuryaso cipambi kufuma mwa iwe muyirayira.” Ivyo vikucitika cifukwa ca ivyo Yesu wacita ndiposo ng’anamuro lake vimanyikwenge mulenji wakulondezgapo.

Apo ŵakulutilira, Yesu na ŵasambiri ŵake ŵakufika ku Yerusalemu. Wakuluta ku tempele, ilo wakendera mayiro namise. Ndipouli, muhanya uno wakucita cinthu ico wakacita vilimika vitatu kumasinda, apo wakiza ku Paska mu 30 C.E. Yesu wakucimbizgira kuwaro awo ŵakuguliska na kugura mu tempele ndiposo kugadabura mathebulu gha awo ŵakusintha ndalama na vitengo vya ŵakuguliska nkhunda. Wakuzomerezga cara kuti munthu wayeghe kanthu kufuma mu tempele.

Pakususka awo ŵakusintha ndalama na ŵakuguliska viŵeto mu tempele, Yesu wakuti: “Asi kuli kulembeka kuti, ‘Nyumba yane yicemekenge nyumba ya lurombo ya mitundu yose’? Kweni imwe mwayizgora mphanji ya ŵakupoka vyaŵene.” Iwo mbakupoka vyaŵene cifukwa cakuti ŵakulipiska ŵanthu ndalama zinandi comene pa viŵeto vya sembe ivyo ŵakuguliska, ŵanthu awo ŵalije kunyake kwakugura. Ntheura Yesu wakuwona kuti malonda gha mtundu uwu ghakuyana waka na kuphanga panji kupoka vyaŵene.

Ŵalara ŵa ŵasofi, ŵalembi, na ŵalaraŵalara ŵa ŵanthu ŵati ŵapulika ivyo Yesu wacita, ŵakupenjaso nthowa yakuti ŵamukomere. Ntheura ŵakulongora kuti ŵangasintha yayi. Kweni ŵakumanya yayi umo ŵangamukomera Yesu, pakuti ŵanthu wose ŵakuskepelera kwa iyo kuti ŵamupulike.

Padera pa Ŵayuda, ŵanthu ŵa mitundu yinyake nawo ŵiza ku Paska. Aŵa mbanthu awo ŵali kunjira cisopa ca Ŵayuda. Sono Ŵagiriki ŵanji, awo ŵakwenera kuti nawo mbakung’anamukira ku Ciyuda, ŵakwiza kwa Filipu na kumupempha kuti ŵawone Yesu. Filipu wakuluta kwa Andireya, panji kuti wamufumbe usange cingaŵa cakwenelera kuti ŵanthu aŵa ŵakumane na Yesu. Yesu wakwenera kuti wacali pa tempele, ndipo Ŵagiriki ŵakumuwona.

Yesu wakumanya kuti kwakhala mazuŵa ghacoko waka kuti wafwe, ntheura wakuyowoya ntharika yiwemi comene pakulongosora za nyifwa iyi, wakuti: “Ora liza kuti Mwana wa munthu wapike ucindami. Nadi, nadi nkhumuphalirani, Kwambura kuti mphuzi ya tirigu yawa pasi na kufwa, yikukhalilira mphuzi yimoza; kweni usange yafwa, sono ndipo yikupambika vipambi vinandi.”

Mphuzi yimoza ya tirigu njakuzirwa comene yayi. Kweni wuli usange yapandika mu dongo na “kufwa,” kumalizga umoyo wake nga ni mbuto? Yikumera ndipo para nyengo yajumphapo yikukura na kupambika mphonje ya mphuzi zinandi comene za tirigu. Ntheura pera, Yesu ni yekha munthu wakufikapo. Kweni usange wafwa wacali wakugomezgeka kwa Ciuta, wakuzgoka nthowa yakupelekera umoyo wamuyirayira ku ŵakugomezgeka awo mbakujipata nga ndiyo. Ntheura, Yesu wakuti: “Uyo wakutemwa umoyo wake wakuwuparanya, kweni uyo wakutinkha umoyo wake mu caru cino wawusungenge kuti wazakasange umoyo wamuyirayira.”

Yesu wakulongora kuti wakujighanaghanira yekha yayi, cifukwa wakulongosoraso kuti: “Usange yunji wakukhumba kuniteŵetera, wanilondezge, ndipo uko ine nili, muteŵeti wane wamuŵaso kwenekuko. Usange yunji wakukhumba kuniteŵetera, Ŵadada ŵamucindikenge.” Iyi ni njombe yapacanya comene iyo yikusangika cifukwa ca kulondezga Yesu na kumuteŵetera. Njombe iyi ni mwaŵi wakupika na Ŵawiske, wa kuŵa pamoza na Khristu mu Ufumu.

Pakughanaghanira za masuzgo ghakuru na nyifwa yakuŵinya ivyo vili pafupi kumuwira, Yesu wakulutilira kuti: “Sono umoyo wane ukukweŵeka, ndipo niyowoyeci? Ŵadada, niponoskani ku ora ili.” Ciŵenge camacitiko kuti ivyo vili pafupi kumucitikira vitondeke, mphanyi vyangutondeka. Ndipouli, iyo wakuyowoya kuti: “Ndico cifukwa nizira ku ora ili.” Yesu wakukolerana na ndondomeko yose ya Ciuta, na nyifwa yake wuwo. Mateyu 21:12, 13, 18, 19; Mariko 11:12-18; Luka 19:45-48; Yohane 12:20-27.

▪ Cifukwa wuli Yesu wakughanaghana kuti wasangengemo vikuyu mu khuni apo ni nyengo yake yayi?

▪ Cifukwa wuli Yesu wakucema awo ŵakuguliska vinthu mu tempele kuti “ŵakupoka vyaŵene”?

▪ Kasi Yesu wakuyana wuli na mphuzi ya tirigu iyo yikufwa?

▪ Kasi Yesu wakujipulika wuli cifukwa ca masuzgo na nyifwa yake ivyo vili pafupi kumuwira?