Cipaturo 68

Wakulutilira Kusambizga pa Zuŵa Lacinkhondi na Ciŵiri

ZUŴA laumaliro la Ciphikiro ca Mahema, ilo ni zuŵa lacinkhondi na ciŵiri, likulutilira. Yesu wakusambizga mu cigaŵa ca tempele cakucemeka “malo ghakusungiramo vyuma.” Agha ghakwenera kuti ni malo agho ghakucemeka Mphara ya Ŵanakazi, uko kuli mabokosi agho ŵanthu ŵakuponyamo vyakupeleka.

Usiku uliwose nyengo ya ciphikiro, mu malo agha gha tempele mukuŵa ungweru wapadera. Ŵakuŵikako vyakuŵikapo nyali vinayi vikuru, cilicose cili na mabeseni ghakurughakuru ghanayi ghakuzura na mafuta. Ungweru wa nyali izi, izo zikugolera na mafuta agho ghali mu mabeseni 16, ngwankhongono comene mwakuti ukuŵala pa mtunda utali usiku. Ivyo Yesu wakuyowoya sono vikukumbuska awo ŵakumupulikizga za ungweru uwu. Yesu wakuti: “Ndine ungweru wa caru. Uyo wakunilondezga wendenge mu cisi cara, kweni waŵenge na ungweru wa umoyo.”

Ŵafarisi ŵakususka kuti: “Ukujicitira ukaboni wamwene, kweni ukaboni wako ngwaunenesko cara.”

Pakuzgora, Yesu wakuti: “Nangauli nkhujicitira ukaboni namwene, ukaboni wane ngwaunenesko, cifukwa nkhumanya uko nili kufuma na uko nkhuya. Kweni imwe mukumanya cara uko nili kufuma ndiposo uko nkhuya.” Wakusazgirapo kuti: “Ine nkhujicitira ukaboni namwene, ndipo Ŵadada awo ŵali kunituma ŵakunicitira ukaboni.”

Ŵafarisi ŵakufumba kuti: “Ŵawiskemwe ŵali nkhu?”

Yesu wakuzgora kuti: “Ine mukunimanya cara nesi Ŵadada. Muŵenge kuti mukunimanya ine, mphanyi mukumanyaso Ŵadada.” Nangauli Ŵafarisi ŵakukhumba nipera kumukaka Yesu, palije na yumoza uyo wakumukhwaska.

Yesu wakuyowoyaso kuti: “Ine nkhuluta, . . . Uko nkhuya imwe mungizako cara.”

Wati wayowoya nthena, Ŵayuda ŵakwamba kuzizwa, ŵakuti: “Kasi ndikuti wajikomenge? Cifukwa wakuti, ‘Uko nkhuya imwe mungizako cara.’”

Yesu wakulongosora kuti: “Imwe muli ŵa pano pasi; Ine nili wa kucanya. Imwe muli ŵa caru cino; Ine nili wa caru cino cara.” Ndipo wakusazgirapo kuti: “Usange mukugomezga cara kuti ndine iyo, mufwirenge mu zakwananga zinu.”

Apa Yesu wakuyowoya vya kuŵapo kwake pambere wandaŵe munthu ndiposo kuti ni Mesiya wakulayizgika, panji kuti Khristu. Ndipouli, ŵakwenera kuti ŵakumufumba mwamtonyoro kuti: “Kasi ndiwe njani?”

Pakuwona kuti ŵakumukana, Yesu wakuzgora kuti: “Ipo nasuzgikiraci kuyowoya namwe?” Kweni wakulutilira kuyowoya kuti: “Uyo wali kunituma ngwaunenesko, ndipo vinthu vyeneivyo nkhapulika kwa iyo ndivyo nkhuyowoya mu caru.” Yesu wakulutilira wakuti: “Para mwatumphuska Mwana wa munthu, penepapo muzamumanya kuti ndine iyo, ndipo kuti nkhucita kanthu mwa namwene cara; kweni umo Ŵadada ŵali kunisambizgira ndimo nkhuyowoyera vinthu ivi. Ndipo uyo wali kunituma wali nane; wali kunisida nekha cara, cifukwa nyengo zose nkhucita vinthu vyakukondweska kwa iyo.”

Yesu wati wayowoya vinthu ivi, ŵanandi ŵakupulikana mwa iyo. Ndipo ku aŵa, wakuti: “Usange mukukhalilira mu mazgu ghane, muli ŵasambiri ŵane nadi, ndipo mumanyenge unenesko, ndipo unenesko umufwaturaninge.”

Awo ŵakumususka ŵakuyowoya kuti: “Tili mphapu ya Abrahamu ndipo tindaŵepo ŵazga ŵa munthu waliyose. Vyaŵa wuli apa ukuti, ‘Muŵenge ŵakufwatuka’?”

Nangauli Ŵayuda ŵawusika na mitundu yinyake kanandi waka, ŵakuzomerezga yayi kuti munthu munyake ni fumu pacanya pawo. Ŵakukana kucemeka ŵazga. Kweni Yesu wakuŵaphalira kuti mbazga nadi. Mu nthowa wuli? Yesu wakuti: “Nadi, nadi nkhumuphalirani, Waliyose uyo wakucita kwananga ni muzga wa kwananga.”

Pakukana kuti mbazga ŵa kwananga, Ŵayuda ŵakujiŵika paheni. Yesu wakulongosora kuti: “Muzga wakukhalilira mu nyumba cara muyirayira; mwana ndiyo wakukhalilira muyirayira.” Pakuti muzga walije wenelero wa kupoka ciharo, wangacimbizgika nyengo yiliyose. Mwana uyo wababikira mu nyumba iyo, panji wazgoreka kuŵa ntheura ndiyo yekha wakukhalilira “muyirayira,” cikuru ngwamoyo.

Yesu wakulutilira kuti: “Ntheura usange Mwana wakumufwaturani, muŵenge ŵakufwatuka nadi.” Ipo unenesko uwo ukufwatura ŵanthu ni uwo ukuyowoya za Mwana, Yesu Khristu. Waliyose wangafwatuka ku kwananga, uko kukubaba nyifwa kwizira mu sembe ya umoyo wake wakufikapo. Yohane 8:12-36.

▪ Kasi Yesu wakusambizga nkhu pa zuŵa lacinkhondi na ciŵiri? Nchivici cikucitika usiku kwenekura, ndipo ici cikukolerana wuli na cisambizgo ca Yesu?

▪ Kasi Yesu wakuyowoya kuti wali kufuma nkhu, ndipo ici cikwenera kuvumburaci za iyo?

▪ Kasi Ŵayuda mbazga mu nthowa wuli, kweni mbunenesko wuli uwo uŵafwaturenge?