Cipaturo 129

Wakulutilira Kuwoneka

ŴASAMBIRI ŵacali na citima. Ŵakumanya yayi ico cacitika kuti dindi liŵe lambura kanthu, kweniso ŵakugomezga yayi ivyo ŵanakazi ŵayowoya. Ntheura pa Sabata kumise, Kileopa na msambiri munyake ŵakufuma ku Yerusalemu kuya ku Emausi, ulendo wa mtunda pafupifupi makilomita 11.

Apo ŵali mu nthowa, ndipo ŵakudumbiskana ivyo vyacitika zuŵa ili, munthu munyake wacilendo wakwamba kwenda nawo. Iyo wakufumba kuti: “Kasi ni nkhani wuli izo mukudumbiskana mwaŵene uku mukwenda?”

Ŵasambiri ŵakwimilira, visko vyawo vyawa, ndipo Kileopa wakuzgora kuti: “Kasi uli mulendo ndipo ukukhala wekha mu Yerusalemu ntheura kuti ukumanya cara ivyo vyacitika mwenemumo mu mazuŵa agha?” Iyo wakufumba kuti: “Vinthu wuli?”

Iwo ŵakuzgora kuti: “Vinthu vyakukhwaskana na Yesu Munazarete . . . na umo ŵalara ŵa ŵasofi na ŵawusi ŵithu ŵakamupelekera ku ceruzgo ca nyifwa na kumupayika. Kweni ise tikagomezganga kuti munthu uyu ndiyo wakatemeka kuwombora Israyeli.”

Kileopa na munyake ŵakulongosora vinthu vyakuzizwiska ivyo vyacitika zuŵa ili, nkhani ya kuwona ŵangelo na dindi lambura kanthu, kweni ŵakuti ŵakumanya yayi ng’anamuro la vinthu ivi. Munthu wacilendo uyu wakuŵakalipira kuti: “Ŵambura mahara imwe na ŵazito mu mtima kugomezga vinthu ivyo zinchimi zikayowoya! Asi cikaŵa cakwenelera kuti Khristu wakomwe na vinthu ivi na kunjira mu ucindami wake?” Kufuma apo, wakuŵalongosolera mazgu gha mu malemba ghakupatulika agho ghakuyowoya vya Khristu.

Paumaliro, ŵakufika kufupi na Emausi, ndipo munthu wacilendo uyu wakuŵa nga wakujumphilira. Pakukhumba kupulika vinandi, ŵasambiri aŵa ŵakumuciska kuti: “Khalani nase, cifukwa kwafipa kale.” Ntheura wakukhala mpaka pa nyengo ya cakurya. Apo wakulomba, kumenya cingwa na kuŵapa, ŵakuwamo kuti ni Yesu uyo wali na thupi la wunthu. Kweni iyo wakuzgeŵelekera.

Sono ŵakupulikiska cifukwa ico munthu wacilendo uyu wakumanyira vinandi. Iwo ŵakufumbana kuti: “Asi mitima yithu yaphyanga apo wayowoyanga nase mu nthowa, apo watilongosoleranga Malemba makoraghene?” Mwaluŵiro, ŵakunyamuka kuwelera ku Yerusalemu, uko ŵakusanga ŵapositole pamoza na awo ŵawungana nawo. Pambere Kileopa na munyake ŵandayowoye kanthu, ŵanyawo ŵakuŵaphalira mwakukondwa kuti: “Fumu yili kuwuskika nadi, ndipo yanguwonekera kwa Simoni!” Ndipo ŵaŵiri aŵa nawo ŵakulongosora umo Yesu wanguwonekera kwa iwo. Aka nkhacinayi mu zuŵa ili kuti Yesu wawonekere ku ŵasambiri ŵake ŵakupambanapambana.

Mwamabuci, Yesu wakuwonekera kacinkhondi. Nangauli milyango njakujalika cifukwa cakuti ŵasambiri ŵakubisama pakopa Ŵayuda, iyo wakunjira na kwimilira pakati pawo na kuyowoya kuti: “Mtende uŵe namwe.” Iwo ŵakutenthema pakughanaghana kuti ŵakuwona mzimu. Ntheura pakuŵalongosolera kuti iyo ni mzimu yayi, Yesu wakuti: “Cifukwa wuli mukukweŵeka, ndipo mukukayika mu mitima yinu? Wonani mawoko ghane na malundi ghane, kuti ndine namwene; nikhwaskani na kuwona, cifukwa mzimu uli na thupi na viwangwa cara umo mukuwonera kuti ine nili navyo.” Ndipouli, ŵakugomezga viŵi yayi.

Kuti waŵawovwire kumanya kuti ndiyo nadi, Yesu wakufumba kuti: “Kasi muli na cakurya pano?” Wati wapoka somba yakocha na kurya, iyo wakuti: “Agha ni mazgu ghane agho nkhayowoya kwa imwe apo nkhaŵa nicali namwe [pambere nindafwe], kuti vinthu vyose ivyo vili kulembeka mu dango la Mozesi na mu Zinchimi na Masalimo kuyowoya vya ine, vikwenera kufiskika.”

Pakulutizga kucita nga ni para wakuŵasambizga Baibolo, Yesu wakuti: “Mu nthowa iyi, kuli kulembeka kuti Khristu wazamusuzgika na kuwuka pakati pa ŵakufwa pa zuŵa lacitatu, ndipo mu zina lake, kupera kuti zakwananga zigowokereke kuzamupharazgika ku mitundu yose—kwambira mu Yerusalemu, imwe mukwenera kuŵa ŵakaboni ŵa vinthu ivi.”

Pa vifukwa vinyake, pa ungano uwu wa pa Sabata namise, Tomasi palije. Ntheura mu mazuŵa ghakulondezgapo, ŵanyake ŵakumuphalira kuti: “Tawona Fumu!”

Tomasi wakususka kuti: “Kwambura kuti nawona mu mawoko ghake mabamba gha mizumali na kunjizga munwe wane mu mabamba gha mizumali na kunjizga woko lane mu mbambo zake, nadi ningagomezga cara.”

Sono pati pajumpha mazuŵa ghankhondi na ghatatu, ŵasambiri ŵakuwunganaso mu nyumba. Pa nyengo iyi, Tomasi nayo walipo. Nangauli milyango njakujalika, Yesu wakwimilira pakati pawo na kuyowoya kuti: “Mtende uŵe namwe.” Kufuma apo, wakung’anamukira kwa Tomasi, wakumuphalira kuti: “Ŵika munwe wako apa, ndipo wona mawoko ghane, njizga woko lako mu mbambo zane, ndipo leka kuŵa wambura kugomezga.”

Tomasi wakucemerezga kuti: “Fumu yane na Ciuta wane!”

Yesu wakufumba kuti: “Pakuti waniwona, kasi wagomezga? Mbakukondwa awo ŵakuwona cara kweni ŵakugomezga.” Luka 24:11, 13-48; Yohane 20:19-29.

▪ Kasi munthu wacilendo wakuŵafumba vici ŵasambiri ŵaŵiri apo ŵakuya ku Emausi?

▪ Kasi munthu wacilendo wakuyowoya vici ivyo vikupangiska kuti mitima ya ŵasambiri yiphye?

▪ Kasi ŵasambiri ŵakumumanya wuli munthu wacilendo uyu?

▪ Kileopa na munyake ŵati ŵawelera ku Yerusalemu, kasi ŵakupulika nkhani wuli yakukondweska?

▪ Kasi Yesu wakuwonekera wuli ku ŵasambiri ŵake kacinkhondi, ndipo nchivici cikucitika pa nyengo iyi?

▪ Nchivici ico cikucitika pati pajumpha mazuŵa ghankhondi na ghatatu kufuma apo Yesu wakawonekera kacinkhondi, ndipo Tomasi wakukhorwa wuli kuti Yesu ngwamoyo?