Cipaturo 74

Wakunjirikizga Marita, na Kusambizga pa Nkhani ya Lurombo

APO Yesu wakuteŵetera mu Yudeya, wakunjira mu muzi wa Betaniya. Uku ndiko Marita, Mariya na mudumbu wawo Lazaro ŵakukhala. Mutepanji Yesu wakakumana na ŵatatu aŵa kukwambilira kwa uteŵeti wake ndipo sono ni mubwezi wawo wapamtima. Sono Yesu wakuluta ku nyumba ya Marita ndipo wakumupokelera.

Marita ngwakunozgeka kucitira Yesu viwemi comene. Nadi, ni mwaŵi ukuru comene kuti Mesiya wakulayizgika wize pa nyumba yako. Ntheura Marita wakutangwanika comene na kunozga cakurya ciwemi ndiposo kucita vinthu vinyake mwakuti Yesu wawone kuti wapokelereka nadi.

Kweni Mariya, munung’una wa Marita, wakukhala musi mu malundi gha Yesu na kupulikizga kwa iyo. Kanyengo kacoko waka, Marita wakwiza na kuyowoya kwa Yesu kuti: “Fumu, kasi vilije kanthu kwa imwe kuti munung’una wane wanilekera nekha kucita vinthu? Ntheura muphalirani kuti wazakanovwireko.”

Kweni Yesu wakuyowoyapo kanthu yayi kwa Mariya. M’malo mwake, wakunjirikizga Marita cifukwa ca kufipa mtima comene na vinthu vyathupi. Wakumucenya mwalusungu kuti: “Marita, Marita, ukwenjerwa na kukweŵeka na vinthu vinandi. Kweni vinthu vicoko waka vikukhumbikwa, panji cimoza pera.” Yesu wakuti nchakwenelera yayi kumara nyengo yinandi kunozga vyakurya vyakupambanapambana. Cakurya cicoko waka panji ca mtundu umoza pera nchakukwana.

Marita wali na maghanoghano ghawemi, wakukhumba kumupokelera makora mulendo wake. Kweni cifukwa ca kufipa mtima comene na vinthu vyathupi, wakutaya mwaŵi wa kusambizgika na Mwana wa Ciuta. Ntheura Yesu wakumalizga kuti: “Mariya wasora cigaŵa ciwemi, ndipo citolekengeko kwa iyo cara.”

Nyengo yinyake pamanyuma, msambiri yunji wakufumba Yesu kuti: “Fumu, mutisambizge kulomba, umo Yohane nayo wakasambizgira ŵasambiri ŵake.” Msambiri uyu wakwenera kuti wakaŵapo yayi apo Yesu wakayowoya lurombo lwakuwonerapo mu Upharazgi wake wa pa Lupiri, pafupifupi cilimika cimoza na hafu ico cajumpha. Ntheura Yesu wakuwerezgapo ivyo wakasambizga kweni wakulutilira kuyowoya ntharika kulongora kuti nchakukhumbikwa kukosera pa kulomba.

Yesu wakwamba na mazgu ghakuti: “Ni njani wa imwe waŵenge na mubwezi ndipo walutenge kwa iyo usiku pakati na kuyowoya kuti, ‘Mubwezi, nibwelekako vingwa vitatu, cifukwa mubwezi wane wanizira waka pa ulendo ndipo nilije kanthu kakuti nimuŵikire panthazi pake’? Ndipo yura wa mukati wakuti pakuzgora, ‘Leka kunisuzga. Mulyango wajalika kale, ndipo ŵana ŵane ŵacoko pamoza na ine tili mu bedi; ningawuka cara na kukupa kanthu.’ Nkhumuphalirani kuti, Wawukenge nadi na kumupa kanthu, cifukwa cakuti ni mubwezi wake cara, kweni wawukenge cifukwa ca cikosa cake na kumupa vinthu ivyo wakukhumba.”

Pakuyowoya nthena, kasi Yesu wakung’anamura kuti Yehova Ciuta ngwambura kukhumbisiska kupulika maŵeyelero ghithu, nga umo waliri mubwezi wa mu nkhani iyi? Yayi, kweni wakung’anamura kuti usange mubwezi wambura kukhumbisiska uyu wakucitapo kanthu cifukwa cakuti munyake wakosera kumulomba, ipo Dada withu wakucanya wacitenge vinandi kuluska apa. Ntheura Yesu wakulutilira kuti: “Nkhumuphalirani kuti, Lutilirani kulomba, ndipo kupikenge kwa imwe; lutilirani kupenja, ndipo musangenge; lutilirani kukhung’uska, ndipo kumujulikiraninge. Pakuti waliyose uyo wakulomba wakupokera, ndipo waliyose uyo wakupenja wakusanga, ndipo waliyose uyo wakukhung’uska kumujulikirenge.”

Kufuma apo, Yesu wakuyowoya za ŵadada awo mbambura kufikapo na ŵakwananga, wakuti: “Nadi, ni dada nju pakati pinu uyo, usange mwana wake wakumulomba somba, wamupenge njoka m’malo mwa somba? Panji usange wakumulombaso sumbi, wamupenge kalizga? Ntheura, usange imwe, nangauli muli ŵaheni, mukumanya kupeleka vyawanangwa viwemi ku ŵana ŵinu, ipo comene kwakuluska Ŵadada ŵakucanya ŵapelekenge mzimu utuŵa ku awo ŵakuŵalomba!” Nadi, Yesu wakupeleka cikhuŵilizgo ciwemi comene cakuti tikoserenge pa kulomba. Luka 10:38–11:13.

▪ Cifukwa wuli Marita wakutangwanika na kunozgera Yesu cakurya?

▪ Kasi Mariya wakucitaci, ndipo cifukwa wuli Yesu wakumulumba m’malo mwa kulumba Marita?

▪ Cifukwa wuli Yesu wakuwerezgapo ivyo wakasambizga pa nkhani ya kulomba?

▪ Kasi Yesu wakuyowoya ntharika wuli yakulongora kuti nchakukhumbikwa kukosera pa kulomba?