Cipaturo 3

Wakunozga Nthowa Wababika

ELIZABETI wali pafupi kubaba. Mariya wakhala nayo kwa myezi yitatu. Kweni sono ni nyengo yakuti Mariya walayire na kuwelera kukwake ku Nazarete. Nayo waŵenge na mwana mu myezi pafupifupi yinkhondi na umoza iyo yikwiza.

Nyengo yicoko waka Mariya wati waluta, Elizabeti wakubaba. Pakuwona kuti Elizabeti na bonda wake ŵali makora, ŵanthu ŵakusekelera. Apo Elizabeti wakuŵalongora bonda, ŵazengezgani na ŵabali ŵake, wose ŵakusekelera pamoza nayo.

Mwakuyana na Dango la Ciuta, mazuŵa ghankhondi na ghatatu kufuma apo wababikira, mwana msepuka mu Israyeli wakwenera kukotoleka. Ŵabwezi na ŵabali ŵakwiza kuzakaŵapo pa nyengo iyi. Ŵakuyowoya kuti mwana wapike zina la ŵawiske lakuti Zekariya. Kweni Elizabeti wakukana. Wakuti: “Cara nadi! kweni wacemekenge Yohane.” Kumbukani kuti zina ili ndilo mungelo Gabriyeli wakati mwana wathyike.

Ndipouli, ŵabwezi ŵawo ŵakukana, ŵakuti: “Palije munthu pakati pa ŵabali ŵako uyo wakucemeka na zina ili.” Ndipo pakuyowoya nayo na mawoko, ŵakumufumba wiske zina la mwana. Zekariya wakupempha cakulembapo, ndipo wakulemba kuti: “Yohane ndilo zina lake,” ndipo wose ŵakuzizwa.

Vyati vyaŵa nthena, Zekariya wakwambaso kuyowoya. Mungakumbuka kuti wakaleka kuyowoya apo wakagomezga yayi mazgu agho mungelo wakamuphalira ghakuti Elizabeti waŵenge na mwana. Zekariya wati wambaso kuyowoya, ŵazengezgani ŵawo wose ŵakuzukuma ndipo ŵakuyowoya kwa yumoza na munyake kuti: “Kasi mwana uyu wazamuŵa wuli comenecomene?”

Sono Zekariya wazuzgika na mzimu utuŵa, ndipo mwakukondwa wakuti: “Watumbikike Yehova Ciuta wa Israyeli, cifukwa wazgoka na kucitira ŵanthu ŵake kuwombokwa. Ndipo watiwuskira lusengwe lwa ciponosko mu nyumba ya Davide muteŵeti wake.” “Lusengwe lwa ciponosko” ulu, ni Fumu Yesu, uyo wacali wandababike. Zekariya wakuti kwizira mwa iyo, “para tathaskika ku mawoko gha ŵalwani, [Ciuta] watipe mwaŵi wa kumucitira uteŵeti wakupatulika kwambura wofi pamoza na kugomezgeka na urunji panthazi pake mazuŵa ghithu ghose.”

Kufuma apo, Zekariya wakuyowoyerathu vya mwana wake Yohane, wakuti: “Kweni iwe wamwana, ucemekenge nchimi ya Wapacanya Nkhanira, pakuti uzamudangira panthazi pa Yehova kunozga nthowa zake, kumanyiska ŵanthu ŵake kuti waŵaponoskenge mwa kuŵagowokera zakwananga zawo, cifukwa ca mtima wa ciwuravi wa Ciuta withu. Na ciwuravi ici, tizamuwona ungweru kufuma kucanya nga ni uwo ukuŵala para kwaca, kupeleka ungweru ku awo ŵakukhala mu cisi na mu mfwiri wa nyifwa, kulongozga malundi ghithu makoraghene mu nthowa ya mtende.”

Pasono, Mariya uyo wacali wandatengwe, wafika kukwake ku Nazarete. Kasi cimucitikirenge nchivici para vyamanyikwa kuti wali na nthumbo? Luka 1:56-80; Leviticus 12:2, 3.

▪ Kasi Yohane ni mulara kwa Yesu na myezi yilinga pakubabika?

▪ Ni vinthu wuli ivyo vikucitika apo Yohane wali na mazuŵa ghankhondi na ghatatu?

▪ Kasi Ciuta wazgokera wuli ku ŵanthu ŵake?

▪ Kasi ni mulimo wuli uwo Yohane waphalirika kuti wazamucita?