Cipaturo 118

Wakupelekeka na Kukakika

SONO, 12 koloko ya usiku yajumpha apo Yudasi wakulongozgera mzinda ukuru wa ŵasilikari, ŵalara ŵa ŵasofi, Ŵafarisi, na ŵanji ku munda wa Getisemane. Ŵasofi ŵapulikana na Yudasi kuti ŵamupenge ndalama zasiliva 30 kuti wapeleke Yesu.

Pakwamba, Yudasi wati wafumiskika pa cakurya ca Paska, wakwenera kuti wanguluta ku ŵalara ŵa ŵasofi. Mwaluŵiro, aŵa ŵakuwunganya ŵalinda ŵawo kweniso ciwuru ca ŵasilikari. Panji pakwamba Yudasi wanguŵatolera uko Yesu na ŵapositole ŵake ŵacitiranga Paska. Wati wabundurwa kura, mzinda ukuru uwo wayegha vilwero, nyali na miliko, ukulondezga Yudasi kufuma mu Yerusalemu na kujumpha Dambo la Kidroni.

Apo Yudasi wakulongozgera mzinda uwu ku Lupiri lwa Maolive, wali na cigomezgo cose kuti wakumanyako uko wangasanga Yesu. Mu sabata iyo yajumpha, apo Yesu na ŵapositole ŵakendanga kuluta na kuwera pakati pa Betaniya na Yerusalemu, kanandi ŵakayimanga pa munda wa Getisemane kuti ŵapumure na kudumbiskana. Kweni sono, pakuti Yesu wali ku cisi ku makuni gha maolive, kasi ŵasilikari ŵamumanyenge wuli? Panji ŵandamuwonepo nakale. Ntheura Yudasi wakuŵapa cimanyikwiro, wakuti: “Uyo namumufyofyontha, ni mweneyuyo; mukamukake na kumukora makora kuti waleke kucimbira.”

Yudasi wakulongozgera mzinda uwu mu munda, wakuwona Yesu na ŵapositole ŵake ndipo wakwiza kwa iyo. Wakuti: “Monire Rabi!” na kumufyofyontha.

Yesu wakuti: “Nganya, wapukwa vici kuno?” Ndipo pakujizgora, wakuti: “Yudasi, kasi ukupeleka Mwana wa munthu na mufyofyontho?” Kweni apa wamuphalira pakweru mulwani wake. Yesu wakwiza ku ungweru wa miliko na nyali ndipo wakufumba kuti: “Kasi mukupenja njani?”

Ŵakuzgora kuti: “Yesu Munazarete.”

Yesu wakuyowoya kuti “Ndine,” uku wimilira mwacikanga panthazi pa wose. Pakuzizwa na cikanga cake ndiposo kwambura kumanya ico ciŵacitikirenge, ŵanthu aŵa ŵakuwelera cafutanyuma na kuwa pasi.

Yesu wakuyowoya mwakuzikira kuti: “Namuphalirani kuti ndine. Ntheura usange mukupenja ine, ŵalekani aŵa ŵalutenge.” Apo wanguŵa mu cipinda camucanya, Yesu wanguphalira Ŵawiske mu lurombo kuti wasungilira ŵapositole ŵake ŵakugomezgeka ndipo palije yumoza uyo wazgeŵa “kweni mwana wa pharanyiko pera.” Ntheura mwakuti mazgu ghake ghafiskike wakupempha kuti ŵalondezgi ŵake ŵaŵaleke ŵalutenge.

Apo ŵasilikari ŵakwimilira na kukaka Yesu, ŵapositole ŵakumanya ico cili pafupi kucitika. Ŵakufumba kuti: “Fumu, kasi tihete na lupanga?” Pambere Yesu wandazgore, Petrosi uyo wali na lumoza mwa malupanga ghaŵiri agho ŵapositole ŵiza nagho, wakuwukira Maliko, muzga wa musofi mukuru. Petrosi wakuwinda mutu wa muzga uyu, kweni wakuwunguzura khutu lake lamalyero.

Yesu wakunjilirapo wakuti: “Mbwenu, vimalire papa.” Wakukhwaska khutu la Maliko na kumucizga. Wati wacita ntheura, wakusambizga sambiro lakuzirwa, wakulangura Petrosi kuti: “Wezgera lupanga lwako mu malo ghake, pakuti wose awo ŵakutora lupanga ŵakomekenge na lupanga. Panji kasi ukughanaghana kuti ningatondeka kuŵeyelera Ŵadada kuti ŵanipe pa nyengo iyi viwuru vyakujumpha khumi na viŵiri vya ŵangelo?”

Yesu ngwakunozgeka kukakika cifukwa wakulongosora kuti: “Ipo Malemba ghangafiskika wuli kuti vikwenera kucitika mu nthowa iyi?” Ndipo wakusazgirapo kuti: “Nkhombo iyo Ŵadada ŵanipa, kasi nkhwenera kumwa cara?” Wakukolerana comene na khumbo la Ciuta kwa iyo.

Kufuma apo, Yesu wakuyowoya na mzinda. Wakufumba kuti: “Kasi mwiza na malupanga na zinthonga kuzakanikaka nga ni para mukulimbana na wakupoka vyaŵene? Zuŵa na zuŵa nkhakhalanga mu tempele kusambizga, ndipouli, mukanikaka cara. Kweni vyose ivi vyacitika kuti malemba gha zinchimi ghafiskike.”

Pa ici, ciwuru ca ŵasilikari na mulara wa ŵankhondo, ndiposo ŵalinda ŵa Ŵayuda ŵakukora Yesu na kumukaka. Pakuwona ici, ŵapositole ŵakusida Yesu na kucimbira. Ndipouli, munyamata munyake, uyo panji ni msambiri Mariko, wacali pakati pa mzinda. Wakwenera kuti wanguŵa ku nyumba iyo Yesu wangucitira Paska ndipo wakwenera kuti wangulongozgana na mzinda uwu. Ndipouli, sono ŵamumanya, ndipo ŵakukhumba kumukora. Kweni wakusida salu yake yiwemi na kucimbira. Mateyu 26:47-56; Mariko 14:43-52; Luka 22:47-53; Yohane 17:12; 18:3-12.

▪ Cifukwa wuli Yudasi wali na cigomezgo cakuti wamumusanga Yesu mu munda wa Getisemane?

▪ Kasi Yesu wakulongora wuli kuti wakufipira mtima ŵapositole ŵake?

▪ Kasi Petrosi wakucita vici pakukhumba kuvikilira Yesu, kweni Yesu wakumuphalira vici?

▪ Kasi Yesu wakulongora wuli kuti wakukolerana na khumbo la Ciuta kwa iyo?

▪ Ŵapositole ŵati ŵamusida Yesu, ni njani wakukhalira ndipo nchivici cikucitika kwa iyo?