Cipaturo 76

Wakurya Pamoza na Mufarisi

YESU wati wazgora ŵakususka pa nkhani ya uko nkhongono izo wacizgira munthu wambura kuyowoya zafuma, Mufarisi wakumucema kukarya nayo cakurya. Mwakuyana na kaluso kawo, Ŵafarisi ŵakwamba kugeza mu mawoko mpaka mu kasukusuku pambere ŵandambe kurya. Ŵakucita ntheura pakwamba na paumaliro kweniso para cakurya cili mukati. Nangauli ŵakuswa dango la Ciuta yayi pakulondezga kaluso aka ka utozi, kweni ŵakucita mwakutalulira.

Pakuwona kuti Yesu wakulondezga yayi kaluso aka, Mufarisi uyo wamucema wakuzizwa. Nangauli wandayowoye kuti wazizwa, kweni Yesu wamanya ndipo wakuti: “Sono imwe Ŵafarisi, mukusuka kuwaro kwa nkhombo na mbale, kweni mukati mwinu muli kuzura na vyakupoka na uheni. Ŵanthu ŵazeleza! Asi uyo wakapanga kuwaro ndiyo wakapanga na mukati wuwo?”

Ntheura Yesu wakuvumbura upusikizgi wa Ŵafarisi awo mwadango ŵakugeza mu mawoko kweni ŵakutondeka kusuka uheni mu mitima yawo. Wakuŵaphalira kuti: “Pelekani nga ni vyawanangwa vya cisungusungu vinthu ivyo vili mukati, ndipo wonani! vinthu vinyake vyose ni vyakutowa kwa imwe.” Para ŵakupeleka cinthu ŵakwenera kuciskika na mtima wacitemwa, na khumbo la kujilongora ku ŵanji kuti mbarunji yayi.

Yesu wakulutilira kuti: “Soka kwa imwe Ŵafarisi, cifukwa mukupeleka cakhumi ca minti na peganoni na mphangwe yinyake yiliyose, kweni mukujumpha urunji na citemwa ca Ciuta! Vinthu ivi mukenera kuvicita, kweni vinthu vinyake vira kuviwuskapo cara.” Dango la Ciuta ku Ŵaisrayeli likukhumba kuti ŵapelekenge cakhumi ca vipambi vya mu minda. Minti na peganoni ni mbuto zicoko panji twakumera uto ŵakuŵika ku cakurya kuti cinunkhirenge. Ŵafarisi ŵakulimbikira comene kupeleka cakhumi ca vyakumera vicokovicoko ivi, kweni Yesu wakuŵasuska cifukwa ŵakuzerezga vinthu vyakuzirwa, ivyo nkhulongora citemwa, kucita lusungu, na kuŵa wakujicefya.

Pakulutilira kuŵasuska, Yesu wakuti: “Soka kwa imwe Ŵafarisi, cifukwa mukutemwa vitengo vyakunthazi mu masunagoge na kutawuzgika mwanchindi mu misika! Soka kwa imwe, cifukwa muli nga ni malaro agho ghakuwoneka cara, ntheura kuti ŵanthu ŵakwenda pacanya pake kwambura kumanya!” Ukazuzi wawo ukuwonekera yayi. Cisopa ca Ŵafarisi cikuwoneka waka ciwemi kuwaro, kweni mukati nchawakawaka. Cili kujintha pa upusikizgi.

Pakupulika kuti Yesu wakususka nthena, loya munyake, yumoza wa ŵakumanya Dango la Ciuta, wakudandawura kuti: “Msambizgi, pakuyowoya vinthu ivi mukunena na ise wuwo.”

Yesu wakususka ŵakumanya Dango aŵa kuti nawo ŵali na mulandu, wakuti: “Soka na kwa imwe wuwo ŵakumanya Dango, cifukwa mukuthwikiska ŵanthu katundu wakusuzga kunyamura, kweni imwe mwaŵene mukumukhwaska cara na umoza wa minwe yinu! Soka kwa imwe, cifukwa mukuzenga malaro gha zinchimi, kweni ŵasekuru ŵinu ŵakazikoma!”

Katundu uyo Yesu wakuzunura apa ni maluso gha ŵanthu, kweni maloya ghakutondeka kuwuskapo nanga ndimoza la maluso agha kuti ŵanthu ŵaleke kusuzgika. Yesu wakuvumbura kuti iwo ŵakuzomerezga kuti nchimi zikomekenge, ndipo wakucenjezga kuti: “‘Ndopa za zinchimi zose zakuthiskika kufuma pa kuzikika kwa caru [zizamufumbika] ku muwiro uwu, kufuma ku ndopa za Abelu mpaka ku ndopa za Zekariya, mweneuyo wakakomekera pakati pa jochero na nyumba.’ Enya, nkhumuphalirani, zizamufumbika ku muwiro uwu.”

Caru ca ŵanthu awo ŵangawombokwa cikamba apo Adamu na Eva ŵakambira kubaba ŵana; ntheura Abelu wakaŵa wamoyo “pa kuzikika kwa caru.” Zekariya wakati wakomeka, ŵasilikari ŵa Ŵasiriya ŵakaparanya Yuda. Kweni Yesu wakuyowoyerathu za pharanyiko lakofya ilo lizenge pa muwiro wake cifukwa ca uheni wake ukuru. Pharanyiko ili likucitika pati pajumpha vilimika 38, mu cilimika ca 70 C.E.

Pakulutilira kuŵasuska, Yesu wakuti: “Soka kwa imwe ŵakumanya Dango, cifukwa mukawuskako cijuliro ca kumanya; imwe mwaŵene mukanjiramo cara, ndipo awo ŵakanjiranga mukaŵajandizga!” Nkhwantha za Dango izi zili na mulimo wa kulongosolera ŵanthu Mazgu gha Ciuta, kuŵaphalira ng’anamuro lake. Kweni zikutondeka kucita ici ndipo zikujandizga ŵanthu kuti ŵaleke kughapulikiska.

Ŵafarisi na nkhwantha za dango izi ŵakwiya comene cifukwa cakuti Yesu wavumbura upusikizgi wawo. Apo wakufuma mu nyumba, ŵakwamba kumususka comene ndipo ŵakumuphulunga na mafumbo. Ŵakukhumba kuti wayowoye cinthu cinyake ico ŵangasangirapo cifukwa cakumukakira. Luka 11:37-54; Duteronome 14:22; Mika 6:8; 2 Midauko 24:20-25.

▪ Cifukwa wuli Yesu wakususka Ŵafarisi na nkhwantha za Dango?

▪ Kasi ni katundu wuli uyo maloya ghakuthwikiska ŵanthu?

▪ Kasi ‘caru cikazikika’ pawuli?