Cipaturo 19

Wakusambizga Mwanakazi Musamariya

PAKUFUMA ku Yudeya kuluta ku Galileya, Yesu na ŵasambiri ŵake ŵakwendera mu Samariya. Ŵavuka na ulendo. Ndipo apo nyengo yili pafupifupi 12 koloko muhanya, ŵakupumura pa cisimi ico cili pafupi na msumba wa Sukare. Cisimi ici wakajima ni Yakobe vilimika mahandiredi ghanandi ivyo vyajumpha, ndipo cicali waka mpaka muhanya uno, pafupi na msumba uwo mazuŵa ghano ukucemeka kuti Nablus.

Apo Yesu wakupumura pa malo agha, ŵasambiri ŵake ŵakuluta mu msumba kuti ŵakagure vyakurya. Mwanakazi wakufuma mu Samariya wiza kuzakanegha maji, ndipo Yesu wakumupempha kuti: “Nipako maji nimwe.”

Ŵayuda na Ŵasamariya ŵakwenderana yayi cifukwa ca kutinkhana. Ntheura mwanakazi wakuzizwa ndipo wakufumba kuti: “Vyaŵa wuli kuti imwe, nangauli ndimwe Muyuda, mukunilomba maji, peneapo ine ndine mwanakazi Musamariya?”

Yesu wakuzgora kuti: “Umanyenge cawanangwa ca Ciuta na uyo wakukuphalira kuti ‘Nipako maji nimwe,’ mphanyi wamulomba, ndipo mphanyi wakupa maji ghamoyo.”

Mwanakazi wakuzgora kuti: “Dada, mulije nanga nchakuneghera maji, ndipo cisimi nchakunyang’amira. Sono maji ghamoyo agha mwaghatora nkhu? Kasi muli ŵakuru kuluska sekuru withu Yakobe, uyo wakatipa cisimi ndiposo mweneuyo pamoza na ŵana ŵake na viŵeto vyake ŵakamwanga mu cisimi ici?”

Yesu wakuti: “Waliyose uyo wakumwako maji agha waŵengeso na nyota. Waliyose uyo wakumwako maji agho nimupenge waŵengeso na nyota cara nanga mphacoko, kweni maji agho nimupenge, mwa iyo ghaŵenge cisimi ca maji ghakubwibwituka kupeleka umoyo wamuyirayira.”

Mwanakazi wakuti: “Dada, nipani maji agha, mwakuti nileke kuŵaso na nyota nesi kwizaso ku malo agha kuzakanegha maji.”

Yesu wakuti kwa iyo: “Luta, ukaceme mfumu wako na kwiza ku malo agha.”

Mwanakazi wakuzgora kuti: “Nilije mfumu.”

Yesu wakumuzomerezga wakuti: “Wayowoya makora kuti, ‘Nilije mfumu.’ Pakuti ukaŵapo na ŵafumu ŵankhondi, ndipo mwanalume uyo uli nayo sono ni mfumu wako cara.”

Mwanakazi wakuzizwa wakuti: “Dada, namanya kuti ndimwe nchimi.” Pakulongora ivyo iyo wakumanya pa nkhani ya kusopa, wakuyowoya kuti Ŵasamariya “ŵakasopanga mu lupiri ulu [lwa Gerizimu, ulo luli pafupi waka], kweni imwe [Mwaŵayuda] mukuti mu Yerusalemu muli malo agho ŵanthu ŵakwenera kusoperamo.”

Ndipouli, Yesu wakulongora kuti malo ghakusoperamo nkhanthu viŵi yayi. Iyo wakuti: “Ora likwiza, . . . apo ŵasopi ŵaunenesko ŵazamusopa Ŵadada mu mzimu na unenesko, pakuti nadi, Ŵadada ŵakupenja ŵakuŵa ntheura kuti ŵaŵasopenge. Ciuta ni Mzimu, ndipo awo ŵakumusopa ŵakwenera kumusopa mu mzimu na unenesko.”

Mwanakazi wacontheka comene. Wakuti: “Nkhumanya kuti Mesiya wakwiza, uyo wakucemeka Khristu. Para iyo wiza, wazamutiphalira vinthu vyose pakweru.”

Yesu wakuti: “Namweneine nkhuyowoya nawe ndine iyo.” Ghanaghanani waka. Mwanakazi uyu wangwiza muhanya pakati kuzakanegha maji, panji cifukwa cakuti wakukhumba yayi kukumana na ŵanakazi ŵanji ŵa mu cikaya cake awo ŵakwenera kuti ŵakumutinkha cifukwa ca nkharo yake yiheni, kweni Yesu wamulongora lusungu. Yesu wakuphalira mwanakazi uyu kwambura kubisa ico wandaphalirepo munthu waliyose pakweru. Kasi nchivici cikucitika kufuma apa?

Ŵasamariya Ŵanandi Ŵakugomezga

Ŵati ŵawera kukagura vyakurya ku Sukare, ŵasambiri ŵakusanga Yesu wali pa cisimi ca Yakobe apo ŵangumuleka, ndipo wakuyowoya na mwanakazi Musamariya. Ŵasambiri ŵati ŵafika, mwanakazi wakufumapo, wakuleka ciŵiya cake ca maji, ndipo wakuluta mu msumba.

Pakutoleka mtima na ivyo Yesu wamuphalira, mwanakazi wakuphalira ŵanthu mu msumba kuti: “Zani, mukawone munthu uyo waniphalira vinthu vyose ivyo nkhacita.” Ndipo pakukhumba kuti nawo ŵanweke kuti ŵakamuwone, wakufumba kuti: “Panji wangaŵa Khristu uyu, ŵati?” Fumbo ili likupangiska ŵanalume ŵara kuti ŵalute na kukajiwonera ŵekha.

Pambere mwanakazi wandawereko, ŵasambiri ŵakuciska Yesu kuti warye cakurya ico ŵagura mu msumba. Kweni iyo wakuzgora kuti: “Nili na cakurya ico imwe mukucimanya cara.”

Ŵasambiri ŵakufumbana kuti: “Kasi walipo uyo wamutolera cakuti warye?” Yesu wakulongosora kuti: “Cakurya cane nchakuti nicite khumbo la uyo wakanituma na kufiska mulimo wake. Asi mukuti kucali myezi yinayi pambere vuna yindize?” Ndipouli, pakuyowoya za vuna yauzimu, Yesu wakuti: “Inuskani maso ghinu na kuwona minda, kuti yaca kale mwakuti yivunike. Nakuti wakuvuna wakupokera kale malipiro na kuwunjikira vipambi ku umoyo wamuyirayira, mwakuti wakuseŵa na wakuvuna ŵasekelere pamoza.”

Panji Yesu wawonerathu ivyo vicitikenge cifukwa ca kukumana na mwanakazi Musamariya, vyakuti ŵanthu ŵanandi ŵapulikanenge mwa iyo cifukwa ca ukaboni wa mwanakazi. Mwanakazi uyu, wakupharazgira ŵanthu ŵa mu tawuni kuti: “Waniphalira vinthu vyose ivyo nkhacita.” Ntheura, ŵanthu ŵa mu Sukare ŵakwiza kwa Yesu pa cisimi, ndipo ŵakumupempha kuti wakhalepo nawo na kuŵaphalira vinandi. Yesu wakuzomera ndipo wakukhalako mazuŵa ghaŵiri.

Apo Ŵasamariya ŵakutegherezga kwa Yesu, ŵanandi ŵakugomezga. Kufuma apo, ŵakuphalira mwanakazi kuti: “Sono tikugomezga cifukwa ca ivyo ukayowoya cara; cifukwa tajipulikira tekha ndipo tikumanya kuti munthu uyu nadi, ni mponoski wa caru.” Nadi, mwanakazi Musamariya wakutilongora umo nase tingapharazgira vya Khristu mwakuti ŵanthu ŵanwekenge kuti ŵamanye vinandi.

Kumbukani kuti kwakhala myezi yinayi kuti nyengo ya vuna yize. Nchakuwonekerathu kuti ni vuna ya balere iyo ku Palestina yikuŵako mu Malici panji Epulero. Ntheura vinthu ivi vikwenera kuti vikucitika mu Novembala panji Disembala. Ici cikulongora kuti pamanyuma pa Paska mu 30 C.E., Yesu na ŵasambiri ŵake ŵakukhala mu Yudeya myezi yinkhondi na yitatu panji kujumphirapo, kusambizga na kubapatiza ŵanthu. Sono ŵakuwelera kukwawo ku Galileya. Kasi kwamuŵa vici? Yohane 4:3-43.

▪ Cifukwa wuli mwanakazi Musamariya wakuzizwa kuti Yesu wakuyowoya nayo?

▪ Kasi Yesu wakumusambizgaci pakuyowoya za maji ghamoyo na kwakusopera?

▪ Kasi Yesu wakujivumbura wuli kwa mwanakazi Musamariya ndipo cifukwa wuli ici nchakuzizika?

▪ Kasi mwanakazi Musamariya wakupharazga vici ndipo cikucitika nchivici?

▪ Kasi cakurya ico Yesu wakayowoyanga cikukolerana wuli na vuna?

▪ Kasi tingamanya wuli nyengo iyo Yesu wakateŵetera mu Yudeya Paska la 30 C.E. lati lajumpha?