Cipaturo 17

Wakusambizga Nikodemo

APO wali pa Ciphikiro ca Paska mu 30 C.E., Yesu wakucita vimanyikwiro vyankhongono, panji kuti minthondwe. Pa cifukwa ici, ŵanthu ŵanandi ŵakupulikana mwa iyo. Nikodemo, yumoza wa Sanihedirini, mphara yikuru ya Ŵayuda, wacontheka mtima ndipo wakukhumba kumanya vinandi. Ntheura wakuluta kwa Yesu usiku, panji cifukwa ca kopa kuti ŵalongozgi ŵanyake Ŵaciyuda ŵangamukwiyira para ŵamuwona.

Iyo wakuti: “Rabi, tikumanya kuti imwe pakuŵa msambizgi mwafuma kwa Ciuta; cifukwa palije uyo wangacita vimanyikwiro ivi vyeneivyo mukucita, kwambura kuti Ciuta wali nayo.” Pakuzgora, Yesu wakuphalira Nikodemo kuti para munthu wakukhumba kunjira mu Ufumu wa Ciuta, wakwenera ‘kubabikaso.’

Kweni kasi munthu wangababikaso wuli? Nikodemo wakufumba kuti: “Kasi wanganjira mu nthumbo ya ŵanyina kaciŵiri na kubabikaso?”

Yayi. Kubabikaso kukung’anamura ivi yayi. Yesu wakulongosora kuti: “Kwambura kuti munthu wababika ku maji na mzimu, wanganjira cara mu ufumu wa Ciuta.” Apo Yesu wakabapatizikanga ndipo mzimu utuŵa ukiza pa iyo, ndikuti wakababika “ku maji na mzimu.” Apo Yesu wakabapatizikanga, Ciuta wakayowoya mazgu ghakuti: ‘Uyu ni Mwana wane, mweneuyo nkhukondwa nayo.’ Na mazgu agha, iyo wakapharazga kuti wakatuma mwana wauzimu uyu, mweneuyo wakulindilira kuzakanjira mu Ufumu wakucanya. Pa Pentekoste 33 C.E., ŵanthu ŵanji ŵakubapatizika ŵazamupokera mzimu utuŵa, ntheura nawo ŵazamuŵa ŵakubabikaso nga mbana ŵauzimu ŵa Ciuta.

Kweni mulimo wa Mwana wapadera wa Ciuta ngwakuzirwa. Yesu wakuphalira Nikodemo kuti: “Nga ni umo Mozesi wakatumphuskira njoka mu mapopa, ntheura Mwana wa munthu nayo wakwenera kutumphuskika, mwakuti waliyose uyo wakugomezga mwa iyo waŵe na umoyo wamuyirayira.” Enya, ŵanthu wose ŵakwenera kuŵa na cipulikano mu Mwana wa Ciuta kuti ŵathaskike ku nyifwa, nga ni umo Ŵaisrayeli ŵakeneranga kulaŵiska njoka ya mkuŵa kuti ŵapone para ŵalumika na njoka zakukoma.

Ndipo kuti walongore ukuru wa citemwa ca Yehova pa nkhani iyi, Yesu wakuphalira Nikodemo kuti: “Ciuta wakacitemwa comene caru, mwakuti wakapeleka Mwana wake wapadera yekha, ntheura kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” Ntheura apo Yesu wali mu Yerusalemu, myezi yinkhondi na umoza kufuma apo wakambira uteŵeti wake, iyo wakujiphara kuti ndiyo nthowa ya Yehova Ciuta yakuponoskera ŵanthu.

Yesu wakulutizga kulongosolera Nikodemo kuti: “Cifukwa Ciuta wakatuma Mwana wake mu caru, kuti wazakeruzge caru cara,” ico cikung’anamura kweruzga mwambura urunji, panji kukoma ŵanthu wose. Kweni nga umo Yesu wakuyowoyera, wakatumika “kuti caru ciponoskeke kwizira mwa iyo.”

Nikodemo wiza kwa Yesu nausiku cifukwa ca wofi. Ntheura Yesu wakumalizga kudumbirana nayo na mazgu ghakuti: “Sono ulu ndilo lufura lwa ceruzgo, kuti ungweru [uwo ni Yesu na visambizgo vyake] wiza mu caru kweni ŵanthu ŵatemwa cisi m’malo mwa ungweru, pakuti milimo yawo yikaŵa yiheni. Pakuti uyo wakucita vinthu viheni, wakutinkha ungweru ndipo wakwizako cara ku ungweru, mwakuti milimo yake yileke kuvumbukwa. Kweni uyo wakucita ico nchaunenesko wakwiza ku ungweru, mwakuti milimo yake yiwoneke kuti yacitika mwakuyana na khumbo la Ciuta.” Yohane 2:23–3:21; Mateyu 3:16, 17; Milimo 2:1-4; Maŵazgo 21:9.

▪ Nchivici cikutuma Nikodemo kuti wize kwa Yesu, ndipo cifukwa wuli wiza usiku?

▪ Kasi ‘kubabikaso’ cikung’anamuraci?

▪ Kasi Yesu wakuwuyelezgera na vici mulimo wake wa kuponoska ŵanthu?

▪ Kasi fundo yakuti Yesu wakiza kuzakeruzga caru cara yikung’anamuraci?