Cipaturo 34

Wakusora Ŵapositole Ŵake

PAJUMPHA pafupifupi cilimika cimoza na hafu kufuma apo Yohane Mbapatizi wakayowoyera kuti Yesu ni Mwanamberere wa Ciuta ndiposo apo Yesu wakambira uteŵeti wake. Pa nyengo yira, Andireya, Simoni Petrosi, Yohane, panyakeso na Yakobe (mukuru wa Yohane), kweniso Filipu na Nataniyeli (uyo wakucemekaso kuti Batulumeyu), ŵakazgoka ŵasambiri ŵake ŵakwambilira. Nyengo yikati yajumphapo, ŵanyake ŵanandi ŵakamba kulondezga Khristu.

Sono Yesu ngwakunozgeka kusora ŵapositole ŵake. Aŵa ŵaŵenge ŵabwezi ŵake ŵapafupi awo waŵasambizgenge mwapadera. Kweni pambere wandaŵasore, Yesu wakuluta ku lupiri na kulomba usiku wose. Wakwenera kuti wakupempha vinjeru na thumbiko kwa Ciuta. Kwati kwaca, wakucema ŵasambiri ŵake, ndipo pa aŵa wakusorapo 12. Ndipouli, pakuti ŵakulutilira kusambizgika na Yesu, nawo ŵacali kucemeka ŵasambiri.

Ŵankhondi na yumoza awo Yesu waŵasora, ŵeneawo ŵazunulika mu ndime yakwamba, ni awo ŵakaŵa ŵasambiri ŵake ŵakwambilira. Mateyu, uyo Yesu wakamucema pa nyumba yakusonkherapo msonkho, nayo wasoleka. Ŵanyake ŵankhondi awo ŵasoleka ni Yudasi (uyo wakucemekaso kuti Tadeyu), Yudasi Isikariyoti, Simoni Mukanani, Tomasi, na Yakobe mwana wa Alifeyu. Yakobe uyu wakucemekaso Yakobe Mucoko, panji cifukwa ca kucepa thupi panyake ni mucoko mu vilimika kwa Yakobe munyake.

Kufika pa nyengo iyi, ŵanalume 12 aŵa ŵakhala na Yesu nyengo yitaliko, ndipo wakuŵamanya makora. Nakuti ŵanandi ŵa iwo mbabali ŵake. Yakobe na munung’una wake Yohane ŵakwenera kuti mbana ŵa ŵanyina ŵacoko. Ndipo Alifeyu wakwenera kuti ni munung’una wa Yosefe, dada wa Yesu wakumulera. Ntheura mwana wa Alifeyu, uyo ni mpositole Yakobe, ni munung’una wa Yesu.

Yesu wakughakumbuka makora comene mazina gha ŵapositole ŵake. Kweni kasi imwe mungaghakumbuka? Kumbukani kuti pali ŵa Simoni ŵaŵiri, ŵa Yakobe ŵaŵiri, na ŵa Yudasi ŵaŵiri. Kweniso Simoni wali na munung’una wake Andireya, ndipo Yakobe wali na munung’una wake Yohane. Iyi ni nthowa iyo yingamovwirani kukumbuka mazina gha ŵapositole ŵankhondi na ŵatatu. Ŵanyake ŵanayi ni aŵa: Mateyu (wakusonkheska msonkho), Tomasi (uyo pamanyuma wakukayika), Nataniyeli (uyo wakacemeka apo wakaŵa musi mu khuni), ndiposo Filipu mubwezi wa Nataniyeli.

Ŵapositole 11 mbakufuma mu Galileya, cigaŵa ca kwawo kwa Yesu. Nataniyeli wakufuma ku Kana. Filipu, Petrosi, na Andireya kukwawo kweneco nkhu Betesayida. Kweni pamanyuma, Petrosi na Andireya ŵakusamira ku Kaperenaumu, uko Mateyu wakakhalanga. Yakobe na Yohane ŵakaŵa na nchito ya ulovi ndipo ŵakwenera kuti ŵakakhalanga mu Kaperenaumu panji ca kufupi. Vikuwoneka kuti Yudasi Isikariyoti, uyo pamanyuma wakapeleka Yesu, ndiyo yekha wakaŵa wakufuma ku Yudeya. Mariko 3:13-19; Luka 6:12-16.

▪ Kasi ŵapositole awo ŵakwenera kuti ŵakaŵa ŵabali ŵa Yesu ni mba?

▪ Zunurani mazina gha ŵapositole ŵa Yesu, ndipo kasi mungaghakumbuka wuli?

▪ Kasi ŵapositole ŵakafuma ku vigaŵa wuli?