Cipaturo 127

Wakusungika pa Cinkhondi, Dindi Lambura Kanthu pa Sabata

SONO ni zuŵa la Cinkhondi mise, ndipo Sabata ya Nisani 15 yambenge para dazi lanjira. Citanda ca Yesu cicali pa khuni, kweni ŵakupoka vyaŵene ŵaŵiri awo ŵapayikika pamoza nayo ŵacali ŵamoyo. Zuŵa la Cinkhondi namise likucemeka la Kunozgekera cifukwa ni nyengo iyo ŵanthu ŵakunozga vyakurya na kumalizga nchito zinyake izo zingakhala cara kulindilira kuti Sabata yijumphe dankha.

Zuŵa la Sabata ilo lambenge sonosono apa ni Sabata la nyengo zose (ndiko kuti zuŵa lacinkhondi na ciŵiri mu sabata) kweniso ni Sabata “likuru.” Likucemeka likuru cifukwa cakuti Nisani 15, ilo ni zuŵa lakwamba la mazuŵa ghankhondi na ghaŵiri gha Ciphikiro ca Vingwa Vyambura Cilungo (ilo nyengo zose likuŵa Sabata, nanga lingaŵa kuti lakwanira pa zuŵa linyake mu sabata), lathyana na zuŵa la Sabata la nyengo zose.

Mwakuyana na Dango la Ciuta, vitanda vikwenera kugona pa khuni yayi. Ntheura Ŵayuda ŵakupempha Pilato kuti ŵaphyore malundi gha ŵanthu awo ŵapayikika kuti ŵafwe luŵiro. Ndipo ŵasilikari ŵakuphyora malundi gha ŵakupoka vyaŵene ŵaŵiri ŵara. Kweni pakuti Yesu wakuwoneka kuti wafwa kale, ŵakuphyora yayi malundi ghake. Ici cikufiska lemba ilo likuti: “Palije ciwangwa cake ico cizamuphyoreka.”

Ndipouli, kuti wapanikizgire kuti Yesu wafwa nadi, yumoza wa ŵasilikari wakumuvotora na mkondo mu mbambo. Mkondo ukulasa ku mtima, ndipo nyengo yeneyiyo ndopa na maji vikufuma. Mpositole Yohane, uyo wakuwona na maso, wakuti ici cikufiska lemba linyake ilo likuti: “Ŵazamulaŵiska kwa Uyo ŵakamulasa.”

Pa malo agha paliso Yosefe wakufuma mu msumba wa Arimatiya, yumoza wa Sanihedirini, wakumanyikwa comene. Munthu uyu wakakana ivyo mphara yikuru yacita pakukoma Yesu. Yosefe ni msambiri wa Yesu, nangauli wakopa kujiphara. Ndipouli, sono wakucita cikanga na kuluta kwa Pilato kukapempha citanda ca Yesu. Pilato wakucema mulara wa ŵasilikari, ndipo msilikari uyu wati wapanikizga kuti Yesu wafwa, Pilato wakupeleka citanda ca Yesu.

Yosefe wakutora citanda na kucivunga na salu yiwemi yakutowa pakunozgekera kucisunga. Wakovwirana na Nikodemo, uyoso wali mu Sanihedirini. Nikodemo nayo watondeka kuzomera pakweru cipulikano cake mwa Yesu cifukwa ca kopa kupokeka udindo. Kweni sono wakwiza na citukutu ca mure na aloyi, ca makilogiramu pafupifupi 33. Thupi la Yesu ŵakulikaka na sanda pamoza na vyakununkhira ivi, umo Ŵayuda ŵakucitira pakusunga nyifwa.

Kufuma apo, thupi la Yesu ŵakuligoneka mu dindi liphya la Yosefe ilo lili kujobeka mu libwe mu munda uwo uli pafupi. Paumaliro, ŵakukunkhuzgirapo libwe likuru pa mulyango wa dindi. Kuti ŵamalizge kusunga nyifwa pambere Sabata lindafike, ŵakunozga luŵiroluŵiro thupi. Ntheura Mariya wa ku Magadala na Mariya nyina wa Yakobe Mucoko, awo panji ŵakovwirako kunozga thupi, ŵakucimbilira ku nyumba kuti ŵakanozge vyakununkhira vinyake na mafuta. Ŵakughanaghana kuti para Sabata lajumpha, ŵazakalutilire kunozga thupi la Yesu mwakuti likhale nyengo yitali.

Zuŵa lakulondezgapo, la Cisulo (panji kuti Sabata), ŵalara ŵa ŵasofi na Ŵafarisi ŵakuluta kwa Pilato ndipo ŵakuti: “Dada, takumbuka kuti wakupusika yura apo wakaŵa wamoyo wakati, ‘Pamanyuma pa mazuŵa ghatatu, nizamuwuskika.’ Ntheura langurani kuti dindi livikilirike mpaka zuŵa lacitatu, mwakuti ŵasambiri ŵake ŵaleke kwiza na kumwiba na kuyowoya ku ŵanthu kuti, ‘Wali kuwuskika ku ŵakufwa!’ ndipo upusikizgi waumaliro uwu uŵenge uheni comene kuluska wakwamba.”

Pilato wakuzgora kuti: “Muli nawo ŵalinda. Lutani mukalivikilire umo mukumanyira.” Ntheura ŵakuluta na kuvikilira dindi, ŵakubatilira libwe na kuŵikapo ŵasilikari ŵa Ŵaroma kuti ŵalindenge.

Pa Sabata mulenjilenji, Mariya wa ku Magadala na Mariya nyina wa Yakobe, pamoza na Salome, Yohana, ndiposo ŵanakazi ŵanyake, ŵakwiza na vyakununkhira ku dindi kuti ŵazakaphake thupi la Yesu. Apo ŵali mu nthowa ŵakufumbana kuti: “Ni njani wamutikunkhuzgira libwe pamphepete pa mulyango wa dindi?” Kweni ŵati ŵafika, ŵakusanga kuti kwacitika cindindindi ndipo mungelo wa Yehova wawuskapo libwe pa mulyango. Ŵalinda ŵafumapo, ndipo dindi ndambura kanthu. Mateyu 27:57–28:2; Mariko 15:42–16:4; Luka 23:50–24:3, 10; Yohane 19:14, 31–20:1; 12:42; Leviticus 23:5-7; Duteronome 21:22, 23; Salmo 34:20; Zekariya 12:10.

▪ Cifukwa wuli zuŵa la Cinkhondi likucemeka kuti la Kunozgekera, ndipo Sabata “likuru” ni vici?

▪ Kasi ni malemba nga agho ghakufiskika pakukhwaskana na thupi la Yesu?

▪ Kasi Yosefe na Nikodemo ŵakucita vici pakusunga thupi la Yesu, ndipo pali ubali wuli pakati pa iwo na Yesu?

▪ Kasi ŵasofi ŵakupempha vici kwa Pilato, ndipo iyo wakuzgora wuli?

▪ Nchivici cikucitika pa Sabata mulenjilenji?