Cipaturo 119

Wakutolekera kwa Anasi, Kufuma Apo kwa Kayafa

YESU wakakika nga ngwakuswa malango, ndipo ŵakumutolera kwa Anasi, uyo wakaŵapo musofi mukuru. Anasi wakaŵa musofi mukuru apo Yesu wakatindika ŵarabi pa tempele, apo wakaŵa na vilimika 12. Ŵana ŵanandi ŵa Anasi ŵali kuteŵetapo nga mbasofi ŵakuru, ndipo pasono mukweni wake Kayafa ndiyo ni musofi mukuru.

Yesu wakwenera kuti wakutolekera dankha kwa Anasi cifukwa cakuti mulara wa ŵasofi uyu wateŵetera nyengo yitali mu cisopa ca Ŵayuda. Pakuti ŵayima dankha kwa Anasi, Musofi Mukuru Kayafa wakusanga mpata wakuwunganyira Sanihedirini, mphara yikuru ya Ŵayuda ya ŵanthu 71, ndiposo ŵakaboni ŵatesi.

Sono mulara wa ŵasofi Anasi wakufumba Yesu za ŵasambiri ŵake ndiposo za cisambizgo cake. Ndipouli, Yesu wakuzgora kuti: “Nayowoya pakweru ku caru. Nyengo zose nkhasambizganga mu sunagoge na mu tempele, mwenemumo Ŵayuda ŵakuwungana; ndipo nkhayowoyapo kanthu ku udesi cara. Cifukwa wuli ukufumba ine? Fumba awo ŵakapulika ivyo nkhayowoya kwa iwo. Wona! Aŵa ŵakumanya ico nkhayowoya.”

Pa ici, yumoza wa ŵalinda awo ŵimilira pafupi na Yesu wakumuchaya khofi kumaso, wakuti: “Kasi ndimo ukuzgolera mulara wa ŵasofi nthena?”

Yesu wakuzgora kuti: “Usange nabudiska kuyowoya, panikizgira ubudi wake; kweni usange naneneska, cifukwa wuli ukunitimba?” Ivi vyati vyacitika, Anasi wakutuma Yesu kwa Kayafa kwambura kumufwatura.

Pa nyengo iyi, ŵalara ŵa ŵasofi wose na ŵanalume ŵalara ndiposo ŵalembi, enya, Sanihedirini yose yamba kuwungana. Ŵakuwungana mu nyumba ya Kayafa. Dango la Ŵayuda likukana kweruzga munthu pa usiku wa Paska. Ndipouli, ici cikuŵatondeska yayi ŵalongozgi ŵa cisopa aŵa kufiska khumbo lawo liheni.

Masabata ghacoko waka kumasinda, apo Yesu wakawuska Lazaro, Sanihedirini yikadumulirathu kuti iyo wakomeke. Ndipo mazuŵa agho ghajumpha, pa Citatu, ŵalongozgi ŵa cisopa ŵakapangana kuti ŵakore Yesu mwaucenjezi kuti ŵamukome. Ghanaghanirani waka, ŵakukhumba kumukoma pambere wanderuzgike.

Pasono ŵakupenja ŵanthu kuti ŵapeleke ukaboni wautesi mwakuti ŵamusange na mulandu Yesu. Ndipouli, ŵanthu ŵakuti ŵapeleke ukaboni wakukolerana ŵakusangika yayi. Paumaliro, ŵaŵiri ŵakwiza ndipo ŵakuti: “Tikamupulika wakuyowoya kuti, ‘Niwiskirenge pasi tempele ilo likazengeka na mawoko ili, ndipo mu mazuŵa ghatatu nizengenge linyake lambura kuzengeka na mawoko.’”

Kayafa wakufumba kuti: “Kasi ulije cakuzgora? Ukuti wuli na ivyo aŵa ŵakukupanikizgira?” Kweni Yesu wakukhala cete. Nanga mphakupeleka ukaboni wautesi uwu, ŵakaboni aŵa ŵakukolerana yayi pa ivyo ŵakuyowoya, ico cikukhozga soni Sanihedirini. Ntheura musofi mukuru wakuyezga nthowa yinyake.

Kayafa wakumanya umo Ŵayuda ŵaliri maso na waliyose uyo wakujicema Mwana wa Ciuta. Kaŵiri kose kumasinda uku, ŵakacimbilira pa kuyowoya kuti Yesu ngwamuyuyuro ndipo ngwakwenelera nyifwa cifukwa ŵakatenge iyo wakuti ngwakuyana na Ciuta. Sono Kayafa mwaucenjezi wakuti: “Nkhukulapizga na Ciuta wamoyo kuti utiphalire usange ndiwe Khristu Mwana wa Ciuta!”

Nangauli Ŵayuda ŵakugomezga yayi, kweni Yesu ni Mwana wa Ciuta nadi. Ndipo para wangakhala cete wangaŵa nga ni para wakukana kuti ni Khristu. Ntheura Yesu wakuzgora mwacikanga kuti: “Ndine; ndipo imwe mwaŵanthu muwonenge Mwana wa munthu wakukhala ku woko lamalyero la nkhongono na kwiza na mabingu gha kucanya.”

Pa ici, Kayafa, wakupalura malaya ghake mwakujilongora na kucemerezga kuti: “Wayuyura Ciuta! Tikukhumbiraci ŵakaboni ŵanyake? Wonani! Sono mwapulika muyuyuro. Imwe mukughanaghana wuli?”

Sanihedirini yikuzgora kuti: “Wakwenelera nyifwa.” Kufuma apo, ŵakwamba kumuhoya, ndipo ŵakumuyowoyera vinthu vinandi vyamuyuyuro. Ŵakumutimba kumaso na kumuthunyira mata. Ŵanji ŵakumujara kumaso na kumutimba na mafayiti ndipo mwamsinjiro ŵakuti: “Usange ndiwe nchimi, iwe Khristu, tiphalira, ni njani wakutimba?” Nkhaza zose izi zikucitika apo ŵakumweruzga usiku. Mateyu 26:57-68; 26:3, 4; Mariko 14:53-65; Luka 22:54, 63-65; Yohane 18:13-24; 11:45-53; 10:31-39; 5:16-18.

▪ Kasi Yesu wakudankha kutolekera nkhu, ndipo ŵakucita nayo vici kura?

▪ Kufuma apo, kasi Yesu wakutolekera nkhu, ndipo na cilato wuli?

▪ Kasi Kayafa wakucita wuli kuti Sanihedirini yizomerezge kuti Yesu ngwakwenelera nyifwa?

▪ Kasi ni nkhaza wuli izo zikucitika apo Yesu wakweruzgika?