Cipaturo 65

Wakuya ku Yerusalemu Mwacibisibisi

NI NYENGO ya cihanya mu 32 C.E., ndipo Ciphikiro ca Mahema cili pafupi. Yesu wakucitira milimo yake mu Galileya, kwambira waka pa Paska mu 31 C.E., apo Ŵayuda ŵakakhumbanga kumukoma. Vikuwoneka kuti kwambira pa nyengo iyi, Yesu walutako ku Yerusalemu kuti wakaŵepo waka pa viphikiro vitatu vya pa cilimika vya Ŵayuda.

Sono ŵanung’una ŵa Yesu ŵakumuciska kuti: “Fumako kuno na kuluta ku Yudeya.” Msumba ukuru wa Yudeya ni Yerusalemu ndipo ndiko nchinyina ca kusopa mu caru cose. Ŵanung’una ŵake ŵakuti: “Palije munthu uyo wakucita kanthu mwakubisa uku iyomwene wakukhumba kumanyikwa pakweru.”

Nangauli Yakobe, Simoni, Yosefe na Yudasi ŵakugomezga yayi kuti mukuru wawo Yesu, ni Mesiya nadi, iwo ŵakukhumba kuti wakalongore nkhongono zake zakucitira minthondwe ku ŵanthu wose awo ŵawungana pa ciphikiro. Kweni Yesu wakumanya kuti pali uheni. Wakuti: “Caru cilije cifukwa cakumutinkhirani, kweni ine cikunitinkha, cifukwa nkhucipanikizgira kuti milimo yake njiheni.” Ntheura Yesu wakuphalira ŵanung’una ŵake kuti: “Imwe kwelerani ku ciphikiro; ine nikwelerengeko dankha cara ku ciphikiro ici.”

Ciphikiro ca Mahema ncha mazuŵa ghankhondi na ghaŵiri. Pa zuŵa laumaliro, lacinkhondi na citatu, pakuŵa vyakucitika vinyake vyakupatulika. Ciphikiro ici cikulongora kuti cilimika ca ulimi camara ndipo ni nyengo yakuti ŵanthu ŵakukondwa na kuwonga. Mazuŵa ghanandi ghati ghajumphapo kufuma apo ŵanung’una ŵa Yesu pamoza na ŵanthu wose ŵakanyamukira kuya ku ciphikiro, Yesu na ŵasambiri ŵake nawo ŵakuluta mwacibisibisi, kwambura ŵanthu kumanya. Ŵakwendera nthowa ya ku Samariya, m’malo mwa iyo yikujumpha ku Mlonga wa Yorodani iyo ŵanthu wose ŵakwenda.

Pakuti Yesu na awo wali nawo ŵakukhumbikwira malo ghakugona mu mizi ya ku Samariya, iyo wakutuma mathenga panthazi pake kuti ŵakanozge malo. Kweni ŵanthu ŵa ku Samariya ŵati ŵamanya kuti Yesu wakuluta ku Yerusalemu, ŵakukana kumupa malo. Mwaukali, Yakobe na Yohane ŵakufumba kuti: “Fumu, kasi mukukhumba kuti tiphalire moto wize kufuma kucanya na kuŵamara?” Yesu wakuŵasuska cifukwa ca fundo iyi, ndipo ŵakulutilira ulendo wawo kuya ku muzi unyake.

Apo ŵakulutilira kwenda, mulembi yunji wakuti kwa Yesu: “Msambizgi, nimulondezganinge kulikose uko mulutenge.”

Yesu wakuzgora kuti: “Ŵakambwe ŵali na micembo ndipo viyuni vya mu dera vili na vivwimbo, kweni Mwana wa munthu walije malo ghakugonekapo mutu wake.” Yesu wakulongosora kuti mulembi uyu wasuzgikenge para waŵa mulondezgi wake. Mulembi uyu wakuwoneka kuti ngwakujikuzga comene ndipo wangazomera yayi umoyo wanthena uwu.

Yesu wakuphalira munthu munyake kuti: “Uŵe mulondezgi wane.”

Munthu uyu wakuzgora kuti: “Nizomerezgani kuti nilute dankha nkhasunge ŵadada.”

Yesu wakuzgora kuti: “Leka ŵakufwa ŵasunge ŵakufwa ŵawo, kweni iwe lutanga ndipo ukapharazge kutali ufumu wa Ciuta.” Wiske wa munthu uyu wakwenera kuti wandafwe, cifukwa wafwenge mphanyi iyo wangwiza kuzakapulikizga Yesu yayi. Mwana uyu wakupempha nyengo yakuti walindilire kuti awiske ŵafwe dankha. Iyo ngwakunozgeka yayi kudangizga Ufumu wa Ciuta mu umoyo wake.

Apo ŵakulutilira na ulendo wa ku Yerusalemu, munthu munyake wakuphalira Yesu kuti: “Nimulondezganinge, Fumu; kweni nizomerezgani dankha kuti nkhalayire ŵamunyumba yane.”

Pakuzgora Yesu wakuti: “Palije munthu uyo waŵika woko lake pa cakulimira ndipo wakulaŵiska ku vinthu vyakumasinda uyo wakwenelera nadi ufumu wa Ciuta.” Awo ŵakukhumba kuŵa ŵasambiri ŵa Yesu, maso ghawo ghakwenera kuŵa pa vinthu vya Ufumu. Nga umo mzere ungabendelera para munthu uyo wakulima wakulaŵiska kumasinda, ntheura ndimo uyo wakulaŵiska kumasinda ku mgonezi uwu, wakhuŵalirenge pa nthowa yakuya ku umoyo wamuyirayira. Yohane 7:2-10; Luka 9:51-62; Mateyu 8:19-22.

▪ Kasi ŵanung’una ŵa Yesu mbanjani, ndipo ŵakughanaghana vici vya iyo?

▪ Cifukwa wuli Ŵasamariya ŵakukhumba yayi kumupokelera Yesu, ndipo Yakobe na Yohane ŵakukhumba kucita vici?

▪ Kasi Yesu wakudumbirana nawo vici ŵanthu ŵatatu mu nthowa, ndipo wakulongora wuli kuti kujipata nkhwakukhumbikwa?