Cipaturo 89

Wakuya ku Yudeya Kukalongora Cisungusungu

MASABATA ghacoko waka kumanyuma uku, pa Ciphikiro ca Kupatulira Tempele mu Yerusalemu, Ŵayuda ŵakakhumba kumukoma Yesu. Ntheura wakaluta kumpoto, kutali viŵi yayi na Nyanja ya Galileya.

Sono wambaso kuluta kumwera kulazga ku Yerusalemu, kupharazga mu mizi ya ku Pereya, cigaŵa ico cili kuvuma kwa Mlonga wa Yorodani. Wati wayowoya ntharika ya munthu musambazi na Lazaro, wakulutilira kusambizga ŵasambiri ŵake vinthu ivyo wakaŵasambizga kale apo wakaŵa ku Galileya.

Mwaciyelezgero, wakuyowoya kuti cingaŵa ciwemi ku munthu usange “lwara lungakakika mu singo yake ndipo waponyeke mu nyanja” kuluska kuti iyo wakhuŵazge yumoza wa “ŵacoko.” Wakudidimizgaso kuti nchakukhumbikwa kugowokera, wakulongosora kuti: “Nanga [mbali] wangakunangira kankhondi na kaŵiri pa zuŵa, ndipo wakwiza kwa iwe kankhondi na kaŵiri, kuyowoya kuti, ‘Napera,’ ukwenera kumugowokera.”

Ŵasambiri ŵati ŵamupempha kuti, “Mutisazgireko cipulikano,” Yesu wakuzgora kuti: “Usange mungaŵa na cipulikano ukuru wa njere ya sinapi, muyowoyenge ku khuni la matubeni ili kuti, ‘Zgulika ndipo ukapandike mu nyanja!’ ndipo limupulikiraninge.” Ntheura nanga cipulikano cingaŵa cicoko cingacita vikuru.

Kufuma apo, Yesu wakulongosora cakucitika canadi ico cikulongora umo muteŵeti wa Ciuta mwenenkhongonozose wakwenera kujiwonera. Yesu wakuti: “Ni njani wa imwe uyo wali na muzga wakulima panji wakuliska mskambo, mweneuyo watenge kwa iyo para wawerako ku munda, ‘Zanga kuno luŵiro na kukhala pa thebulu’? Kweni asi watenge kwa iyo, ‘Ninozgera kanthu kuti nirye cakurya cane ca mise, ndipo vwara epuroni na kuniteŵetera mpaka nimare kurya na kumwa, ndipo pamanyuma pake ungarya na kumwa’? Kasi wamuwongenge muzga yura cifukwa cakuti wakacita vinthu ivyo wapika kucita? Ntheura namwe, para mwacita vinthu vyose ivyo vyapika kwa imwe, mutenge, ‘Tili ŵazga waka. Ico tacita ndico tangwenera kucita.’” Ntheura ŵateŵeti ŵa Ciuta ŵakwenera cara kughanaghana kuti para ŵakumuteŵetera ndikuti ŵakumovwira. Kweni nyengo zose ŵakwenera kukumbuka mwaŵi uwo ŵali nawo wa kumusopa pakuŵa ŵanthu ŵakugomezgeka ŵa mu mbumba yake.

Vikuwoneka kuti nyengo yicoko waka Yesu wati wayowoya ntharika iyi, thenga likwiza. Latumika na Mariya na Marita, ŵadumbu ŵa Lazaro, awo ŵakukhala mu Betaniya wa ku Yudeya. Thenga likuti: “Fumu, wonani! uyo mukumutemwa ni mulwari.”

Yesu wakuzgora kuti: “Ulwari uwu umaliro wake ni nyifwa cara, kweni kuti Ciuta wapike ucindami, mwakuti Mwana wa Ciuta wapike ucindami kwizira mu uwu.” Yesu wati wakhalako mazuŵa ghaŵiri uko wali, wakuphalira ŵasambiri ŵake kuti: “Tiyeni tiluteso ku Yudeya.” Ndipouli, iwo ŵakumukumbuska kuti: “Rabi, sonosono apa ŵanthu ŵa ku Yudeya ŵakakhumbanga kumudinyani na malibwe, ndipo kasi mukulutaso kwenekuko?”

Pakuzgora, Yesu wakufumba kuti: “Asi muhanya uli na maora khumi na ghaŵiri? Usange yunji wakwenda muhanya wakukhuŵara mu kalikose cara, cifukwa wakuwona ungweru wa caru cino. Kweni usange yunji wakwenda usiku, wakukhuŵara ku cinthu cinyake, cifukwa ungweru ulimo mwa iyo cara.”

Ico Yesu wakung’anamura apa nchakuti: ‘Maora gha muhanya,’ panji kuti nyengo iyo Ciuta wapa Yesu yakuti wateŵetere pa caru capasi yindamare, ndipo palije munthu wangamupweteka mpaka maora agha ghamare dankha. Wakukhumba kuti wacite vinandi mu nyengo yicoko ya “muhanya” iyo yakhalako, pakuti “usiku” wizenge para ŵalwani ŵake ŵamukoma.

Yesu wakusazgirapo kuti: “Lazaro mubwezi withu waya kukapumura, kweni ine nkhuya kwenekura kukamuwuska mu tulo.”

Pakughanaghana kuti Lazaro wakupumura mu tulo ntheura kuti wawukenge, ŵasambiri ŵakuzgora kuti: “Fumu, usange waluta kukapumura, waŵenge makora.”

Ndipo Yesu wakuŵaphalira pakweru kuti: “Lazaro wali kufwa, ndipo nkhusekelera cifukwa ca imwe kuti nkhaŵako cara, mwakuti imwe mugomezge. Kweni tiyeni tilute kwa iyo.”

Pakumanya kuti Yesu wangakakomeka mu Yudeya, pakukhumba kumovwira, Tomasi wakukhuŵilizga ŵasambiri ŵanyake kuti: “Tiyeni nase tilute, mwakuti tikafwe pamoza nayo.” Ntheura pakuŵika umoyo wawo pangozi, ŵasambiri ŵakulongozgana na Yesu kuya ku Yudeya kukalongora cisungusungu. Luka 13:22; 17:1-10; Yohane 10:22, 31, 40-42; 11:1-16.

▪ Kasi Yesu wapharazganga nkhu sonosono apa?

▪ Kasi ni visambizgo wuli ivyo Yesu wakuwerezgapo, ndipo nchakucitika wuli canadi ico wakuyowoya ndipo wakulongosora fundo wuli?

▪ Kasi ni nkhani wuli iyo Yesu wakupulika, ndipo wakung’anamuraci pakuyowoya kuti “muhanya” ndiposo “usiku”?

▪ Kasi Tomasi wakung’anamuraci apo wakuyowoya kuti, ‘Tiyeni tilute mwakuti tikafwe pamoza nayo’?