Cipaturo 132

Wali ku Woko Lamalyero la Ciuta

KUPUNGULIKA kwa mzimu utuŵa pa Pentekoste mbukaboni wakuti Yesu wafika kucanya. Nyengo yicoko waka kufuma apa, mboniwoni iyo Stefano wakuwona nayo yikulongora kuti Yesu wafika kucanya. Pambere wandadinyike cifukwa ca kupharazga mwakugomezgeka, Stefano wakucemerezga kuti: “Wonani! Nkhuwona macanya ghajulika ndipo Mwana wa munthu wimilira ku woko lamalyero la Ciuta.”

Apo wali ku woko lamalyero la Ciuta, Yesu wakulindilira kuti Ŵawiske ŵamuphalire kuti: ‘Wusa mukati mwa ŵalwani ŵako!’ Kweni pa nyengo yasono, apo wakulindilira kuti wathereske ŵalwani ŵake, kasi Yesu wakucita vici? Wakuwusa ŵasambiri ŵake ŵakuphakazgika, kuŵalongozga mu mulimo wawo wa kupharazga, na kuŵawovwira kunozgekera kuti para ŵazakawuka ŵazakaŵe mafumu pamoza na iyo mu Ufumu wa Ŵawiske.

Mwaciyelezgero, Yesu wakusora Saulosi (uyo wakamba kumanyikwa na zina lake Laciroma lakuti, Paulosi) kuti wadangilire mulimo wa kuzgora ŵanthu kuŵa ŵasambiri mu vyaru vinyake. Saulosi ngwamwamphu pakusunga Dango la Ciuta, kweni wali kupuluskika na ŵalongozgi ŵa cisopa ca Ŵayuda. Ntheura Saulosi wakuzomerezga kuti Stefano wakomeke, apo pera cara, wakupoka makalata kwa musofi mukuru Kayafa kuti wakakore ŵanthu wose awo ŵakulondezga Yesu, ŵanalume na ŵanakazi wuwo na kwiza nawo ku Yerusalemu. Ndipouli, Saulosi wacali mu nthowa, ungweru ukuru ukumuŵalira zingilizge, ndipo wakuwa pasi.

Lizgu lambura kumanyikwa uko lafumira likupulikikwa, likuti: “Saulosi, Saulosi, ukunitambuzgiraci?” Saulosi wakufumba kuti: “Ndimwe njani, Fumu?”

Zgoro likuti: “Ndine Yesu, mweneuyo ukumutambuzga.”

Saulosi, uyo ungweru wamukoma maso, Yesu wakumuphalira kuti wanjire mu Damaseko na kulindilira ivyo waphalilikenge. Ndipo Yesu wakuwonekera mu mboniwoni kwa Hananiya, yumoza wa ŵasambiri ŵake. Pakuyowoya za Saulosi, Yesu wakuphalira Hananiya kuti: “Munthu uyu nchiŵiya cakusoleka kwa ine kuyeghera zina lane ku mitundu kweniso ku mathemba na ŵana ŵa Israyeli.”

Nadi, mwakovwirika na Yesu, Saulosi (uyo sono wakumanyikwa kuti Paulosi) na ŵapharazgi ŵanji ŵacita makora comene mulimo wawo wa kupharazga na kusambizga. Mwakuti pati pajumpha vilimika 25 kufuma apo Yesu wakamuwonekera pa nthowa ya ku Damaseko, Paulosi wakulemba kuti “makani ghawemi” ghapharazgika “mu cilengiwa cose kusi ku mtambo.”

Pati pajumpha vilimika vinyake vinandi, Yesu wakulongora mboniwoni kwa mpositole wake wakutemweka, Yohane. Kwizira mu mboniwoni izi, izo Yohane wakulongosora mu buku la Uvumbuzi, wakuŵa nga wafikamo mu nyengo iyo Yesu wakwiza mu nkhongono za Ufumu. Yohane wakuyowoya kuti “mwa mzimu” wakatolekera kunthazi mu “zuŵa la Fumu.” Kasi “zuŵa” ili ni ndi?

Para tikusanda mwakupwelelera maucimi gha mu Baibolo ndiposo ucimi wa Yesu wakuyowoya za mazuŵa ghaumaliro, tikusanga kuti “zuŵa la Fumu” likamba mu cilimika cakumanyikwa comene mu mdauko ca 1914, enya, mu muwiro uwo tilimo. Ntheura mukaŵa mu 1914, apo Yesu wakizaso kwambura kuwoneka ndipo ŵateŵeti ŵake ŵakugomezgeka ŵekha ndiwo ŵakamanya kuti wizaso. Mu cilimika ici, Yehova wakalangura Yesu kuti wawuse mukati mu ŵalwani ŵake.

Pakupulikira languro la Ŵawiske, Yesu wakanozgako kucanya, wakapondomoskera Satana na viŵanda vyake pa caru capasi. Yohane wati wawona vinthu ivi mu mboniwoni, wakupulika lizgu lakufuma kucanya likuti: “Sono cafiskika ciponosko na nkhongono na ufumu vya Ciuta withu na mazaza gha Khristu wake.” Enya, mu 1914 Khristu wakamba kuwusa nga ni Themba.

Iyi ni nkhani yiwemi comene ku ŵasopi ŵa Yehova ŵa kucanya. Iwo ŵakuciskika kuti: “Kondwani imwe macanya na imwe mukukhala mwenemumo!” Kweni awo ŵali pa caru capasi ke? Lizgu lakufuma kucanya likulutilira kuti: “Soka ku caru capasi na nyanja, cifukwa Dyabulosi wakhilira pasi kwa imwe, wali na ukali ukuru, pakumanya kuti wali na nyengo yifupi.”

Sono tikukhala mu nyengo yifupi yeneyiyi. Pa nyengo iyi ŵanthu ŵakupatulika kuti ŵazakanjire mu caru ciphya ca Ciuta panji kuti ŵazakaparanyike. Unenesko ngwakuti, kuti muzakaŵe ŵamoyo panji kuparanyika, vikuthemba pa umo mukucitira na makani ghawemi gha Ufumu wa Ciuta agho ghakupharazgika pa caru cose mwakulongozgeka na Khristu.

Para nchito ya kupatura ŵanthu yamara, Yesu Khristu wazamutumika na Ciuta, kuti wamazge mgonezi wa Satana na wose awo ŵakumulondezga. Yesu wazamumalizga kuwuskapo uheni wose uwu pa nkhondo iyo mu Baibolo yikucemeka kuti Haramagedoni. Kufuma apo, Yesu uyo ni Munthu mukuru comene, waciŵiri kwa Yehova Ciuta pera, wazamukora Satana na viŵanda vyake na kumujalira vilimika cikwi mu “cizongwe,” ico cikung’anamura kuti ŵazamucitaso cilicose cara, ŵazamuŵa nga ŵafwa. Milimo 7:55-60; 8:1-3; 9:1-19; 16:6-10; Salmo 110:1, 2; Ŵahebere 10:12, 13; 1 Petrosi 3:22; Luka 22:28-30; Ŵakolose 1:13, 23; Uvumbuzi 1:1, 10; 12:7-12; 16:14-16; 20:1-3; Mateyu 24:14; 25:31-33.

▪ Yesu wati wakwera kucanya, wakwimilira dera nkhu, ndipo wakulindilira vici?

▪ Kasi Yesu wati wakwera kucanya wakuwusa njani ndipo pali ukaboni wuli wakuti wakuwusa?

▪ Kasi “zuŵa la Fumu” likamba pawuli, ndipo nchivici cikacitika apo likambanga?

▪ Ni mulimo wuli wa kupatura uwo ukucitika mazuŵa ghano weneuwo ukukhwaska waliyose wa ise, ndipo pakupatura vikuthemba pa vici?

▪ Para mulimo wa kupatura ŵanthu wamara kasi nchivici ico cizamucitika?