Cipaturo 83

Wali mu Nyumba ya Mufarisi

YESU wacali mu nyumba ya Mufarisi wakumanyikwa ndipo wacizga waka munthu uyo wakalwaranga nthenda ya mburu. Wati wawona kuti ŵalendo ŵanyake ŵakujisolera malo ghakuzirwa pa cakurya, wakusambizga za kujiyuyura.

Yesu wakuti: “Para wacemeka na munthu yunji ku ciphikiro ca nthengwa, ungakhalanga pa malo ghakuzirwa comene cara. Panji munthu munyake wakuzirwa comene kuluska iwe pa nyengo yeneyira wacemeka na iyo, ndipo uyo wakacema iwe na iyo wizenge na kuyowoya kwa iwe, ‘Leka munthu uyu wakhale pa malo agha.’ Penepapo ufumengepo na soni kukakhala pa malo ghapasi comene.”

Ntheura Yesu wakusambizga kuti: “Para wacemeka, luta ukakhale pa malo ghapasi comene, mwakuti para munthu uyo wakucema wakwiza wazamuti kwa iwe, ‘Bwezi, luta pacanya para.’ Penepapo uŵenge na nchindi panthazi pa ŵalendo ŵanyako wose.” Pakumalizga, Yesu wakuti: “Pakuti waliyose uyo wakujikwezga wazamuyuyulika ndipo uyo wakujiyuyura wazamukwezgeka.”

Kufuma apo, Yesu wakuyowoya na Mufarisi uyo wamucema na kulongosora umo wanganozgera ciphikiro ico Ciuta wakukondwa naco. Wakuti: “Para ukunozga cakurya ca muhanya panji cakurya ca mise, kucema ŵabwezi ŵako cara panji ŵana ŵakwako panji ŵabali ŵako panji ŵazengezgani ŵasambazi. Panji nyengo yinyake nawo ŵangakucema ndipo cizamuŵa nga nkhuwezgerapo kwa iwe. Kweni para wanozga ciphikiro, cema ŵanthu ŵakavu, ŵakulemara, ŵakupendera, ŵacibulumutira; ndipo uŵenge wakukondwa, cifukwa ŵalije kanthu kakuwezgerapo kwa iwe.”

Para munthu wanozgera cakurya canthena ici ŵanthu ŵakusuzgika wakuŵa wakukondwa. Cifukwa ni ico Yesu wakulongosora kwa uyo wamucema kuti, “Uzamupoka njombe yako pa ciwuka ca ŵarunji.” Umo Yesu walongosolera za cakurya ici, mulendo munyake wakukumbuka za mtundu unyake wa cakurya. Mulendo uyu wakuti: “Wakukondwa ni uyo wakurya cingwa mu ufumu wa Ciuta.” Kweni ni wose yayi awo ŵakuzirwiska cilindizga cakukondweska ici, nga umo Yesu wakulongosolera kwizira mu ntharika.

“Munthu yunji wakanozga ciphikiro cikuru, ndipo wakacema ŵanandi. Ndipo wakatuma muzga wake . . . kuti wakaphalire ŵakucemeka wakati, ‘Zaninge, cifukwa vinthu vyanozgeka kale sono.’ Kweni wose mwakuyana waka ŵakamba kugwentha. Wakwamba wakati kwa iyo, ‘Nagura munda ndipo nkhwenera kuluta kuti nkhawuwone; nkhukulomba, Nifikenge cara.’ Ndipo munyake wakati, ‘Nagura vipani vinkhondi vya ng’ombe za joko ndipo nkhuluta kukaziyezga; nkhukulomba, Nifikenge cara.’ Munyakeso wakati, ‘Natora waka mwanakazi ndipo pa cifukwa ici ningiza cara.’”

Ivi ni vifukwa vyambura kupulikikwa. Para munthu wakugura munda panji viŵeto wakudankha kuviwona pambere wandagure, ntheura palije cifukwa cakuti munthu walutire kukaviwonaso. Ntheura pera, munthu wangatondeka kuluta ku ciphikiro cakuzirwa nga ni ici cifukwa ca nthengwa yayi. Ntheura pakupulika vifukwa ivi, fumu yikukalipa na kulangura muzga wake kuti:

“‘Luta luŵiro mu nthowa zisani na misewu ya mu msumba, ndipo ukatolere kuno ŵakavu na ŵakulemara na ŵacibulumutira na ŵakupendera.’ Pamanyuma pake, muzga yura wakati, ‘Fumu, ivyo mukalangura vyacitika, kweni malo ghacalipo.’ Ndipo fumu yira yikati kwa muzga, ‘Luta mu misewu na malo ghakuŵighilira, ndipo ukaŵacicizge kuti ŵize, mwakuti nyumba yane yizure. . . . Palije nanga njumoza wa ŵanthu awo ŵakacemeka wacetenge ciphikiro cane.’”

Kasi ntharika iyi yikung’anamura vici? “Fumu” iyo yanozga ciphikiro yikwimira Yehova Ciuta; “muzga” uyo wakucema ŵanthu ni Yesu Khristu; ndipo “ciphikiro cikuru” ni mwaŵi wakuti munthu waŵe wakwenelera Ufumu wa kucanya.

Padera pa wose, awo ŵakadankha kucemeka kuŵa ŵakwenelera Ufumu ŵakaŵa ŵalongozgi ŵa cisopa ca Ŵayuda ŵa mu nyengo ya Yesu. Kweni ŵakakana nchemo iyi. Ntheura, kwambira pa Pentekoste 33 C.E., nchemo yaciŵiri yikapelekeka ku Ŵayuda ŵakuyuyulika na ŵapasi. Kweni mbanandi yayi awo ŵakazomera kuti ŵakwaniske malo gha ŵanthu 144,000 mu Ufumu wa Ciuta wakucanya. Ntheura mu 36 C.E., pakati pajumpha vilimika vitatu na hafu, nchemo yacitatu na yaumaliro yikapelekeka ku ŵanthu ŵambura kukotoleka ŵa mitundu yinyake, ndipo ŵanthu aŵa ŵacali kuwunganyika mpaka mu nyengo yithu yino. Luka 14:1-24.

▪ Kasi ni sambiro wuli lakukhwaskana na kujiyuyura ilo Yesu wakusambizga?

▪ Kasi munthu wanganozga wuli ciphikiro ico Ciuta wakukondwa naco, ndipo cifukwa wuli munthu uyo wanozga wakuŵa wakukondwa?

▪ Cifukwa wuli vifukwa ivyo ŵanthu awo ŵacemeka ŵakupeleka ni vyambura kupulikikwa?

▪ Kasi ntharika ya “ciphikiro cikuru” iyo Yesu wakuyowoya yikwimira vici?