Cipaturo 9

Wanici wa Yesu

YESU wakukulira mu Nazarete, msumba ucoko na wambura kuzirwa. Uli mu caru ca mapiri cakucemeka Galileya, kutali yayi na Dambo lakutowa la Jezreli.

Apo Yosefe na Mariya ŵakwiza na Yesu ku malo agha kufuma ku Eguputo, panji wali na vilimika viŵiri, ndipo wakwenera kuti ni mwana yekha wa Mariya. Kweni kuti vikulutilira nthena yayi. Nyengo yati yajumphapo, Mariya wakubabaso Yakobe, Yosefe, Simoni na Yuda. Kweniso Yosefe na Mariya ŵakuŵaso na ŵana ŵasungwana. Paumaliro, Yesu wali na ŵanung’una na ŵadumbu ŵankhondi na yumoza.

Yesu waliso na ŵabali ŵanyake. Tikumanya kale za mbali wake, Yohane, uyo wakukhala ku Yudeya kutali na Nazarete. Kweni kufupi, ku Galileya kuli Salome, uyo wakwenera kuti ni munung’una wa Mariya. Salome wali kutengwa kwa Zebediya. Ntheura ŵana ŵawo ŵaŵiri, Yakobe na Yohane, mbabali ŵa Yesu. Tikumanya yayi usange Yesu wakucezga na ŵanyamata aŵa apo wakukura, kweni pamanyuma ŵakuŵa ŵabwezi ŵake ŵa pamtima.

Yosefe wakwenera kugwira nchito na nkhongono zake zose kuti wapwelelere mbumba yake iyo sono yikusazgikira. Iyo ni misiri wa mathabwa. Yosefe wakulera Yesu nga ni mwana wake, ntheura Yesu wakucemeka “mwana wa misiri wa mathabwa.” Yosefe wakusambizga Yesu nchito ya vyakukhomakhoma, ndipo wakusambira makora. Lekani nyengo yati yajumphapo, ŵanthu ŵakunena Yesu kuti, “Uyu ni misiri wa mathabwa.”

Mbumba ya Yosefe yikuŵika mtima pa kusopa Yehova Ciuta. Pakulondezga Dango la Ciuta, Yosefe na Mariya ŵakusambizga ŵana ŵawo vinthu vyauzimu ‘para ŵakukhala mu nyumba yawo, para ŵakwenda mu nthowa, para ŵakugona, ndiposo para ŵakuwuka.’ Mu Nazarete muli sunagoge, ndipo tikukayika yayi kuti Yosefe wakulutako nyengo zose pamoza na mbumba yake kukasopa. Kweni tikukayikaso yayi kuti nyengo zose ŵakukondwa comene para ŵakunyamuka kuya ku tempele la Yehova ku Yerusalemu. Mateyu 13:55, 56; 27:56; Mariko 15:40; 6:3; Duteronome 6:6-9.

▪ Kasi Yesu wali na ŵanung’una na ŵadumbu ŵalinga, ndipo ŵanji ŵa iwo mazina ghawo mbanjani?

▪ Kasi ŵabali ŵanyake ŵatatu ŵa Yesu awo ŵakumanyikwa comene mbanjani?

▪ Kasi ni nchito wuli ya mawoko iyo Yesu wakusambira, ndipo cifukwa wuli?

▪ Kasi ni vinthu wuli vyakuzirwa ivyo Yosefe wakusambizga mbumba yake?